ഒരു നീണ്ട ഇടവേളയ്ക്ക് ശേഷം കത്തോലിക്കാ സഭയും കമ്യൂണിസ്റ്റ് പാർട്ടിയും തമ്മിലുള്ള പോര് വീണ്ടും തുടങ്ങുന്നു. സി.പി.എം. സംസ്ഥാന സെക്രട്ടറി എം.വി. ഗോവിന്ദൻ, തലശ്ശേരി ആർച്ചുബിഷപ്പ് മാർ ജോസഫ് പാംപ്ലാനിയെ ‘അവസരവാദി’ എന്ന് വിശേഷിപ്പിച്ചതാണ് പുതിയ വിവാദങ്ങൾക്ക് തിരികൊളുത്തിയത്.
എം.വി. ഗോവിന്ദന്റെ ഈ പ്രസ്താവനയ്ക്കെതിരെ സഭാ നേതൃത്വം അതിരൂക്ഷമായ ഭാഷയിൽ പ്രതികരിച്ചു. കോടിയേരി ബാലകൃഷ്ണൻ ഇരുന്ന സ്ഥാനത്ത് ഇരിക്കുന്ന ഒരാൾക്ക് ചേർന്ന പ്രസ്താവനയല്ല ഇതെന്നും, പ്രസ്താവന പിൻവലിക്കാത്ത പക്ഷം അടുത്ത സർക്കാരിനെക്കുറിച്ച് പാർട്ടി ആലോചിക്കണമെന്നും കത്തോലിക്കാ കോൺഗ്രസ് ഗ്ലോബൽ ഡയറക്ടർ ഫാദർ ഫിലിപ്പ് കവിയിൽ മുന്നറിയിപ്പ് നൽകി.
ഗോവിന്ദൻ മാസ്റ്റർ ഗോവിന്ദച്ചാമിയെപ്പോലെ സംസാരിക്കരുതെന്ന് വിമർശിച്ച ഫാദർ കവിയിൽ, മുഖ്യമന്ത്രി നേരത്തെ ഗോവിന്ദനെ ശാസിച്ചത് ഓർക്കണമെന്നും കൂട്ടിച്ചേർത്തു. ഛത്തീസ്ഗഡിൽ കന്യാസ്ത്രീകളെ അറസ്റ്റ് ചെയ്തപ്പോൾ ബി.ജെ.പി.ക്കെതിരെ സംസാരിച്ച ബിഷപ്പ്, ജാമ്യം കിട്ടിയപ്പോൾ അമിത് ഷായെ സ്തുതിച്ചെന്നും, ശേഷം ഒഡീഷയിൽ അച്ചന്മാർക്ക് മർദനമേറ്റപ്പോൾ വീണ്ടും നിലപാട് മാറ്റിയെന്നും എം.വി. ഗോവിന്ദൻ ആരോപിച്ചിരുന്നു. ഇതെല്ലാം അവസരവാദപരമായ നിലപാടുകളാണെന്നാണ് സി.പി.എം. സംസ്ഥാന സെക്രട്ടറി പറഞ്ഞത്.
സഭയും കമ്യൂണിസ്റ്റ് പാർട്ടിയും നേർക്കുനേർ ഏറ്റുമുട്ടിയ ചരിത്രം
- 1957-ലെ വിമോചന സമരം മുതൽ,
- മത്തായി ചാക്കോയുടെ മരണവുമായി ബന്ധപ്പെട്ട ‘നികൃഷ്ടജീവി’ വിവാദം,
- ടി.വി. തോമസിന്റെ കുമ്പസാരവുമായി ബന്ധപ്പെട്ട വെളിപ്പെടുത്തലുകൾ
എന്നിവയെല്ലാം ചരിത്രത്തിന്റെ ഭാഗമാണ്.
ഈ ഏറ്റുമുട്ടലുകളെല്ലാം കേരള രാഷ്ട്രീയത്തിൽ വലിയ ചലനങ്ങൾ സൃഷ്ടിച്ചിട്ടുണ്ട്. തിരഞ്ഞെടുപ്പുകൾ അടുത്തിരിക്കെ, പുതിയ വിവാദം എന്ത് പ്രത്യാഘാതങ്ങൾ ഉണ്ടാക്കുമെന്ന് ഉറ്റുനോക്കുകയാണ് രാഷ്ട്രീയ കേരളം.
