ഇന്ത്യക്കാർക്ക് റഷ്യയിലേക്ക് സ്വാഗതം; 10 ലക്ഷം വിദഗ്ധ തൊഴിലാളികളെ ക്ഷണിച്ച് റഷ്യ, കാരണം ഇതാണ്

മോസ്കോ: കടുത്ത തൊഴിലാളി ക്ഷാമം നേരിടുന്ന റഷ്യ, അത് മറികടക്കാൻ ഇന്ത്യയിൽ നിന്ന് 10 ലക്ഷത്തോളം (1 മില്യൺ) വിദഗ്ധ തൊഴിലാളികളെ ക്ഷണിക്കുന്നു. 2025 അവസാനത്തോടെ ഇന്ത്യയിൽ നിന്നുള്ള തൊഴിലാളികളെ രാജ്യത്തെത്തിക്കാനാണ് പദ്ധതിയെന്ന് റഷ്യയിലെ പ്രമുഖ വ്യവസായ സംഘടനയുടെ തലവൻ വ്യക്തമാക്കി. യുക്രൈൻ യുദ്ധത്തെ തുടർന്ന് സൈനിക മേഖലയിലേക്കും മറ്റും തൊഴിലാളികളെ വിന്യസിച്ചതും, യുവാക്കൾ ഫാക്ടറി ജോലികളോട് വിമുഖത കാണിക്കുന്നതുമാണ് റഷ്യയിൽ വലിയ തോതിലുള്ള തൊഴിലാളി ക്ഷാമത്തിന് കാരണമായത്.

യുറാൽ ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രി മേധാവി ആന്ദ്രേ ബെസെഡിനാണ് റഷ്യൻ വാർത്താ ഏജൻസിയായ ആർബിസിയോട് ഇക്കാര്യം വെളിപ്പെടുത്തിയത്.

പ്രധാന ലക്ഷ്യം വ്യാവസായിക മേഖല

റഷ്യയുടെ വ്യാവസായിക, സൈനിക-വ്യാവസായിക മേഖലകളിലെ ഒഴിവുകൾ നികത്താനാണ് പ്രധാനമായും ഇന്ത്യൻ തൊഴിലാളികളെ എത്തിക്കുന്നത്. യുറാൽ പർവതനിരകളിലുള്ള സ്വെർഡ്ലോവ്സ്ക് പോലുള്ള വ്യവസായ കേന്ദ്രങ്ങളിലേക്കായിരിക്കും നിയമനം. ലോകപ്രശസ്തമായ ടി-90 ടാങ്കുകൾ നിർമ്മിക്കുന്ന യുറാൽ വാഗൺ സാവോദ് പോലുള്ള ഭീമൻ കമ്പനികൾ ഇവിടെയാണ് പ്രവർത്തിക്കുന്നത്.

ഈ വിഷയങ്ങൾ കൈകാര്യം ചെയ്യുന്നതിനായി, യെക്കാറ്റെറിൻബർഗിൽ പുതിയൊരു ഇന്ത്യൻ കോൺസുലേറ്റ് ജനറൽ തുറക്കുമെന്നും ആന്ദ്രേ ബെസെഡിൻ പറഞ്ഞു.

തൊഴിലാളി ക്ഷാമം രൂക്ഷം

2024-ൽ തന്നെ റഷ്യയിലെ ചില വ്യവസായ ശാലകളിലേക്ക് ഇന്ത്യൻ തൊഴിലാളികൾ എത്തിത്തുടങ്ങിയിരുന്നു. 2030-ഓടെ റഷ്യയിൽ 31 ലക്ഷം തൊഴിലാളികളുടെ കുറവുണ്ടാകുമെന്ന് റഷ്യൻ തൊഴിൽ മന്ത്രാലയം മുൻപ് പ്രവചിച്ചിരുന്നു. ശ്രീലങ്ക, ഉത്തര കൊറിയ തുടങ്ങിയ രാജ്യങ്ങളിൽ നിന്നും തൊഴിലാളികളെ എത്തിക്കാൻ ആലോചിക്കുന്നുണ്ടെങ്കിലും, ഇന്ത്യയിൽ നിന്നുള്ള വിദഗ്ധ തൊഴിലാളികൾക്കാണ് റഷ്യ മുൻഗണന നൽകുന്നത്.

മോസ്കോയിലെ ക്രോക്കസ് സിറ്റി ഹാളിലുണ്ടായ ഭീകരാക്രമണത്തെ തുടർന്ന് മുൻ സോവിയറ്റ് റിപ്പബ്ലിക്കുകളിൽ നിന്നുള്ള കുടിയേറ്റക്കാർക്ക് റഷ്യ നിയന്ത്രണങ്ങൾ കടുപ്പിച്ചിരുന്നു. ഈ സാഹചര്യത്തിലാണ് ഇന്ത്യയിൽ നിന്നുള്ള തൊഴിലാളികൾക്ക് വലിയ അവസരം തുറന്നുകിട്ടുന്നത്.