അങ്കമാലി-കുണ്ടന്നൂർ ബൈപ്പാസ്: ഡിപിആർ നടപടികൾക്ക് തുടക്കം; നിർമ്മാണത്തിന് ഇനിയും കാത്തിരിക്കണം
ന്യൂഡൽഹി: കൊച്ചി നഗരത്തിലെ ഗതാഗതക്കുരുക്ക് കുറയ്ക്കാൻ ലക്ഷ്യമിടുന്ന അങ്കമാലി-കുണ്ടന്നൂർ ബൈപ്പാസ് പദ്ധതിയുടെ വിശദമായ പദ്ധതി റിപ്പോർട്ട് (ഡിപിആർ) തയ്യാറാക്കുന്നതിനുള്ള നടപടികൾക്ക് കേന്ദ്ര സർക്കാർ തുടക്കം കുറിച്ചു. പാർലമെന്റിൽ ഹൈബി ഈഡൻ എംപിയുടെ ചോദ്യത്തിന് മറുപടിയായി കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരിയാണ് ഇക്കാര്യം അറിയിച്ചത്.
പദ്ധതിയുടെ അലൈൻമെന്റ്, സാധ്യത പഠനം, നിർമ്മാണത്തിന് മുന്നോടിയായുള്ള പ്രവർത്തനങ്ങൾ (ഭൂമി ഏറ്റെടുക്കൽ ഉൾപ്പെടെ) എന്നിവ ഡിപിആറിന്റെ ഭാഗമായി വിലയിരുത്തും. എന്നാൽ, ഡിപിആർ അന്തിമമാക്കുകയും മറ്റ് നിയമപരമായ അനുമതികൾ നേടുകയും ചെയ്ത ശേഷം മാത്രമേ നിർമ്മാണ പ്രവർത്തനങ്ങൾ ആരംഭിക്കാൻ സാധിക്കുകയുള്ളൂ എന്ന് മന്ത്രി വ്യക്തമാക്കി.
പദ്ധതിയുടെ നിർമ്മാണം ആരംഭിക്കുന്നത് ഡിപിആർ റിപ്പോർട്ട്, പ്രതീക്ഷിക്കുന്ന ഗതാഗതത്തിന്റെ അളവ്, സാങ്കേതിക-സാമ്പത്തിക സാധ്യത, പിഎം ഗതി ശക്തി ദേശീയ മാസ്റ്റർ പ്ലാനുമായുള്ള യോജിപ്പ്, മറ്റ് പദ്ധതികളുമായുള്ള മുൻഗണന എന്നിവയെ ആശ്രയിച്ചിരിക്കുമെന്നും കേന്ദ്രം അറിയിച്ചു. ഡിപിആർ പൂർത്തിയാകാത്തതിനാൽ നിർമ്മാണം എപ്പോൾ തുടങ്ങുമെന്നോ, എത്ര തുക ചെലവ് വരുമെന്നോ ഇപ്പോൾ പറയാനാവില്ലെന്നും മന്ത്രിയുടെ മറുപടിയിൽ പറയുന്നു.
ആലുവ, കളമശ്ശേരി, ഇടപ്പള്ളി, പാലാരിവട്ടം, വൈറ്റില തുടങ്ങിയ സ്ഥലങ്ങളിലെ ഗതാഗതക്കുരുക്ക് ഒഴിവാക്കി ദീർഘദൂര വാഹനങ്ങൾക്ക് കൊച്ചി നഗരത്തെ മറികടന്നുപോകാൻ ഈ ബൈപ്പാസ് സഹായിക്കും. പദ്ധതി വേഗത്തിലാക്കാൻ എന്തെങ്കിലും നടപടികൾ സ്വീകരിക്കുന്നുണ്ടോ എന്നും, എറണാകുളം ബൈപ്പാസ് എന്ന പേരുമാറ്റി കൊച്ചി ബൈപ്പാസ് എന്ന് പുനർനാമകരണം ചെയ്യുമോ എന്നുമുള്ള ഹൈബി ഈഡന്റെ ചോദ്യങ്ങൾക്ക്, ഡിപിആറിന് ശേഷമേ തുടർനടപടികൾ സാധ്യമാകൂ എന്നായിരുന്നു മന്ത്രിയുടെ സംയുക്ത മറുപടി.
