തിരുവനന്തപുരം: 2024-ലെ സംസ്ഥാന ചലച്ചിത്ര അവാർഡുകൾക്കായുള്ള കാത്തിരിപ്പിലാണ് മലയാള സിനിമാ ലോകം. ഇത്തവണ മികച്ച നടനുള്ള പുരസ്കാരത്തിനായി കടുത്ത മത്സരമാണ് നടക്കുന്നത്. മമ്മൂട്ടി, ഫഹദ് ഫാസിൽ, ആസിഫ് അലി, ടൊവിനോ തോമസ്, മോഹൻലാൽ, സൗബിൻ ഷാഹിർ എന്നിവരുടെയെല്ലാം മികച്ച പ്രകടനങ്ങൾ സാധ്യതാ ലിസ്റ്റിൽ ഇടംപിടിച്ചിട്ടുണ്ട്.
‘ഭ്രമയുഗം’ എന്ന ചിത്രത്തിലെ അസാമാന്യ പ്രകടനമാണ് മമ്മൂട്ടിയെ സാധ്യതാ പട്ടികയിൽ മുൻപന്തിയിൽ നിർത്തുന്നത്. പോയ വർഷത്തെ ഏറ്റവും മികച്ച ഹൊറർ ചിത്രങ്ങളിലൊന്നായി വിലയിരുത്തപ്പെടുന്ന ‘ഭ്രമയുഗ’ത്തിലെ മമ്മൂട്ടിയുടെ അഭിനയം ഏറെ പ്രശംസ പിടിച്ചുപറ്റിയിരുന്നു. ഇതിനൊപ്പം, ‘ആവേശം’ എന്ന ചിത്രത്തിലെ ‘രംഗ’ എന്ന കഥാപാത്രമായി തകർത്താടിയ ഫഹദ് ഫാസിലും ശക്തമായ വെല്ലുവിളി ഉയർത്തുന്നുണ്ട്.
‘കിഷ്കിന്ധാകാണ്ഡം’ എന്ന ചിത്രത്തിലെ പ്രകടനത്തിന് ആസിഫ് അലിയും വിജയരാഘവനും സാധ്യതാ ലിസ്റ്റിലുണ്ട്. ‘അജയന്റെ രണ്ടാം മോഷണ’ത്തിലെ ടൊവിനോ തോമസ്, ‘മലൈക്കോട്ടൈ വാലിബനി’ലെ മോഹൻലാൽ, ‘മഞ്ഞുമ്മൽ ബോയ്സി’ലെ സൗബിൻ ഷാഹിർ എന്നിവരും അവാർഡിനായി പരിഗണിക്കപ്പെടുന്നവരിൽ ഉൾപ്പെടുന്നു. അവാർഡ് പ്രഖ്യാപനം അടുക്കുമ്പോൾ ആർക്കായിരിക്കും പുരസ്കാരം എന്നറിയാനുള്ള ആകാംക്ഷയിലാണ് സിനിമാ പ്രേമികൾ.
