സിംഗപ്പൂർ തീരത്ത് കരുത്ത് കാട്ടി ഐഎൻഎസ് സന്ധായക്; ഇന്ത്യയുടെ ‘ആക്ട് ഈസ്റ്റ്’ നയത്തിന് പുത്തൻ ഊർജ്ജം
ഇന്ത്യൻ നാവികസേനയുടെ ഏറ്റവും പുതിയ സർവേ കപ്പലായ ഐഎൻഎസ് സന്ധായക് സിംഗപ്പൂരിൽ കന്നി സന്ദർശനം വിജയകരമായി പൂർത്തിയാക്കി. ഇന്ത്യയുടെ ‘ആക്ട് ഈസ്റ്റ്’ നയത്തിനും ‘മഹാസാഗർ’ (MAHASAGAR) പദ്ധതിക്കും കരുത്തേകുന്ന ഈ സന്ദർശനം, ഇരു രാജ്യങ്ങളും തമ്മിലുള്ള സമുദ്ര, ഹൈഡ്രോഗ്രാഫിക് സഹകരണത്തിൽ പുതിയ അധ്യായം കുറിച്ചു.
ഓഗസ്റ്റ് 12-ന് സിംഗപ്പൂരിലെ ചാങ്കി നാവിക താവളത്തിൽ നിന്ന് മടങ്ങിയ ഐഎൻഎസ് സന്ധായക്, സിംഗപ്പൂരിന്റെ ദേശീയ ദിനാഘോഷങ്ങളിലും പങ്കാളിയായി. അത്യാധുനിക ഹൈഡ്രോഗ്രാഫിക് സംവിധാനങ്ങളുള്ള ഇന്ത്യയുടെ ആദ്യത്തെ സർവേ വെസ്സൽ ലാർജ് (SVL) വിഭാഗത്തിലുള്ള കപ്പലാണ് ഐഎൻഎസ് സന്ധായക്.
സന്ദർശനത്തിന്റെ ഭാഗമായി കപ്പലിന്റെ കമാൻഡിംഗ് ഓഫീസർ ക്യാപ്റ്റൻ എൻ. ധീരജ്, സിംഗപ്പൂർ അസിസ്റ്റന്റ് ചീഫ് ഹൈഡ്രോഗ്രാഫർ ഗാരി ച്യൂ, സിംഗപ്പൂർ നേവിയിലെ ഒമ്പതാം ഫ്ലോട്ടില്ലയുടെ കമാൻഡർ കേണൽ ചൗവാ മെങ് സൂൺ എന്നിവരുമായി കൂടിക്കാഴ്ച നടത്തി. സമുദ്ര സുരക്ഷ, വ്യാപാരം എന്നിവയിൽ കൃത്യമായ ഹൈഡ്രോഗ്രാഫിയുടെ പ്രാധാന്യം ചർച്ചയിൽ ഊന്നിപ്പറഞ്ഞു. സഹകരണം മെച്ചപ്പെടുത്തുന്നതിനും മികച്ച പ്രവർത്തന രീതികൾ പങ്കുവെക്കുന്നതിനും ഇരുപക്ഷവും പ്രതിബദ്ധത അറിയിച്ചു.
സിംഗപ്പൂർ നേവി ഉദ്യോഗസ്ഥരെ കപ്പലിലേക്ക് സ്വാഗതം ചെയ്യുകയും ഇന്ത്യൻ നാവികസേനയുടെ ഹൈഡ്രോഗ്രാഫിക് കഴിവുകൾ പരിചയപ്പെടുത്തുകയും ചെയ്തത് സന്ദർശനത്തിലെ പ്രധാന ആകർഷണമായിരുന്നു. കൂടാതെ, വിദ്യാഭ്യാസ പരിപാടിയുടെ ഭാഗമായി സിംഗപ്പൂരിലെ സ്കൂൾ കുട്ടികൾക്കും കപ്പൽ സന്ദർശിക്കാൻ അവസരമൊരുക്കി. സമുദ്രങ്ങളെക്കുറിച്ചുള്ള പഠനം, നാവിക സുരക്ഷ, സമുദ്ര ആവാസ വ്യവസ്ഥയുടെ സംരക്ഷണം എന്നിവയെക്കുറിച്ച് നാവികർ കുട്ടികൾക്ക് വിശദീകരിച്ചു നൽകി.
മേഖലാ സഹകരണത്തിനും സമാന ചിന്താഗതിയുള്ള നാവികസേനകളുമായി സഹകരിച്ച് പ്രവർത്തിക്കുന്നതിനും ഇന്ത്യൻ നാവികസേന എപ്പോഴും പ്രതിജ്ഞാബദ്ധമാണെന്ന് ഈ സന്ദർശനം ഒരിക്കൽ കൂടി അടിവരയിടുന്നു.
