ന്യൂഡൽഹി: ഇലക്ഷൻ കമ്മീഷൻ ബിജെപിയുമായി ചേർന്ന് വോട്ടർ പട്ടികയിൽ കൃത്രിമം കാണിക്കുന്നു എന്നാരോപിച്ച് ഡൽഹിയിൽ പ്രതിഷേധിച്ച പ്രതിപക്ഷ നേതാക്കളെ പോലീസ് കസ്റ്റഡിയിലെടുത്തു. കോൺഗ്രസ് നേതാക്കളായ രാഹുൽ ഗാന്ധി, പ്രിയങ്ക ഗാന്ധി വദ്ര, ശിവസേന (യുബിടി) നേതാവ് സഞ്ജയ് റാവത്ത് എന്നിവർ ഉൾപ്പെടെയുള്ളവരെയാണ് പാർലമെന്റ് മന്ദിരത്തിന് പുറത്തുനിന്നും പോലീസ് കസ്റ്റഡിയിലെടുത്തത്. ഇലക്ഷൻ കമ്മീഷൻ ഓഫീസിലേക്ക് മാർച്ച് നടത്താൻ ശ്രമിച്ച പ്രതിപക്ഷ എംപിമാരെ പോലീസ് ബാരിക്കേഡുകൾ വെച്ച് തടയുകയായിരുന്നു.
ഇൻഡ്യ മുന്നണിയുടെ നേതൃത്വത്തിൽ നടന്ന പ്രതിഷേധം പാർലമെന്റിന് മുന്നിൽ സംഘർഷാവസ്ഥ സൃഷ്ടിച്ചു. പ്ലക്കാർഡുകളുമായി മുദ്രാവാക്യം വിളിച്ചും ബാരിക്കേഡുകൾ തള്ളിമാറ്റാൻ ശ്രമിച്ചും നേതാക്കൾ പ്രതിഷേധത്തിൽ പങ്കെടുത്തു. പ്രതിഷേധത്തിനിടെ തൃണമൂൽ എംപി മിതാലി ബാഗ് കുഴഞ്ഞുവീണത് നാടകീയ രംഗങ്ങൾക്ക് വഴിവെച്ചു. ഉടൻ തന്നെ രാഹുൽ ഗാന്ധി ഉൾപ്പെടെയുള്ളവർ സഹായത്തിനെത്തി.
ഇലക്ഷൻ കമ്മീഷനെതിരെ ഗുരുതരമായ ആരോപണങ്ങളാണ് പ്രതിപക്ഷം ഉയർത്തുന്നത്. വോട്ടർ പട്ടികയിൽ കൃത്രിമം നടത്തി ബിജെപിക്ക് വിജയം ഉറപ്പാക്കാൻ ശ്രമിക്കുന്നു എന്നാണ് പ്രധാന ആരോപണം. കഴിഞ്ഞ വർഷം നടന്ന മഹാരാഷ്ട്രാ തെരഞ്ഞെടുപ്പിന് പിന്നാലെയാണ് ഈ ആരോപണങ്ങൾ ശക്തമായത്. തെരഞ്ഞെടുപ്പിന് ശേഷം വോട്ടർ പട്ടികയിൽ അസ്വാഭാവികമായ രീതിയിൽ പുതിയ വോട്ടർമാരുടെ എണ്ണം വർധിച്ചത് പ്രതിപക്ഷം ചൂണ്ടിക്കാട്ടി. കർണാടക ലോക്‌സഭാ തെരഞ്ഞെടുപ്പുമായി ബന്ധപ്പെട്ടും സമാനമായ ആരോപണങ്ങൾ ഉയർന്നിട്ടുണ്ട്.
കഴിഞ്ഞയാഴ്ച ഇൻഡ്യ മുന്നണിയുടെ യോഗത്തിൽ രാഹുൽ ഗാന്ധി വോട്ടർ പട്ടികയിലെ ക്രമക്കേടുകൾ സംബന്ധിച്ച് വിവരങ്ങൾ അവതരിപ്പിച്ചിരുന്നു. വോട്ടർ പട്ടികയുടെ തിരയാൻ സാധിക്കുന്ന കരട് രൂപം പ്രസിദ്ധീകരിക്കാൻ തെരഞ്ഞെടുപ്പ് കമ്മീഷൻ തയ്യാറാകണം എന്നും അദ്ദേഹം ആവശ്യപ്പെട്ടിരുന്നു.
ബിഹാർ വോട്ടർ പട്ടികയിൽ തെരഞ്ഞെടുപ്പിന് തൊട്ടുമുമ്പ് നടത്തിയ ‘പ്രത്യേക തീവ്ര പുനഃപരിശോധന’യും (Special Intensive Revision) പ്രതിഷേധങ്ങൾക്ക് ആക്കം കൂട്ടി. ഈ നടപടി ചോദ്യം ചെയ്ത് സുപ്രീം കോടതിയിൽ ഹർജി നിലവിലുണ്ട്. യഥാർത്ഥ വോട്ടർമാരെ ഒഴിവാക്കാനാണ് ബിജെപി ഈ നീക്കം നടത്തിയതെന്ന് പ്രതിപക്ഷം ആരോപിക്കുന്നു.
അതേസമയം, ആരോപണങ്ങളെ ഇലക്ഷൻ കമ്മീഷൻ ശക്തമായി എതിർത്തു. തങ്ങളുടെ നടപടിക്രമങ്ങൾ സുതാര്യമാണെന്നും സ്വതന്ത്രവും നീതിയുക്തവുമായ തെരഞ്ഞെടുപ്പ് ഉറപ്പാക്കാനാണ് ശ്രമിക്കുന്നതെന്നും കമ്മീഷൻ വ്യക്തമാക്കി. രാഹുൽ ഗാന്ധിയുടെ ആരോപണങ്ങൾ തെളിയിക്കണമെന്നും രേഖാമൂലം സത്യവാങ്മൂലം സമർപ്പിക്കണമെന്നും കമ്മീഷൻ ആവശ്യപ്പെട്ടിരുന്നു
