കൊച്ചി: സംസ്ഥാനത്തെ ആയിരക്കണക്കിന് എൻജിനീയറിങ് വിദ്യാർത്ഥികളെയും സർക്കാരിനെയും ഒരുപോലെ ബാധിക്കുന്ന സുപ്രധാന വിധിയിൽ, കീം പ്രവേശന പരീക്ഷയുടെ റാങ്ക് ലിസ്റ്റ് കേരള ഹൈക്കോടതി റദ്ദാക്കി. പ്രവേശന പരീക്ഷയുടെ വിജ്ഞാപനവും പ്രോസ്പെക്ടസും പുറത്തിറക്കിയ ശേഷം, റാങ്ക് നിർണയിക്കുന്നതിനുള്ള മാനദണ്ഡങ്ങളിൽ മാറ്റം വരുത്തിയത് നിയമവിരുദ്ധമാണെന്ന് ചൂണ്ടിക്കാട്ടിയാണ് ജസ്റ്റിസ് ഡി.കെ. സിംഗിന്റെ നിർണായക ഉത്തരവ്.
എൻജിനീയറിങ് പ്രവേശന നടപടികൾ ആരംഭിക്കാനിരിക്കെയാണ് സർക്കാരിന് വലിയ തിരിച്ചടിയായി കോടതി വിധി വന്നിരിക്കുന്നത്.
കോടതി ഇടപെടാൻ കാരണം
പ്ലസ് ടു മാർക്കും, കീം പ്രവേശന പരീക്ഷയുടെ മാർക്കും ഒരു നിശ്ചിത അനുപാതത്തിൽ പരിഗണിച്ചാണ് എൻജിനീയറിങ് റാങ്ക് ലിസ്റ്റ് തയ്യാറാക്കുന്നത്. ഇത്തവണ റാങ്ക് നിർണയത്തിനായി സർക്കാർ പുതിയൊരു ഫോർമുല നടപ്പാക്കിയിരുന്നു. സംസ്ഥാന സിലബസിൽ പഠിച്ച വിദ്യാർത്ഥികൾക്ക് മാർക്ക് കുറയാത്ത രീതിയിൽ, തമിഴ്നാട് മാതൃകയിലുള്ള മാർക്ക് ഏകീകരണമാണ് നടപ്പാക്കിയത്.
ഈ പുതിയ രീതി സിബിഎസ്ഇ സിലബസിൽ പഠിച്ച വിദ്യാർത്ഥികളെ ദോഷകരമായി ബാധിക്കുന്നുവെന്നും, പ്രോസ്പെക്ടസിലെ നിബന്ധനകൾക്ക് വിരുദ്ധമാണിതെന്നും കാണിച്ച് വിദ്യാർത്ഥികൾ നൽകിയ ഹർജിയിലാണ് ഹൈക്കോടതിയുടെ നടപടി. ഒരു പരീക്ഷയുടെ നിയമങ്ങൾ പ്രഖ്യാപിച്ച ശേഷം അതിൽ മാറ്റം വരുത്താൻ പാടില്ലെന്ന ഹർജിക്കാരുടെ വാദം കോടതി അംഗീകരിച്ചു.
പുതിയ സാഹചര്യത്തിൽ, പ്രോസ്പെക്ടസിൽ പറഞ്ഞിട്ടുള്ള പഴയ രീതി അനുസരിച്ച് പുതിയ റാങ്ക് ലിസ്റ്റ് തയ്യാറാക്കാൻ പ്രവേശന പരീക്ഷാ കമ്മീഷണർക്ക് കോടതി നിർദ്ദേശം നൽകിയേക്കും. ഇത് എൻജിനീയറിങ് പ്രവേശന നടപടികൾ വൈകാൻ കാരണമാകും.
