ഇന്ത്യൻ മിഗ്-21: നാല് തലമുറയിലെ യുദ്ധവിമാനങ്ങളെ വെടിവെച്ചിട്ട ഒരേയൊരു പോരാളി

ന്യൂഡൽഹി: ഇന്ത്യൻ വ്യോമസേനയിൽ നിന്ന് വിരമിക്കാൻ ഒരുങ്ങുന്ന മിഗ്-21 യുദ്ധവിമാനങ്ങൾ വ്യോമയാന ചരിത്രത്തിൽ മറ്റാർക്കും അവകാശപ്പെടാനാകാത്ത ഒരു റെക്കോർഡിന് ഉടമയാണ്. ഒന്നാം തലമുറ മുതൽ നാലാം തലമുറ വരെയുള്ള യുദ്ധവിമാനങ്ങളെ ആകാശയുദ്ധത്തിൽ വിജയകരമായി വെടിവെച്ചിട്ട ചരിത്രത്തിലെ ഒരേയൊരു ജെറ്റ് വിമാനമാണിത്. പാകിസ്താൻ വ്യോമസേനയുടെ വിമാനങ്ങൾക്കെതിരെയാണ് മിഗ്-21 ഈ ചരിത്രപരമായ നേട്ടങ്ങളെല്ലാം കൈവരിച്ചത്.

62 വർഷത്തെ സേവനത്തിന് ശേഷം ഇന്ത്യൻ വ്യോമസേനയുടെ ‘പറക്കും ശവപ്പെട്ടി’ എന്ന് ദുഷ്പേരുള്ള ഈ ഇതിഹാസ വിമാനം വിടവാങ്ങുമ്പോൾ, അതിന്റെ പോരാട്ട വീര്യത്തിന്റെ കഥകൾക്ക് വലിയ പ്രസക്തിയുണ്ട്.

ഒന്നാം തലമുറ: എഫ്-86 സാബർ

1940-കളുടെ അവസാനത്തിൽ പുറത്തിറങ്ങിയ ഒന്നാം തലമുറ ജെറ്റ് ഫൈറ്ററായ എഫ്-86 സാബർ, 1965, 1971 യുദ്ധങ്ങളിൽ പാകിസ്താന്റെ പ്രധാന കരുത്തായിരുന്നു. എന്നാൽ, 1971-ലെ യുദ്ധത്തിൽ, ഇന്ത്യൻ മിഗ്-21 വിമാനങ്ങൾ നിരവധി സാബർ വിമാനങ്ങളെ വെടിവെച്ചിട്ടു.

രണ്ടാം തലമുറ: എഫ്-104 സ്റ്റാർഫൈറ്റർ & മിഗ്-19

1971-ലെ യുദ്ധത്തിൽ തന്നെ, അക്കാലത്തെ അത്യാധുനിക രണ്ടാം തലമുറ വിമാനങ്ങളായ എഫ്-104 സ്റ്റാർഫൈറ്ററിനെയും, ചൈനീസ് ലൈസൻസിൽ പാകിസ്താൻ ഉപയോഗിച്ചിരുന്ന മിഗ്-19നെയും (എഫ്-6) ഇന്ത്യൻ മിഗ്-21 വിമാനങ്ങൾ തകർത്തു.

മൂന്നാം തലമുറ: മിറാഷ് III

1971 ഡിസംബർ 9-ന്, കശ്മീരിലെ പൂഞ്ചിൽ വെച്ച് സ്ക്വാഡ്രൺ ലീഡർ സിന്ധഘട്ട സുബ്ബരാമു പറത്തിയ മിഗ്-21എഫ്എൽ വിമാനം, പാകിസ്താന്റെ മൂന്നാം തലമുറ വിമാനമായ മിറാഷ് III-നെ രണ്ട് കെ-13 മിസൈലുകൾ ഉപയോഗിച്ച് തകർത്തു.

നാലാം തലമുറ: എഫ്-16 ഫൈറ്റിംഗ് ഫാൽക്കൺ

മിഗ്-21-ന്റെ പോരാട്ട ചരിത്രത്തിലെ ഏറ്റവും തിളക്കമുള്ള ഏടാണ് 2019 ഫെബ്രുവരിയിൽ വിംഗ് കമാൻഡർ അഭിനന്ദൻ വർദ്ധമാൻ പാകിസ്താന്റെ നാലാം തലമുറ യുദ്ധവിമാനമായ എഫ്-16നെ വെടിവെച്ചിട്ടത്. സാങ്കേതികമായി ഏറെ പിന്നിലുള്ള മിഗ്-21 ബൈസൺ വിമാനം ഉപയോഗിച്ചായിരുന്നു ഈ ചരിത്രനേട്ടം. ആർ-73 എയർ-ടു-എയർ മിസൈൽ ഉപയോഗിച്ചായിരുന്നു ആക്രമണം.

1950-കളിലെ വിമാനങ്ങൾ മുതൽ 21-ാം നൂറ്റാണ്ടിലെ ആധുനിക പോർവിമാനങ്ങൾ വരെ, നാല് തലമുറയിലെ യുദ്ധവിമാനങ്ങൾക്കെതിരെ വിജയം നേടിയ മിഗ്-21, ഇന്ത്യൻ വ്യോമസേനയുടെ ചരിത്രത്തിലെ ഒരു യഥാർത്ഥ ഇതിഹാസമായാണ് ഓർമ്മിക്കപ്പെടുക.