കൊച്ചി: താരസംഘടനയായ ‘അമ്മ’യിലെ തിരഞ്ഞെടുപ്പ് പോരാട്ടം വ്യക്തിപരമായ ആരോപണ പ്രത്യാരോപണങ്ങളിലേക്ക് നീങ്ങുന്നു. പ്രസിഡന്റ് സ്ഥാനത്തേക്ക് മത്സരിക്കുന്ന ജഗദീഷിനും, ജനറൽ സെക്രട്ടറി സ്ഥാനത്തേക്ക് മത്സരിക്കുന്ന ബാബുരാജിനും എതിരെ രൂക്ഷ വിമർശനവുമായി രംഗത്തെത്തിയിരിക്കുകയാണ് നടി മാലാ പാർവതി. ബാബുരാജ് ആരോപണ വിധേയനായതിനാൽ മത്സരത്തിൽ നിന്ന് മാറിനിൽക്കുന്ന ‘മര്യാദ’ കാണിക്കണമെന്നും, ജഗദീഷിന്റെ ‘ഹീറോ ഇമേജ്’ പൊതുസമൂഹത്തിന് മുന്നിൽ മാത്രമാണെന്നും മാലാ പാർവതി ഒരു അഭിമുഖത്തിൽ പറഞ്ഞു.
ബാബുരാജിനെതിരെ
“ദിലീപ്, വിജയ് ബാബു, സിദ്ദിഖ് തുടങ്ങിയവർ ആരോപണങ്ങൾ നേരിട്ടപ്പോൾ സംഘടനയുടെ അന്തസ്സ് കാക്കാൻ മാറിനിന്നിട്ടുണ്ട്. അതൊരു മാതൃകയാണ്. ആ സമയത്ത് ബാബുരാജ് മാറിനിൽക്കാൻ തയ്യാറാകാത്തതുകൊണ്ടാണ് മോഹൻലാൽ പ്രസിഡന്റ് സ്ഥാനം രാജിവെക്കാൻ തീരുമാനിച്ചതെന്നാണ് ഞാൻ മനസിലാക്കുന്നത്. സംഘടനയെ പ്രതിസന്ധിയിലാക്കാതെ മാറിനിൽക്കുകയായിരുന്നു അദ്ദേഹം ചെയ്യേണ്ടിയിരുന്നത്,” മാലാ പാർവതി പറഞ്ഞു.
ജഗദീഷിനെതിരെ
“ജഗദീഷിന് പൊതുസമൂഹത്തിൽ ഒരു ഹീറോ ഇമേജുണ്ട്. എന്നാൽ ‘അമ്മ’യിലെ അംഗങ്ങൾക്കിടയിൽ അഭിപ്രായം മറിച്ചാണ്. സിദ്ദിഖിന്റെ വിഷയമുണ്ടായപ്പോൾ, മാധ്യമങ്ങളെ കാണേണ്ട എന്ന് ആദ്യം ഉപദേശിച്ചത് ജഗദീഷാണ്. എന്നാൽ രണ്ട് ദിവസം കഴിഞ്ഞപ്പോൾ, ‘ഇവർക്ക് വായില്ലേ’ എന്ന് ചോദിച്ച് അദ്ദേഹം തന്നെ പരസ്യമായി തള്ളിപ്പറഞ്ഞു. ഈ ‘വാക്കുമാറ്റം’ അറിയാവുന്നതുകൊണ്ട്, സംഘടനയ്ക്കുള്ളിൽ വലിയൊരു വിഭാഗം അദ്ദേഹത്തിനെതിരെ പ്രചാരണം നടത്തുന്നുണ്ട്,” മാലാ പാർവതി വെളിപ്പെടുത്തി.
ഇത്തവണ മത്സരിക്കുന്ന പലരും എല്ലാ അംഗങ്ങൾക്കും ഒരുപോലെ സ്വീകാര്യരല്ലെന്നും, ഇടവേള ബാബു, വിജയരാഘവൻ, കുഞ്ചാക്കോ ബോബൻ തുടങ്ങിയ പൊതുസമ്മതരായവർ മത്സരത്തിനില്ലാത്തതിൽ പലർക്കും നിരാശയുണ്ടെന്നും അവർ കൂട്ടിച്ചേർത്തു. അംഗങ്ങൾ വോട്ട് ചെയ്ത് തിരഞ്ഞെടുക്കുന്ന ആരുമായും സഹകരിക്കുമെന്നും അവർ വ്യക്തമാക്കി. മാലാ പാർവതിയുടെ ഈ തുറന്നുപറച്ചിൽ ‘അമ്മ’ തിരഞ്ഞെടുപ്പിലെ ചേരിപ്പോര് കൂടുതൽ ശക്തമാക്കുകയാണ്.
