അത്രക്ക് തിരക്കൊന്നും ഒരു കളക്ടർക്കും ഇല്ല; ഒന്നര മണിക്കൂർ മതി ഫയലുകൾ തീർക്കാൻ – ‘കളക്ടർ ബ്രോ’ പ്രശാന്ത് നായർ
കൊച്ചി: “സാധാരണക്കാർ കരുതുന്നത് പോലെ ഒരു കളക്ടർക്ക് അത്ര വലിയ തിരക്കുകളൊന്നുമില്ല, ഒരു ദിവസത്തെ ഫയലുകൾ തീർപ്പാക്കാൻ ആത്മാർത്ഥമായി ശ്രമിച്ചാൽ ഒന്നര മണിക്കൂർ മതി,” – പറയുന്നത് ‘കളക്ടർ ബ്രോ’ എന്ന പേരിൽ പ്രശസ്തനായ ഐഎഎസ് ഉദ്യോഗസ്ഥൻ പ്രശാന്ത് നായർ. ഒരു അഭിമുഖത്തിലാണ് അദ്ദേഹം ഉദ്യോഗസ്ഥ ഭരണത്തിന്റെ ഉള്ളറകളെക്കുറിച്ച് തുറന്നുപറഞ്ഞത്.
കളക്ടറുടെ പ്രധാന ജോലി ഫയലുകളിൽ അഭിപ്രായം രേഖപ്പെടുത്തുകയും മീറ്റിംഗുകൾ ഏകോപിപ്പിക്കുകയുമാണെന്ന് അദ്ദേഹം പറയുന്നു. പലപ്പോഴും അനാവശ്യമായി നീണ്ടുപോകുന്ന മീറ്റിംഗുകളാണ് ഉദ്യോഗസ്ഥരുടെ സമയം കളയുന്നത്. കാര്യക്ഷമമായി മീറ്റിംഗുകൾ നടത്തിയാൽ ഉദ്യോഗസ്ഥർക്ക് ധാരാളം സമയം ലാഭിക്കാനാകും. ഈ സമയം ഉപയോഗിച്ച് പൊതുജനങ്ങളുമായി കൂടുതൽ ഇടപഴകാനും, സാധാരണക്കാരുടെ പ്രശ്നങ്ങൾ നേരിട്ട് മനസ്സിലാക്കാൻ ഫീൽഡ് വിസിറ്റുകൾ നടത്താനും സാധിക്കണമെന്നും പ്രശാന്ത് നായർ ഊന്നിപ്പറഞ്ഞു.
സമൂഹമാധ്യമങ്ങളെ ഒരു ഭരണനിർവഹണ ഉപാധിയായി എങ്ങനെ ഫലപ്രദമായി ഉപയോഗിക്കാമെന്നും അദ്ദേഹം തന്റെ അനുഭവങ്ങളിലൂടെ വിശദീകരിച്ചു. ഉദ്യോഗസ്ഥർ തങ്ങളുടെ കസേരകളിൽ ഒതുങ്ങിക്കൂടാതെ ജനങ്ങളിലേക്ക് ഇറങ്ങിച്ചെല്ലണമെന്ന സന്ദേശമാണ് പ്രശാന്ത് നായരുടെ വാക്കുകൾ നൽകുന്നത്.
