ന്യൂഡൽഹി: കേരളത്തിന്റെ ജലഗതാഗത വികസന സ്വപ്നങ്ങൾക്ക് തിരിച്ചടി. സംസ്ഥാനത്തെ പശ്ചിമതീര കനാൽ ബേക്കൽ മുതൽ കോവളം വരെ പൂർണ്ണമായി ദേശീയ ജലപാതയായി പ്രഖ്യാപിക്കണമെന്ന കേരളത്തിന്റെ ആവശ്യം കേന്ദ്ര സർക്കാർ തള്ളി. കോവളം-കൊല്ലം, കോഴിക്കോട്-ബേക്കൽ ഭാഗങ്ങൾ ദേശീയ ജലപാതയായി പ്രഖ്യാപിക്കാൻ നിലവിൽ സാധ്യമല്ലെന്ന് കേന്ദ്ര തുറമുഖ, ഷിപ്പിംഗ്, ജലപാത മന്ത്രി സർബാനന്ദ സോനോവാൾ ലോക്സഭയെ അറിയിച്ചു.
കെ. ഫ്രാൻസിസ് ജോർജ് എംപിയുടെ ചോദ്യത്തിന് രേഖാമൂലം നൽകിയ മറുപടിയിലാണ് കേന്ദ്ര സർക്കാർ നിലപാട് വ്യക്തമാക്കിയത്. തിരുവനന്തപുരം ആസ്ഥാനമായുള്ള നാഷണൽ ട്രാൻസ്പോർട്ട് പ്ലാനിംഗ് & റിസർച്ച് സെന്റർ (NATPAC) നടത്തിയ പഠനത്തിൽ ഈ ഭാഗങ്ങൾ ദേശീയ ജലപാതയായി പ്രഖ്യാപിക്കാൻ പര്യാപ്തമല്ലെന്ന് കണ്ടെത്തിയതിനാലാണ് നടപടിയെന്നും മന്ത്രിയുടെ മറുപടിയിൽ പറയുന്നു.
നിലവിൽ ദേശീയ ജലപാത-3 (NW-3), കൊല്ലം മുതൽ കോഴിക്കോട് വരെയുള്ള ഭാഗമാണ് ഉൾക്കൊള്ളുന്നത്. 2016-ലെ ദേശീയ ജലപാത നിയമപ്രകാരം കോട്ടപ്പുറം മുതൽ കോഴിക്കോട് വരെയുള്ള ഭാഗം നേരത്തെ തന്നെ NW-3 ന്റെ ഭാഗമായി വികസിപ്പിച്ചിരുന്നു. ഇതിന്റെ തുടർച്ചയായി കോഴിക്കോട് മുതൽ വടക്ക് ബേക്കൽ വരെയും, കൊല്ലം മുതൽ തെക്ക് കോവളം വരെയുമുള്ള ഭാഗങ്ങൾ കൂടി ദേശീയ ജലപാതയായി പ്രഖ്യാപിക്കണമെന്നായിരുന്നു കേരളം കേന്ദ്രത്തോട് ആവശ്യപ്പെട്ടത്.
ദേശീയ ജലപാതയായി പ്രഖ്യാപിക്കുന്നതോടെ, ജലപാതയുടെ വികസനത്തിനും പരിപാലനത്തിനുമുള്ള പൂർണ്ണ സാമ്പത്തിക സഹായം കേന്ദ്ര സർക്കാരിൽ നിന്ന് ലഭിക്കുമായിരുന്നു. കേന്ദ്രത്തിന്റെ പുതിയ തീരുമാനത്തോടെ, ഈ ഭാഗങ്ങളുടെ വികസനത്തിനുള്ള സാമ്പത്തിക ഭാരം സംസ്ഥാന സർക്കാർ തന്നെ വഹിക്കേണ്ടി വരും.
