ഇന്ത്യയുടെ ആക്രമണ പദ്ധതി ചൈന ചോർത്തി; പാകിസ്താന്റെ ജെഎഫ്-17 നിർമ്മാണശാല രക്ഷപ്പെട്ടത് തലനാരിഴയ്ക്ക്
ന്യൂഡൽഹി: ഓപറേഷൻ സിന്ദൂറില്‍ പാകിസ്താനെതിരെ ഇന്ത്യയുടെ നിർണായകമായ ഒരു ബ്രഹ്മോസ് മിസൈൽ ആക്രമണ പദ്ധതിയെക്കുറിച്ച് ചൈന പാകിസ്താന് തത്സമയ രഹസ്യവിവരം നൽകിയെന്ന് ഇന്ത്യൻ കരസേനയുടെ ഉന്നത ഉദ്യോഗസ്ഥന്റെ വെളിപ്പെടുത്തൽ. ഇന്ത്യൻ വ്യോമസേനയുടെ നീക്കങ്ങൾ ചൈനയുടെ ചാര ഉപഗ്രഹങ്ങൾ നിരീക്ഷിക്കുകയും, ആ വിവരങ്ങൾ പാകിസ്താന് കൈമാറുകയും ചെയ്തുവെന്ന് ഡെപ്യൂട്ടി ചീഫ് ഓഫ് ആർമി സ്റ്റാഫ് ലഫ്റ്റനന്റ് ജനറൽ രാഹുൽ ആർ. സിംഗ് പറഞ്ഞു.
പാകിസ്താന്റെ ജെഎഫ്-17 ‘തണ്ടർ’ യുദ്ധവിമാനങ്ങൾ നിർമ്മിക്കുന്ന കാംരയിലെ പാകിസ്താൻ എയറോനോട്ടിക്കൽ കോംപ്ലക്സ് (പിഎസി) തകർക്കുകയായിരുന്നു ഇന്ത്യയുടെ ലക്ഷ്യം. എന്നാൽ, ചൈനയുടെ മുന്നറിയിപ്പിനെ തുടർന്ന് ഈ ആക്രമണത്തിൽ നിന്ന് ഇന്ത്യ പിന്മാറുകയായിരുന്നുവെന്നാണ് സൂചന.
പാകിസ്താന് മുന്നറിയിപ്പ് ലഭിച്ചത് ഇങ്ങനെ
സംഘർഷം ലഘൂകരിക്കുന്നതിനായി ഇന്ത്യയുടെയും പാകിസ്താന്റെയും ഡിജിഎംഒമാർ (ഡയറക്ടർ ജനറൽ ഓഫ് മിലിട്ടറി ഓപ്പറേഷൻസ്) തമ്മിൽ ചർച്ചകൾ നടക്കുന്നതിനിടെ, “നിങ്ങളുടെ പ്രധാനപ്പെട്ട ഒരു ആക്രമണ വാഹനം (important vector) തയ്യാറായി നിൽക്കുന്നതായി ഞങ്ങൾക്കറിയാം, ദയവായി അത് പിൻവലിക്കണം,” എന്ന് പാക് ഡിജിഎംഒ അഭ്യർത്ഥിച്ചതായി ലഫ്റ്റനന്റ് ജനറൽ രാഹുൽ ആർ. സിംഗ് ഫിക്കി സംഘടിപ്പിച്ച പരിപാടിയിൽ വെളിപ്പെടുത്തി.
ബ്രഹ്മോസ് മിസൈൽ ഘടിപ്പിച്ച ഇന്ത്യൻ വ്യോമസേനയുടെ സുഖോയ് എസ്-30എംകെഐ വിമാനം കാംരയിലെ ജെഎഫ്-17 നിർമ്മാണശാലയെ ലക്ഷ്യം വെച്ചപ്പോഴായിരുന്നു ഈ സംഭവം. ഇന്ത്യയുടെ നീക്കങ്ങളെക്കുറിച്ചുള്ള കൃത്യവും തത്സമയവുമായ വിവരങ്ങൾ പാകിസ്താന് ലഭിച്ചിരുന്നുവെന്നാണ് ഇത് വ്യക്തമാക്കുന്നത്.
‘ഓപ്പറേഷൻ സിന്ദൂറും’ ചൈന-പാക് അച്ചുതണ്ടും
2025 ഏപ്രിൽ 22-ന് പഹൽഗാമിൽ 26 സാധാരണക്കാർ കൊല്ലപ്പെട്ട ഭീകരാക്രമണത്തിന് മറുപടിയായാണ് മെയ് 7-ന് ഇന്ത്യ ‘ഓപ്പറേഷൻ സിന്ദൂർ’ ആരംഭിച്ചത്. ബ്രഹ്മോസ്, സ്കാൽപ്പ്, സ്പൈസ്-2000 തുടങ്ങിയ അത്യാധുനിക ആയുധങ്ങൾ ഉപയോഗിച്ച് പാക് അധീന കശ്മീരിലെയും പാകിസ്താനിലെയും ഭീകര കേന്ദ്രങ്ങൾക്കും സൈനിക താവളങ്ങൾക്കും നേരെ ഇന്ത്യ ആക്രമണം നടത്തിയിരുന്നു.
ഈ സമയത്ത്, ചൈന തങ്ങളുടെ ചാര ഉപഗ്രഹങ്ങൾ ഉപയോഗിച്ച് ഇന്ത്യൻ വ്യോമസേനയുടെ നീക്കങ്ങൾ നിരീക്ഷിക്കുകയും, ആ വിവരങ്ങൾ പാകിസ്താന് കൈമാറുകയും ചെയ്തുവെന്ന് റിപ്പോർട്ടുകളുണ്ടായിരുന്നു. ഈ വാദങ്ങളെ ബലപ്പെടുത്തുന്നതാണ് ലഫ്റ്റനന്റ് ജനറലിന്റെ പുതിയ വെളിപ്പെടുത്തൽ. ഇന്ത്യ-ചൈന, ഇന്ത്യ-പാകിസ്താൻ എന്നിങ്ങനെ രണ്ട് മുന്നണികളിൽ ഒരേസമയം ഭീഷണി നേരിടുന്ന ഇന്ത്യയുടെ സൈനിക ആസൂത്രണത്തിൽ വലിയ പ്രത്യാഘാതങ്ങൾ സൃഷ്ടിക്കുന്നതാണ് ഈ ചൈന-പാക് സൈനിക സഹകരണം.
