തിരുവനന്തപുരം: സംസ്ഥാനത്തെ അഴിമതിക്കേസുകൾ അന്വേഷിക്കുന്ന വിജിലൻസ് ആൻഡ് ആന്റി കറപ്ഷൻ ബ്യൂറോയെ പൂർണ്ണമായും വിവരാവകാശ നിയമത്തിന്റെ പരിധിയിൽ നിന്ന് ഒഴിവാക്കാൻ സർക്കാർ നീക്കം. എഡിഎം നവീൻ ബാബുവിന്റെ ആത്മഹത്യ, തൃശൂർ പൂരം അലങ്കോലമാക്കിയത് അടക്കമുള്ള വിവാദ കേസുകളിലെ വിവരങ്ങൾ വിവരാവകാശ നിയമപ്രകാരം പൊതുജനങ്ങൾ ആവശ്യപ്പെടുന്നത് വർധിച്ച സാഹചര്യത്തിലാണ് ഈ സുപ്രധാന നീക്കം.
വിജിലൻസ് അന്വേഷിക്കുന്ന കേസുകളുടെ വിവരങ്ങൾ പുറത്തുപോകുന്നതിൽ ചില മന്ത്രിമാർക്ക് അതൃപ്തിയുണ്ടായിരുന്നതായും, ഇതാണ് പെട്ടെന്നുള്ള തീരുമാനത്തിന് പിന്നിലെന്നും സൂചനയുണ്ട്.
രഹസ്യമാക്കാനുള്ള തിരക്കിട്ട നീക്കം
കഴിഞ്ഞ ജനുവരി 11-ന് വിജിലൻസ് ഡയറക്ടർ ആഭ്യന്തര അഡീഷണൽ ചീഫ് സെക്രട്ടറിക്ക് നൽകിയ കത്തിന്റെ അടിസ്ഥാനത്തിലാണ് നടപടികൾ ആരംഭിച്ചത്. വിവരാവകാശ നിയമത്തിലെ സെക്ഷൻ 24 പ്രകാരം വിജിലൻസിനെ ഒഴിവാക്കി വിജ്ഞാപനം പുറപ്പെടുവിക്കണമെന്നായിരുന്നു കത്തിലെ ആവശ്യം. ഈ ഫയൽ നിലവിൽ നിയമവകുപ്പിന്റെ പരിഗണനയിലാണ്. സാധാരണയായി, ഇത്തരം തീരുമാനങ്ങൾ എടുക്കുന്നതിന് മുൻപ് വിവരാവകാശ കമ്മീഷന്റെ അഭിപ്രായം തേടണമെന്നുണ്ട്, എന്നാൽ സർക്കാർ അതിന് മുതിർന്നിട്ടില്ല.
തൃശൂർ പൂരം റിപ്പോർട്ടും പുറത്തറിയില്ല
തൃശൂർ പൂരം അലങ്കോലമായതുമായി ബന്ധപ്പെട്ട് സംസ്ഥാന പോലീസ് മേധാവി സമർപ്പിച്ച റിപ്പോർട്ട് പുറത്തുവിടാൻ കഴിയില്ലെന്ന് സർക്കാർ കഴിഞ്ഞ ദിവസം വ്യക്തമാക്കിയിരുന്നു. രഹസ്യ വിവരങ്ങളുണ്ടെന്ന് ചൂണ്ടിക്കാട്ടിയാണ് വിവരാവകാശ നിയമപ്രകാരം റിപ്പോർട്ട് നൽകാൻ കഴിയില്ലെന്ന് ആഭ്യന്തര വകുപ്പ് മറുപടി നൽകിയത്. ഇതിന് പിന്നാലെയാണ് വിജിലൻസിനെയും പൂർണ്ണമായി നിയമത്തിന്റെ പരിധിയിൽ നിന്ന് ഒഴിവാക്കാനുള്ള നീക്കം.
വിവരാവകാശത്തിൽ നിന്ന് ഒഴിവാക്കിയ മറ്റ് സ്ഥാപനങ്ങൾ
ഇന്റലിജൻസ് ബ്യൂറോ, സിബിഐ, എൻഐഎ, എൻഫോഴ്സ്മെന്റ് ഡയറക്ടറേറ്റ്, ജിഎസ്ടി ഇന്റലിജൻസ്, ക്രൈംബ്രാഞ്ച് തുടങ്ങിയ നിരവധി സുപ്രധാന ഏജൻസികളെ നേരത്തെ തന്നെ വിവരാവകാശ നിയമത്തിൽ നിന്ന് ഒഴിവാക്കിയിട്ടുണ്ട്. ഈ പട്ടികയിലേക്കാണ് വിജിലൻസിനെയും ഉൾപ്പെടുത്താൻ സർക്കാർ ശ്രമിക്കുന്നത്. ഈ നീക്കം അഴിമതി കേസുകളിലെ സുതാര്യതയെ സാരമായി ബാധിക്കുമെന്ന ആശങ്ക ശക്തമാണ്.
