കൊച്ചിയിൽ നവജാത ശിശുവിനെ കൈമാറിയ സംഭവം; അമ്മയും ആൺസുഹൃത്തും അറസ്റ്റിൽ, പിന്നിൽ മാനഹാനി ഭയം

കൊച്ചി: എറണാകുളം ജില്ലയിൽ നവജാത ശിശുവിനെ വയോധികയ്ക്ക് കൈമാറി ഉപേക്ഷിച്ച സംഭവത്തിൽ ദുരൂഹത. ആലുവ സ്വദേശിനിയായ അമ്മയെയും ഇവരുടെ ആൺസുഹൃത്തിനെയും കളമശ്ശേരി പോലീസ് അറസ്റ്റ് ചെയ്തു. കുഞ്ഞിനെ അമ്മ അപായപ്പെടുത്താൻ സാധ്യതയുണ്ടെന്ന രഹസ്യ വിവരത്തിന്റെ അടിസ്ഥാനത്തിൽ നടത്തിയ അന്വേഷണത്തിലാണ് ഞെട്ടിക്കുന്ന സംഭവം പുറത്തുവന്നത്.

പോലീസ് നടപടി രഹസ്യവിവരത്തെ തുടർന്ന്

ഭർത്താവുമായി അകന്നു കഴിയുന്ന യുവതി, ആൺസുഹൃത്തായ ജോൺ തോമസുമായുള്ള ബന്ധത്തിൽ കഴിഞ്ഞ ജൂലൈ 26-ന് കളമശ്ശേരി മെഡിക്കൽ കോളേജ് ആശുപത്രിയിൽ ഒരു കുഞ്ഞിന് ജന്മം നൽകിയിരുന്നു. പ്രസവ ശേഷം കുഞ്ഞിനെ ഒഴിവാക്കാൻ ഇരുവരും തീരുമാനിച്ചു. കുഞ്ഞിനെ അപായപ്പെടുത്തിയേക്കുമെന്ന രഹസ്യവിവരം ലഭിച്ചതിനെ തുടർന്ന് പോലീസ് മുപ്പതടത്തെ ഒരു ഫ്ലാറ്റിലെത്തി യുവതിയെയും ജോൺ തോമസിനെയും കസ്റ്റഡിയിലെടുത്ത് ചോദ്യം ചെയ്യുകയായിരുന്നു.

ചോദ്യം ചെയ്യലിൽ, കുഞ്ഞിനെ മുപ്പതടത്തുള്ള ഒരു വീട്ടിലെ വയോധികയ്ക്ക് കൈമാറിയതായി ഇവർ സമ്മതിച്ചു. തുടർന്ന് ഇന്ന് പുലർച്ചയോടെ പോലീസ് ഈ വീട്ടിലെത്തി കുഞ്ഞിനെ സുരക്ഷിതമായി കണ്ടെത്തുകയായിരുന്നു.

മാനഹാനി ഭയന്ന് കുഞ്ഞിനെ ഉപേക്ഷിച്ചു

ഭർത്താവുമായി പിരിഞ്ഞു കഴിയുന്ന തനിക്ക് ഈ ബന്ധത്തിൽ കുഞ്ഞുണ്ടാകുന്നത് മാനക്കേടാണെന്ന് ഭയന്നാണ് കുഞ്ഞിനെ ഒഴിവാക്കാൻ ശ്രമിച്ചതെന്ന് യുവതി പോലീസിന് മൊഴി നൽകി. യുവതിക്ക് മറ്റ് രണ്ട് കുട്ടികൾ കൂടിയുണ്ട്.

സംഭവത്തിൽ യുവതിയെ ഒന്നാം പ്രതിയും ആൺസുഹൃത്ത് ജോൺ തോമസിനെ രണ്ടാം പ്രതിയുമാക്കി പോലീസ് കേസെടുത്തു. കൈമാറ്റത്തിന്റെ കൂടുതൽ വിവരങ്ങളെക്കുറിച്ചും ഇതിൽ സാമ്പത്തിക ഇടപാടുകൾ നടന്നിട്ടുണ്ടോ എന്നും പോലീസ് അന്വേഷിച്ചുവരികയാണ്.

പോലീസ് കണ്ടെത്തിയ കുഞ്ഞ് നിലവിൽ കളമശ്ശേരി മെഡിക്കൽ കോളേജ് ആശുപത്രിയിൽ വിദഗ്ദ്ധ ചികിത്സയിലാണ്. ആരോഗ്യപ്രശ്നങ്ങളുള്ള അമ്മയെ ചികിത്സയ്ക്ക് ശേഷം മഹിളാമന്ദിരത്തിലേക്ക് മാറ്റുമെന്നും പോലീസ് അറിയിച്ചു.