ആകാശത്ത് ഇന്ത്യൻ കരുത്ത്! ഡ്രോണിൽ നിന്ന് മിസൈൽ വിക്ഷേപിച്ച് ഡിആർഡിഒ; പ്രതിരോധ രംഗത്ത് ചരിത്രനേട്ടം
ന്യൂഡൽഹി: ഇന്ത്യൻ പ്രതിരോധ ഗവേഷണ രംഗത്ത് നിർണായക നാഴികക്കല്ല് പിന്നിട്ട് ഡിആർഡിഒ (DRDO). ഡ്രോണിൽ (UAV) നിന്ന് വിക്ഷേപിക്കാവുന്ന, കൃത്യമായി ലക്ഷ്യം ഭേദിക്കാൻ ശേഷിയുള്ള മിസൈൽ (ULPGM-V3) ഇന്ത്യ വിജയകരമായി പരീക്ഷിച്ചു. ആന്ധ്രാപ്രദേശിലെ കുർണൂലിലുള്ള നാഷണൽ ഓപ്പൺ എയർ റേഞ്ചിൽ (NOAR) നടന്ന പരീക്ഷണം ഇന്ത്യൻ സൈന്യത്തിന്റെ ആക്രമണശേഷിക്ക് വലിയ മുതൽക്കൂട്ടാകും.
പ്രതിരോധ മന്ത്രി രാജ്‌നാഥ് സിംഗ് എക്സിലൂടെ ഡിആർഡിഒയെയും ഈ പദ്ധതിയിൽ പങ്കാളികളായ മറ്റ് വ്യവസായ സ്ഥാപനങ്ങളെയും അഭിനന്ദിച്ചു. “ഇന്ത്യയുടെ പ്രതിരോധ ശേഷിക്ക് ഇതൊരു വൻ കുതിപ്പാണ്. നിർണായകമായ പ്രതിരോധ സാങ്കേതികവിദ്യകൾ വികസിപ്പിക്കാനും സ്വാംശീകരിക്കാനും ഇന്ത്യൻ വ്യവസായ രംഗം സജ്ജമാണെന്ന് ഈ വിജയം തെളിയിക്കുന്നു,” എന്ന് അദ്ദേഹം കുറിച്ചു.
In a major boost to India’s defence capabilities, @DRDO_India has successfully carried out flight trials of UAV Launched Precision Guided Missile (ULPGM)-V3 in the National Open Area Range (NOAR), test range in Kurnool, Andhra Pradesh.
Congratulations to DRDO and the industry… pic.twitter.com/KR4gzafMoQ— Rajnath Singh (@rajnathsingh) July 25, 2025
എന്താണ് ULPGM-V3?
വിവിധതരം പോർമുനകൾ വഹിക്കാൻ ശേഷിയുള്ള ULPGM-V2 മിസൈലിന്റെ ഏറ്റവും പുതിയതും അത്യാധുനികവുമായ പതിപ്പാണ് ഇപ്പോൾ പരീക്ഷിച്ച V3. ഭാരം കുറഞ്ഞ ഈ മിസൈലുകൾ ഡ്രോണുകളിൽ ഘടിപ്പിച്ച് അതിർത്തികളിൽ നിന്നും കിലോമീറ്ററുകൾ അകലെയുള്ള ശത്രുലക്ഷ്യങ്ങളെ അതീവ കൃത്യതയോടെ തകർക്കാൻ സഹായിക്കും. ഇമേജിംഗ് ഇൻഫ്രാറെഡ് (IIR) സീക്കർ പോലുള്ള സംവിധാനങ്ങൾ ശത്രുവിന്റെ കണ്ണുവെട്ടിച്ച് ലക്ഷ്യം കണ്ടെത്താൻ സഹായിക്കുന്നു.
ഡ്രോൺ ഉപയോഗിക്കുന്നതിനാൽ പൈലറ്റുമാരുടെ ജീവൻ അപകടത്തിലാക്കാതെ തന്നെ തന്ത്രപ്രധാനമായ സൈനിക നീക്കങ്ങൾ നടത്താൻ സാധിക്കുമെന്നതാണ് ഇതിന്റെ പ്രധാന നേട്ടം. ‘ആത്മനിർഭർ ഭാരത്’ പദ്ധതിയുടെ ഭാഗമായി പൂർണ്ണമായും തദ്ദേശീയമായി വികസിപ്പിച്ച ഈ മിസൈൽ, ഇന്ത്യൻ പ്രതിരോധ രംഗത്തെ സ്വാശ്രയത്വത്തിലേക്കുള്ള വലിയ ചുവടുവെപ്പാണ്. അടുത്തിടെ ലേസർ ആയുധങ്ങൾ വിജയകരമായി പരീക്ഷിച്ച കുർണൂൽ ടെസ്റ്റ് റേഞ്ച്, ഇന്ത്യയുടെ ഹൈ-ടെക് ആയുധ പരീക്ഷണങ്ങളുടെ പ്രധാന കേന്ദ്രമായി മാറുകയാണ്.
