16 വയസ്സിൽ താഴെയുള്ളവർക്ക് യൂട്യൂബ് വിലക്കേർപ്പെടുത്തി ഓസ്‌ട്രേലിയ
സിഡ്നി: കുട്ടികളുടെ മാനസികാരോഗ്യവും ഓൺലൈൻ സുരക്ഷയും മുൻനിർത്തി ലോകത്തിന് തന്നെ മാതൃകയാകുന്ന കടുത്ത നടപടിയുമായി ഓസ്‌ട്രേലിയ. 16 വയസ്സിൽ താഴെയുള്ള കുട്ടികൾക്ക് യൂട്യൂബ് അക്കൗണ്ടുകൾ ഉണ്ടാക്കുന്നതിന് ഓസ്‌ട്രേലിയൻ സർക്കാർ വിലക്കേർപ്പെടുത്തി. ഈ വരുന്ന ഡിസംബർ മുതൽ നിയമം പ്രാബല്യത്തിൽ വരും. ടിക് ടോക്, ഇൻസ്റ്റഗ്രാം, ഫേസ്ബുക്ക്, എക്സ് തുടങ്ങിയ പ്ലാറ്റ്‌ഫോമുകൾക്ക് നേരത്തെ തന്നെ ഏർപ്പെടുത്തിയ വിലക്കിന്റെ തുടർച്ചയായാണ് യൂട്യൂബിനെയും ഇപ്പോൾ ഉൾപ്പെടുത്തിയിരിക്കുന്നത്.
എന്തുകൊണ്ട് യൂട്യൂബും?
വീഡിയോ കാണാനുള്ള പ്ലാറ്റ്‌ഫോം എന്ന നിലയിൽ യൂട്യൂബിന് മുൻപ് ഇളവ് നൽകിയിരുന്നു. എന്നാൽ, ഓസ്‌ട്രേലിയയിലെ 10-നും 15-നും ഇടയിൽ പ്രായമുള്ള നാലിൽ മൂന്ന് കുട്ടികളും യൂട്യൂബ് സ്ഥിരമായി ഉപയോഗിക്കുന്നുണ്ടെന്നും, ഓൺലൈനിൽ മോശം ഉള്ളടക്കങ്ങൾ കാണേണ്ടി വന്ന 37% കുട്ടികളും അത് കണ്ടത് യൂട്യൂബിലാണെന്നും ഇ-സേഫ്റ്റി കമ്മീഷണറുടെ റിപ്പോർട്ടിൽ കണ്ടെത്തി. ഇതോടെയാണ് യൂട്യൂബിനെയും വിലക്കിന്റെ പരിധിയിൽ കൊണ്ടുവരാൻ സർക്കാർ തീരുമാനിച്ചത്.
വിലക്ക് എങ്ങനെ?
പുതിയ നിയമപ്രകാരം, 16 വയസ്സിൽ താഴെയുള്ള കുട്ടികൾക്ക് യൂട്യൂബിൽ സ്വന്തമായി അക്കൗണ്ട് ഉണ്ടാക്കാനോ, വീഡിയോകൾ പോസ്റ്റ് ചെയ്യാനോ, കമന്റ് ചെയ്യാനോ, വ്യക്തിഗത ശുപാർശകൾ (personalised recommendations) ലഭിക്കാനോ കഴിയില്ല. എന്നാൽ, അക്കൗണ്ട് ഇല്ലാതെ തന്നെ വീഡിയോകൾ കാണുന്നതിന് തടസ്സമുണ്ടാകില്ല.
“സോഷ്യൽ മീഡിയ സമൂഹത്തിന് ദോഷം ചെയ്യുന്നുണ്ടെന്ന് ഞങ്ങൾക്കറിയാം. ഓസ്‌ട്രേലിയയിലെ കുട്ടികളെ സംരക്ഷിക്കാൻ എന്റെ സർക്കാർ നടപടിയെടുക്കാൻ തയ്യാറാണ്,” എന്ന് പ്രധാനമന്ത്രി ആന്റണി അൽബനീസ് വ്യക്തമാക്കി. സൈബർ ഭീഷണി, പ്രായത്തിന് അനുയോജ്യമല്ലാത്ത ഉള്ളടക്കങ്ങൾ, മാനസികാരോഗ്യ പ്രശ്നങ്ങൾ എന്നിവയിൽ നിന്ന് കുട്ടികളെ സംരക്ഷിക്കുകയാണ് ഈ നിയമത്തിലൂടെ ലക്ഷ്യമിടുന്നത്. ഓസ്‌ട്രേലിയയുടെ ഈ ധീരമായ നീക്കം, മറ്റ് രാജ്യങ്ങൾക്കും ഡിജിറ്റൽ സുരക്ഷാ രംഗത്ത് കർശനമായ നിയമങ്ങൾ കൊണ്ടുവരാൻ പ്രചോദനമായേക്കും.
