പണിമുടക്ക്: കേരളത്തിന് നഷ്ടം 2298 കോടി, ഒരു മാസത്തെ കടത്തിന് തുല്യം
തിരുവനന്തപുരം: സംസ്ഥാനത്ത് ബുധനാഴ്ച നടന്ന ഒരു ദിവസത്തെ പൊതുപണിമുടക്ക് മൂലം കേരളത്തിനുണ്ടായത് 2,298 കോടി രൂപയുടെ ഉത്പാദന നഷ്ടം. സംസ്ഥാന സർക്കാർ ഒരു മാസം പ്രവർത്തനങ്ങൾക്കായി കടമെടുക്കുന്ന തുകയ്ക്ക് തുല്യമായ നഷ്ടമാണ് ഒറ്റ ദിവസം കൊണ്ട് സംഭവിച്ചത്. ഫാക്ടറികളും, വാണിജ്യ-വ്യാപാര സ്ഥാപനങ്ങളും അടഞ്ഞുകിടന്നതും, ഗതാഗത, ടൂറിസം, ബാങ്കിംഗ് മേഖലകൾ സ്തംഭിച്ചതുമാണ് ഇത്ര വലിയ നഷ്ടത്തിന് കാരണമായത്.
സംസ്ഥാനത്തിന്റെ ഒരു ദിവസത്തെ മൊത്ത ആഭ്യന്തര ഉത്പാദനം ഏകദേശം 3,591 കോടി രൂപയാണ്. ഇതിൽ കാർഷികം, ഐ.ടി., ആരോഗ്യ സേവനം എന്നീ മേഖലകളെ പണിമുടക്ക് കാര്യമായി ബാധിച്ചിട്ടില്ല. എന്നാൽ വ്യവസായ, വ്യാപാര മേഖലകളിലെ ഉത്പാദനം പൂർണ്ണമായി നിലച്ചത് വലിയ പ്രത്യാഘാതമുണ്ടാക്കി.
വരുമാന നഷ്ടത്തിന്റെ കണക്കുകൾ
പണിമുടക്ക് ദിനത്തിൽ സർക്കാരിന് നേരിട്ടുണ്ടായ വരുമാന നഷ്ടത്തിന്റെ ഏകദേശ കണക്കുകൾ ഇങ്ങനെയാണ്:
- കെ.എസ്.ആർ.ടി.സി: 6 കോടി രൂപ
- ലോട്ടറി: 30.2 കോടി രൂപ
- മദ്യവില്പന (ബെവ്കോ): 52 കോടി രൂപ
- നികുതി വരുമാനം: 173.6 കോടി രൂപ
സ്ഥിരമായ നഷ്ടം
ലോട്ടറി, വസ്തു രജിസ്‌ട്രേഷൻ തുടങ്ങിയ ഇടപാടുകൾ അടുത്ത ദിവസം നടന്നേക്കാം. എന്നാൽ വ്യവസായ ശാലകളിലെയും മറ്റും ഉത്പാദന നഷ്ടം എന്നന്നേക്കുമായി സംഭവിച്ച നഷ്ടമാണെന്ന് സാമ്പത്തിക വിദഗ്ദ്ധർ ചൂണ്ടിക്കാട്ടുന്നു. മുൻവർഷങ്ങളിലെ പണിമുടക്ക് ദിനങ്ങളിലെ കച്ചവട നഷ്ടം പിന്നീട് വീണ്ടെടുക്കാൻ കഴിഞ്ഞിട്ടില്ലെന്നതും ഈ വാദത്തിന് ബലമേകുന്നു.
അടിക്കടിയുണ്ടാകുന്ന ഇത്തരം പണിമുടക്കുകൾ സംസ്ഥാനത്തിന്റെ നിക്ഷേപ സൗഹൃദ അന്തരീക്ഷത്തെയും, ടൂറിസം മേഖലയുടെ വളർച്ചയെയും പ്രതികൂലമായി ബാധിക്കുമെന്ന് വ്യവസായ ലോകം ആശങ്ക പ്രകടിപ്പിച്ചു.
