ആകാശ് മിസൈൽ വേണ്ട; ഇന്ത്യയുമായുള്ള ചർച്ചകൾ ബ്രസീൽ നിർത്തി, തുർക്കിക്ക് സന്തോഷം, കാരണമിതാണ്

ന്യൂഡൽഹി: ഇന്ത്യയുടെ അഭിമാനമായ ആകാശ് വ്യോമ പ്രതിരോധ മിസൈൽ സംവിധാനം വാങ്ങാനുള്ള ചർച്ചകളിൽ നിന്ന് ബ്രസീൽ പിന്മാറി. ഇന്ത്യയും തുർക്കിയും തമ്മിൽ വളർന്നുവരുന്ന പ്രതിരോധ രംഗത്തെ മത്സരത്തിൽ, ഈ പിന്മാറ്റം ഇന്ത്യക്ക് ഒരു തിരിച്ചടിയായി. ഇന്ത്യ മിസൈലിന്റെ പഴയ പതിപ്പാണ് ബ്രസീലിന് വാഗ്ദാനം ചെയ്തതെന്നും, ഇത് കാലഹരണപ്പെട്ടതാണെന്ന് കണ്ടെത്തിയതിനാലാണ് ബ്രസീൽ പിന്മാറിയതെന്നും ടർക്കിഷ് മാധ്യമങ്ങൾ റിപ്പോർട്ട് ചെയ്തു.

“തുർക്കി നിർമ്മിത ഡ്രോണുകളെ വെടിവെച്ചിടാൻ ശേഷിയുണ്ടെന്ന വാഗ്ദാനത്തോടെ അർമേനിയക്ക് വിറ്റ ആകാശ് മിസൈൽ സംവിധാനം ബ്രസീലിൽ പരാജയപ്പെട്ടു,” എന്ന് ടർക്കിഷ് വെബ്സൈറ്റായ ടിആർഹാർബർ റിപ്പോർട്ട് ചെയ്തു. ഈ വാർത്തയ്ക്ക് പിന്നാലെയാണ് ബ്രസീലിന്റെ പിന്മാറ്റം.

തുർക്കിയുടെ തന്ത്രപരമായ നീക്കം

ഇന്ത്യയുമായുള്ള ചർച്ചകൾ പരാജയപ്പെട്ട സാഹചര്യത്തിൽ, തുർക്കിഷ് പ്രതിരോധ സംവിധാനങ്ങൾ വാങ്ങാനാണ് ബ്രസീൽ ഇപ്പോൾ ആലോചിക്കുന്നത്. ബ്രസീലിയൻ വിമാന നിർമ്മാതാക്കളായ എംബ്രയറുമായി തുർക്കിക്ക് ധാരണാപത്രമുണ്ട്. “ബ്രസീൽ സർക്കാർ തുർക്കിഷ് സംവിധാനങ്ങൾ തിരഞ്ഞെടുക്കുകയാണെങ്കിൽ, എംബ്രയർ നിർമ്മിത കെസി-390 സൈനിക കാർഗോ വിമാനത്തിന്റെ കാര്യത്തിൽ സഹകരണം കൂടുതൽ ആഴത്തിലാക്കാൻ കഴിയും,” എന്ന് തുർക്കിഷ് മാധ്യമ റിപ്പോർട്ടിൽ പറയുന്നു.

ഇന്ത്യ വാഗ്ദാനം ചെയ്തത് പഴയ പതിപ്പ്

ബ്രസീലുമായുള്ള ചർച്ചകൾ പരാജയപ്പെടാൻ കാരണം, ഇന്ത്യ മിസൈലിന്റെ ഏറ്റവും പുതിയ പതിപ്പായ ‘ആകാശ്-എൻജി’ വാഗ്ദാനം ചെയ്യാതിരുന്നതാണെന്നും റിപ്പോർട്ടുകളുണ്ട്. പഴയ പതിപ്പിന്, ആക്ടീവ് ഹോമിംഗ്, നെറ്റ്‌വർക്ക് ടാർഗെറ്റിംഗ് തുടങ്ങിയ ആധുനിക സവിശേഷതകൾ കുറവാണ്. ആകാശ്-എൻജിക്ക് കൂടുതൽ വേഗതയും കൃത്യതയുമുണ്ട്.

ആകാശ് മിസൈൽ സംവിധാനം

4.5 കിലോമീറ്റർ മുതൽ 25 കിലോമീറ്റർ വരെ ദൂരപരിധിയുള്ള ആകാശ് മിസൈൽ സംവിധാനത്തിന്, ഹെലികോപ്റ്ററുകൾ, യുദ്ധവിമാനങ്ങൾ, ആളില്ലാ വിമാനങ്ങൾ എന്നിവയെ തകർക്കാൻ കഴിയും. പൂർണ്ണമായും ഓട്ടോമാറ്റിക് ആയ ഈ സംവിധാനം, ഏത് ഭൂപ്രദേശത്തും വിന്യസിക്കാൻ സാധിക്കുന്ന ഒന്നാണ്.