ചെന്നൈ: ഐപിഎൽ 2025 സീസണിലെ മോശം പ്രകടനത്തിന് പിന്നാലെ ടീം ഉടച്ചുവാർക്കാൻ ഒരുങ്ങി ചെന്നൈ സൂപ്പർ കിങ്സ് (സിഎസ്കെ). ആർ. അശ്വിൻ ഉൾപ്പെടെയുള്ള പ്രമുഖ താരങ്ങളെ ഒഴിവാക്കി ലേലത്തിനായി പണം കണ്ടെത്താനാണ് ടീം മാനേജ്മെന്റിന്റെ നീക്കം. അടുത്തിടെ ചെന്നൈയിൽ എം.എസ്. ധോണി, ക്യാപ്റ്റൻ റുതുരാജ് ഗെയ്ക്‌വാദ്, ടീം ഉടമകൾ എന്നിവർ നടത്തിയ കൂടിക്കാഴ്ചയിലാണ് ഈ നിർണായക തീരുമാനങ്ങൾ എടുത്തതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു.
പുറത്തേക്ക് പോകുന്നത് ആരെല്ലാം?
9.75 കോടി രൂപയ്ക്ക് ടീമിലെത്തിച്ച സീനിയർ ഓഫ് സ്പിന്നർ ആർ. അശ്വിനാണ് പുറത്തേക്ക് പോകാൻ സാധ്യതയുള്ളവരിൽ പ്രമുഖൻ. ഡെവോൺ കോൺവേ (6.25 കോടി), രചിൻ രവീന്ദ്ര (4 കോടി), രാഹുൽ ത്രിപാഠി (3.4 കോടി), സാം കറൻ (2.4 കോടി) തുടങ്ങിയ വിദേശ താരങ്ങളെയും ഒഴിവാക്കിയേക്കും. ഇവരെ ഒഴിവാക്കുന്നതിലൂടെ ഏകദേശം 34.45 കോടി രൂപ ടീമിന്റെ പഴ്‌സിൽ അധികമായി എത്തും. ഇതോടെ അടുത്ത മിനി ലേലത്തിൽ ഏകദേശം 40 കോടി രൂപയോളം സിഎസ്കെയ്ക്ക് ചെലവഴിക്കാൻ കഴിഞ്ഞേക്കും.
ടോപ് ഓർഡറിലെയും മധ്യനിരയിലെയും ബാറ്റിംഗ് പോരായ്മ പരിഹരിക്കാൻ ഒരു മികച്ച ഹിറ്റർ, ഒരു ഇന്ത്യൻ എൻഫോഴ്സർ, ഒരു മികച്ച പേസർ എന്നിവരെയാണ് ടീം പ്രധാനമായും ലക്ഷ്യമിടുന്നത്. ഓസ്‌ട്രേലിയൻ ഓൾറൗണ്ടർ കാമറൂൺ ഗ്രീൻ, ഇംഗ്ലീഷ് ഓപ്പണർ ബെൻ ഡക്കറ്റ് തുടങ്ങിയ താരങ്ങളെ ടീം നോട്ടമിടുന്നതായും റിപ്പോർട്ടുകളുണ്ട്.
സഞ്ജുവിനായി ശ്രമം, ധോണി തുടർന്നേക്കും
രാജസ്ഥാൻ റോയൽസ് വിടാനൊരുങ്ങുന്ന ക്യാപ്റ്റൻ സഞ്ജു സാംസണിൽ ചെന്നൈ സൂപ്പർ കിങ്സിന് താൽപര്യമുണ്ടെന്ന് ക്രിക്ക്ബസ് റിപ്പോർട്ട് ചെയ്തിരുന്നു. എന്നാൽ, ലേലത്തിന് മുൻപ് സഞ്ജുവിനെ ടീമിലെത്തിക്കുന്നത് എളുപ്പമാകില്ല. റുതുരാജ് ഗെയ്ക്‌വാദ്, രവീന്ദ്ര ജഡേജ, മതീഷ പതിരണ, ശിവം ദുബെ തുടങ്ങിയ പ്രധാന കളിക്കാരെ കൈമാറാൻ സിഎസ്കെയ്ക്ക് താൽപര്യമില്ല. പണം മാത്രം നൽകിയുള്ള ഒരു ഇടപാടാണ് സാധ്യമായ ഏക വഴിയെന്നും, അതിന് രാജസ്ഥാനെ സമ്മതിപ്പിക്കുന്നത് ശ്രമകരമായിരിക്കുമെന്നും റിപ്പോർട്ടുകൾ പറയുന്നു.
അതേസമയം, 45-കാരനായ എം.എസ്. ധോണി വിരമിക്കുന്നതിനെക്കുറിച്ച് സൂചനകളൊന്നും നൽകിയിട്ടില്ല. മോശം സീസണിന് ശേഷം ഒരു വർഷം കൂടി ധോണി ടീമിന്റെ ഭാഗമായി കളിക്കളത്തിലുണ്ടാകുമെന്നാണ് ഫ്രാഞ്ചൈസിയുടെ വിശ്വാസം.
