ദേശീയപാത 66: ഭൂമിയേറ്റെടുക്കാൻ സംസ്ഥാനം നൽകിയത് 7,117 കോടി; നിർമ്മാണ ചെലവ് 63,111 കോടി രൂപയെന്ന് നിതിൻ ഗഡ്കരി
ന്യൂ ഡൽഹി: കേരളത്തിന്റെ സ്വപ്ന പദ്ധതിയായ ദേശീയപാത 66-ന്റെ നിർമ്മാണത്തിനായി 63,111 കോടി രൂപയുടെ പദ്ധതികൾക്ക് അംഗീകാരം നൽകിയതായി കേന്ദ്ര സർക്കാർ. ഇതിൽ 40,216 കോടി രൂപ ഇതിനോടകം ചെലവഴിച്ചതായും കേന്ദ്ര ഉപരിതല ഗതാഗത, ഹൈവേ മന്ത്രി നിതിൻ ഗഡ്കരി ലോക്സഭയെ അറിയിച്ചു. പാതയുടെ നിർമ്മാണത്തിനായി സംസ്ഥാന സർക്കാർ ഫണ്ട് നൽകിയിട്ടില്ലെന്നും, എന്നാൽ ഭൂമിയേറ്റെടുക്കൽ ചെലവിന്റെ 25 ശതമാനമായ 7,117 കോടി രൂപ നൽകി നിർണായക പങ്കുവഹിച്ചതായും അദ്ദേഹം വ്യക്തമാക്കി.
ഷാഫി പറമ്പിൽ എം.പി ഉന്നയിച്ച ചോദ്യത്തിന് രേഖാമൂലം നൽകിയ മറുപടിയിലാണ് കേന്ദ്രമന്ത്രി ഇക്കാര്യങ്ങൾ വിശദീകരിച്ചത്. ദേശീയപാതകളുടെ നിർമ്മാണത്തിന്റെയും പരിപാലനത്തിന്റെയും പ്രാഥമിക ഉത്തരവാദിത്തം കേന്ദ്ര സർക്കാരിനാണെന്ന് മന്ത്രി മറുപടിയിൽ പറഞ്ഞു. ദേശീയപാതാ അതോറിറ്റി (NHAI), പൊതുമരാമത്ത് വകുപ്പുകൾ തുടങ്ങിയ വിവിധ ഏജൻസികൾ വഴിയാണ് നിർമ്മാണ പ്രവർത്തനങ്ങൾ നടത്തുന്നത്.
അതേസമയം, ഭൂമിയേറ്റെടുക്കൽ, അനുമതികൾ ലഭ്യമാക്കൽ, നിർമ്മാണത്തിന് മുൻപുള്ള മറ്റ് പ്രവർത്തനങ്ങൾ എന്നിവ സുഗമമാക്കേണ്ടത് സംസ്ഥാന സർക്കാരുകളുടെ ഉത്തരവാദിത്തമാണ്. ഈ ഉത്തരവാദിത്തത്തിന്റെ ഭാഗമായാണ് കേരള സർക്കാർ ഭൂമിയേറ്റെടുക്കൽ ചെലവിന്റെ നാലിലൊന്ന് വഹിച്ചത്.
കേരളത്തിൽ 632 കിലോമീറ്റർ ദൈർഘ്യത്തിലാണ് ദേശീയപാത 66 വികസിപ്പിക്കുന്നത്. സംസ്ഥാനത്തിന്റെ ഗതാഗതക്കുരുക്കിന് വലിയൊരളവിൽ പരിഹാരം കാണാനും സാമ്പത്തിക വളർച്ചയ്ക്കും പാതയുടെ പൂർത്തീകരണം അനിവാര്യമാണ്. കേന്ദ്ര-സംസ്ഥാന സർക്കാരുകളുടെ സംയുക്ത പ്രവർത്തനത്തിലൂടെയാണ് പദ്ധതി പുരോഗമിക്കുന്നത്.
