“ഇ.എം.എസ് ആദ്യ കമ്മ്യൂണിസ്റ്റ് മുഖ്യമന്ത്രി, പിണറായി അവസാനത്തേതാകും”; സർക്കാരിനെതിരെ വി.ഡി. സതീശൻ

കൊച്ചി: കേരളത്തിന്റെ അഭിമാനമായിരുന്ന ആരോഗ്യ, വിദ്യാഭ്യാസ മേഖലകളെ എൽഡിഎഫ് സർക്കാർ പൂർണ്ണമായി തകർത്തുവെന്നും, ഇ.എം.എസ്. നമ്പൂതിരിപ്പാട് കേരളത്തിലെ ആദ്യ കമ്മ്യൂണിസ്റ്റ് മുഖ്യമന്ത്രിയായെങ്കിൽ, പിണറായി വിജയൻ അവസാനത്തേതായിരിക്കുമെന്നും പ്രതിപക്ഷ നേതാവ് വി.ഡി. സതീശൻ. സർക്കാരിന്റെ എല്ലാ രംഗത്തെയും പരാജയങ്ങളിൽ നിന്ന് ശ്രദ്ധ തിരിക്കാനാണ് എസ്എഫ്ഐയെ ഉപയോഗിച്ച് സമരാഭാസം നടത്തുന്നതെന്നും അദ്ദേഹം കൊച്ചിയിൽ മാധ്യമങ്ങളോട് പറഞ്ഞു.

ആർഎസ്എസ് ഏജന്റ് പ്രയോഗത്തിന് മറുപടി

തന്നെ ആർഎസ്എസ് ഏജന്റെന്ന് വിളിക്കുന്ന ‘ക്യാപ്സ്യൂൾ’ കയ്യിൽ വെച്ചാൽ മതിയെന്ന് പരിഹസിച്ച സതീശൻ, മുഖ്യമന്ത്രി പിണറായി വിജയനെതിരെ രൂക്ഷമായ ആരോപണങ്ങൾ ഉന്നയിച്ചു. “1977-ൽ ആർഎസ്എസ് പിന്തുണയോടെ ജയിച്ച ആളല്ലേ പിണറായി വിജയൻ? നാഗ്പൂരിനെ പ്രതിനിധാനം ചെയ്യുന്ന നിതിൻ ഗഡ്കരിക്ക് പൊന്നാടയുമായി പോയതും, ആർഎസ്എസ് നേതാക്കളുമായി മസ്കറ്റ് ഹോട്ടലിൽ രഹസ്യ ചർച്ച നടത്തിയതും ആരാണ്? ഗവർണർക്കൊപ്പം പുട്ടും കടലയും കഴിക്കാൻ പോയ കൂട്ടത്തിൽ ഞാനുണ്ടായിരുന്നില്ല. അപ്പോൾ ആരാണ് യഥാർത്ഥ ആർഎസ്എസ് ഏജന്റ്?” സതീശൻ ചോദിച്ചു.

ഉന്നത വിദ്യാഭ്യാസ, ആരോഗ്യ മേഖലകൾ തകർന്നു

കീം പരീക്ഷാഫലം റദ്ദാക്കിയതിലൂടെ സർക്കാർ കുട്ടികളുടെ ഭാവി അവതാളത്തിലാക്കിയെന്ന് സതീശൻ കുറ്റപ്പെടുത്തി. “സാമാന്യബുദ്ധിയുള്ള ആരെങ്കിലും പരീക്ഷയ്ക്ക് ശേഷം പ്രോസ്പെക്ടസ് തിരുത്തുമോ?” അദ്ദേഹം ചോദിച്ചു. ആരോഗ്യരംഗത്തെ തകർച്ചയും, അവിടെ നടക്കുന്ന സമരങ്ങളും മറച്ചുവെക്കാനാണ് എസ്എഫ്ഐയെക്കൊണ്ട് സർക്കാർ സമരം നടത്തിക്കുന്നതെന്നും അദ്ദേഹം ആരോപിച്ചു.

മാധ്യമങ്ങൾക്ക് നേരെയുള്ള ഭീഷണി

മീഡിയവൺ മാധ്യമപ്രവർത്തകന്റെ കൈവെട്ടുമെന്ന സിപിഎം ഭീഷണിയെയും സതീശൻ ശക്തമായി അപലപിച്ചു. “ഇത് സ്റ്റാലിന്റെ റഷ്യയല്ല, ജനാധിപത്യ കേരളമാണെന്ന് സിപിഎം ഓർക്കണം. മോദിയുടെയും പിണറായിയുടെയും സർക്കാരുകൾ തമ്മിൽ എന്ത് വ്യത്യാസമാണുള്ളത്?” അദ്ദേഹം ചോദിച്ചു. ബംഗാളിൽ സംഭവിച്ചതുപോലെ, കേരളത്തിലും സിപിഎമ്മിന്റെ അവസാനത്തിന്റെ ആരംഭമാണിതെന്നും സതീശൻ കൂട്ടിച്ചേർത്തു.