ന്യൂഡൽഹി: രാജ്യത്തെ കേന്ദ്ര സർക്കാർ ജീവനക്കാർക്കിടയിൽ ഏറെ ചർച്ചയായ പഴയ പെൻഷൻ പദ്ധതി (OPS) പുനഃസ്ഥാപിക്കില്ലെന്ന് കേന്ദ്ര സർക്കാർ ലോക്സഭയിൽ അസന്നിഗ്ധമായി വ്യക്തമാക്കി. പഴയ പെൻഷൻ പദ്ധതി സർക്കാരിന് താങ്ങാനാകാത്ത സാമ്പത്തിക ബാധ്യതയുണ്ടാക്കുമെന്നും, അതിനാൽ അത്തരമൊരു നിർദ്ദേശം പരിഗണനയിലില്ലെന്നും ധനമന്ത്രി നിർമ്മല സീതാരാമൻ ഓഗസ്റ്റ് 11, തിങ്കളാഴ്ച സഭയെ അറിയിച്ചു.
ഇതിന് പകരമായി, ദേശീയ പെൻഷൻ പദ്ധതിക്ക് (NPS) കീഴിൽ കൂടുതൽ ആനുകൂല്യങ്ങൾ ഉറപ്പാക്കുന്ന ‘യൂണിഫൈഡ് പെൻഷൻ സ്കീം’ (UPS) എന്ന പുതിയ പദ്ധതി കേന്ദ്രം അവതരിപ്പിച്ചു.
2004 ജനുവരി 1-നോ അതിന് ശേഷമോ സർവീസിൽ പ്രവേശിച്ച കേന്ദ്ര സർക്കാർ ജീവനക്കാർക്കായി (സായുധ സേന ഒഴികെ) നിലവിൽ വന്നതാണ് ദേശീയ പെൻഷൻ പദ്ധതി (NPS). ഈ പദ്ധതിയിലെ ആനുകൂല്യങ്ങൾ മെച്ചപ്പെടുത്തുന്നതിനായി മുൻ ധനകാര്യ സെക്രട്ടറിയുടെ അധ്യക്ഷതയിൽ രൂപീകരിച്ച സമിതിയുടെ ശുപാർശകൾ പ്രകാരമാണ് പുതിയ യൂണിഫൈഡ് പെൻഷൻ സ്കീമിന് രൂപം നൽകിയത്. 2025 ജനുവരി 24-ലെ വിജ്ഞാപനത്തിലൂടെയാണ് ഈ പദ്ധതി അവതരിപ്പിച്ചത്.
എന്താണ് യൂണിഫൈഡ് പെൻഷൻ സ്കീം (UPS)?
പുതിയ പദ്ധതി പ്രകാരം, കുറഞ്ഞത് 25 വർഷത്തെ യോഗ്യതാ സേവനം പൂർത്തിയാക്കി വിരമിക്കുന്ന ജീവനക്കാരന്, വിരമിക്കുന്നതിന് തൊട്ടുമുൻപുള്ള 12 മാസത്തെ ശരാശരി അടിസ്ഥാന ശമ്പളത്തിന്റെ 50 ശതമാനം ഉറപ്പായ പെൻഷനായി ലഭിക്കും. 25 വർഷത്തിൽ താഴെയാണ് സർവീസ് എങ്കിൽ ആനുപാതികമായ പെൻഷൻ ആയിരിക്കും ലഭിക്കുക. ഇത് ജീവനക്കാർക്ക് വിരമിക്കൽ കാലത്ത് ഒരു നിശ്ചിത വരുമാനം ഉറപ്പാക്കുന്നു.
കൂടാതെ, സർവീസിലിരിക്കെ മരിക്കുകയോ, ശാരീരിക അവശതകൾ മൂലം ജോലിയിൽ നിന്ന് പിരിഞ്ഞുപോകേണ്ടി വരികയോ ചെയ്താൽ, നിലവിലെ സിസിഎസ് (പെൻഷൻ) ചട്ടങ്ങൾ പ്രകാരമുള്ള ആനുകൂല്യങ്ങൾ തിരഞ്ഞെടുക്കാനും യൂണിഫൈഡ് പെൻഷൻ സ്കീമിന് കീഴിൽ ജീവനക്കാർക്ക് അവസരമുണ്ടാകും. സർക്കാരിന്റെ സാമ്പത്തിക സ്ഥിരതയും ജീവനക്കാരുടെ ക്ഷേമവും ഒരുപോലെ ഉറപ്പാക്കുന്ന രീതിയിലാണ് പുതിയ പദ്ധതിയുടെ ഘടനയെന്നും ധനമന്ത്രി വിശദീകരിച്ചു.
ഇന്ത്യൻ ബാങ്കുകളുടെ ആസ്തി ഗുണമേന്മയിൽ ആശങ്കപ്പെടേണ്ട സാഹചര്യമില്ലെന്നും നിർമ്മല സീതാരാമൻ മറ്റൊരു ചോദ്യത്തിന് മറുപടിയായി പറഞ്ഞു. 2024 മാർച്ചിനും 2025 മാർച്ചിനും ഇടയിൽ റീട്ടെയിൽ വായ്പകളുടെ വളർച്ചാ നിരക്ക് 17.61 ശതമാനത്തിൽ നിന്ന് 14.05 ശതമാനമായി കുറഞ്ഞിട്ടുണ്ട്. ബാങ്കുകളുടെ മൊത്തം നിഷ്ക്രിയ ആസ്തി (NPA) 2025 മാർച്ചിൽ 1.18 ശതമാനം മാത്രമാണ്. ഇത് ബാങ്കിംഗ് മേഖലയുടെ സുസ്ഥിരതയെയാണ് കാണിക്കുന്നതെന്നും ധനമന്ത്രി കൂട്ടിച്ചേർത്തു.
