വിശാഖപട്ടണം: ഇന്ത്യൻ നാവികസേനയുടെ ചരിത്രത്തിൽ പുതിയൊരു സുവർണ്ണ അധ്യായം എഴുതിച്ചേർത്ത് സബ് ലഫ്റ്റനന്റ് ആസ്ത പൂനിയ. നാവികസേനയുടെ ആദ്യ വനിതാ യുദ്ധവിമാന പൈലറ്റാകാൻ ഒരുങ്ങുകയാണ് ആസ്ത. വിശാഖപട്ടണത്തെ ഐഎൻഎസ് ദേഗയിൽ നടന്ന ചടങ്ങിൽ, ഹോക്ക് അഡ്വാൻസ്ഡ് ജെറ്റ് ട്രെയ്നറുകളിലെ പരിശീലനം പൂർത്തിയാക്കി ആസ്ത അഭിമാനകരമായ ‘വിങ്ങ്സ് ഓഫ് ഗോൾഡ്’ കരസ്ഥമാക്കി.
ഇതോടെ, ഇന്ത്യൻ വ്യോമസേനയ്ക്ക് പിന്നാലെ നാവികസേനയുടെ ഫൈറ്റർ സ്ട്രീമിലേക്കും വനിതാ സാന്നിധ്യം എത്തുകയാണ്. നിലവിൽ ഇന്ത്യൻ വ്യോമസേനയിൽ 20-ൽ അധികം വനിതാ യുദ്ധവിമാന പൈലറ്റുമാരുണ്ട്.
കടലിന് മുകളിൽ പോർവിമാനം പറത്തും
അടുത്ത ഒരു വർഷം, മിഗ്-29കെ പോലുള്ള യഥാർത്ഥ യുദ്ധവിമാനങ്ങളിൽ ആസ്ത കഠിനമായ പരിശീലനം നേടും. വിമാനവാഹിനിക്കപ്പലുകളിൽ നിന്ന് പറന്നുയരാനും ലാൻഡ് ചെയ്യാനുമുള്ള പരിശീലനവും ഇതിൽ ഉൾപ്പെടും. ഇത് വിജയകരമായി പൂർത്തിയാക്കുന്നതോടെ, ആഴക്കടലിൽ വിമാനവാഹിനിക്കപ്പലിൽ നിന്ന് പോർവിമാനം പറത്തുന്ന ആദ്യ ഇന്ത്യൻ വനിതാ നാവിക ഉദ്യോഗസ്ഥയായി 20-കാരിയായ ആസ്ത മാറും.
“നാവികസേനയുടെ വ്യോമയാന വിഭാഗത്തിലെ ഫൈറ്റർ സ്ട്രീമിലേക്ക് എത്തുന്ന ആദ്യ വനിതയാണ് സബ് ലഫ്റ്റനന്റ് ആസ്ത പൂനിയ. എല്ലാ തടസ്സങ്ങളെയും ഭേദിച്ച്, നാവികസേനയിലെ വനിതാ യുദ്ധവിമാന പൈലറ്റുമാരുടെ ഒരു പുതിയ യുഗത്തിനാണ് അവർ വഴിയൊരുക്കുന്നത്,” എന്ന് ഒരു മുതിർന്ന നാവിക ഉദ്യോഗസ്ഥൻ പറഞ്ഞു.
നാവികസേനയുടെ മറ്റ് നിരീക്ഷണ വിമാനങ്ങളിലും ഹെലികോപ്റ്ററുകളിലും ഇതിനോടകം വനിതാ പൈലറ്റുമാരുണ്ട്. എന്നാൽ, യുദ്ധവിമാനങ്ങൾ പറത്തുന്ന വിഭാഗത്തിലേക്ക് ഒരു വനിത എത്തുന്നത് ആദ്യമായാണ്. ‘നാരി ശക്തി’ പ്രോത്സാഹിപ്പിക്കുന്നതിലും ലിംഗസമത്വം ഉറപ്പാക്കുന്നതിലുമുള്ള ഇന്ത്യൻ നാവികസേനയുടെ പ്രതിബദ്ധതയാണ് ഈ നേട്ടം എടുത്തു കാണിക്കുന്നത്.
