തിരുവനന്തപുരം: രണ്ടാഴ്ചയിലേറെയായി തിരുവനന്തപുരം വിമാനത്താവളത്തിൽ നിർത്തിയിട്ടിരിക്കുന്ന ബ്രിട്ടീഷ് എഫ്-35ബി സ്റ്റെൽത്ത് യുദ്ധവിമാനത്തിന്റെ അടിയന്തര ലാൻഡിംഗിനെക്കുറിച്ച് പുതിയ സിദ്ധാന്തങ്ങൾ പുറത്ത്. മോശം കാലാവസ്ഥയോ ഇന്ധനക്കുറവോ അല്ല, മറിച്ച് ഇന്ത്യൻ വ്യോമാതിർത്തി നിരീക്ഷിക്കാനെത്തിയ വിമാനത്തെ ഇന്ത്യയുടെ അത്യാധുനിക എയർ ഡിഫൻസ് സംവിധാനം റഡാർ ഉപയോഗിച്ച് പൂട്ടിയതാണ് അടിയന്തര ലാൻഡിംഗിന് കാരണമെന്നാണ് ഓൺലൈൻ വിശകലനങ്ങളിൽ ഉയരുന്ന പ്രധാനവാദം.
‘ഓപ്പറേഷൻ ഹൈ മാസ്റ്റ്’ എന്ന സംയുക്ത സൈനികാഭ്യാസത്തിന്റെ ഭാഗമായി ഇന്ത്യൻ തീരത്ത് നിന്ന് 100 കിലോമീറ്റർ അകലെ നിലയുറപ്പിച്ച ബ്രിട്ടീഷ് വിമാനവാഹിനിക്കപ്പലിൽ നിന്നാണ് വിമാനം പറന്നുയർന്നത്. എന്നാൽ, സാങ്കേതിക തകരാർ മൂലം വിമാനം നിലത്തിറക്കി എന്ന ഔദ്യോഗിക വിശദീകരണങ്ങൾക്കപ്പുറം, സംഭവത്തിൽ കൂടുതൽ ദുരൂഹതകളുണ്ടെന്നാണ് പുതിയ വിശകലനങ്ങൾ സൂചിപ്പിക്കുന്നത്.
പുതിയ സിദ്ധാന്തം ഇങ്ങനെ
ഇന്ത്യയുടെ വ്യോമ പ്രതിരോധ സംവിധാനങ്ങളെക്കുറിച്ചും റഡാർ ശൃംഖലയെക്കുറിച്ചും രഹസ്യവിവരങ്ങൾ ശേഖരിക്കാനുള്ള ഒരു ‘ചാരദൗത്യത്തിന്റെ’ ഭാഗമായിരുന്നു എഫ്-35ന്റെ വരവ്. എന്നാൽ, ഇന്ത്യൻ വ്യോമാതിർത്തിയിലേക്ക് കടന്നയുടൻ, ഇന്ത്യയുടെ സംയോജിത എയർ കമാൻഡ് ആൻഡ് കൺട്രോൾ സിസ്റ്റം (IACCS) എന്ന പ്രതിരോധ ശൃംഖല, സ്റ്റെൽത്ത് വിമാനമായ എഫ്-35നെ കണ്ടെത്തുകയും അതിലേക്ക് റഡാർ ലോക്ക് ചെയ്യുകയും ചെയ്തു.
ഇന്ത്യൻ റഡാറിൽ നിന്നുള്ള ഈ ‘ലോക്ക്’ എഫ്-35ന്റെ ആന്തരിക സുരക്ഷാ സംവിധാനത്തിൽ ഒരു സൈബർ ഇടപെടലായി കണക്കാക്കപ്പെടുകയും, വിമാനത്തിന്റെ നിയന്ത്രണ സംവിധാനങ്ങൾ സ്വയം പ്രവർത്തനരഹിതമാവുകയും (System Lockout) ചെയ്തു. ഇതോടെ, പൈലറ്റിന്റെ നിയന്ത്രണം നഷ്ടപ്പെട്ട വിമാനം, മുൻകൂട്ടി നിശ്ചയിച്ച അടിയന്തര സുരക്ഷാ പ്രോട്ടോക്കോൾ പ്രകാരം, ഏറ്റവും അടുത്തുള്ള സുരക്ഷിതമായ സിവിലിയൻ വിമാനത്താവളമായ തിരുവനന്തപുരത്ത് സ്വയം ലാൻഡ് ചെയ്യുകയായിരുന്നു എന്നാണ് പുതിയ വാദം.
ലോക്ക്ഹീഡ് മാർട്ടിൻ എഞ്ചിനീയർമാരുടെ വരവ്
വിമാനം നന്നാക്കാനായി ബ്രിട്ടനിൽ നിന്ന് എത്തുന്ന 40 അംഗ സംഘത്തിൽ, വിമാനത്തിന്റെ യഥാർത്ഥ നിർമ്മാതാക്കളായ അമേരിക്കൻ കമ്പനി ലോക്ക്ഹീഡ് മാർട്ടിനിലെ വിദഗ്ധരും ഉൾപ്പെടുന്നു എന്ന വാർത്ത ഈ വാദത്തിന് ബലം നൽകുന്നു. ഒരു സാധാരണ സാങ്കേതിക തകരാറാണെങ്കിൽ ബ്രിട്ടീഷ് എഞ്ചിനീയർമാർക്ക് മാത്രം പരിഹരിക്കാൻ സാധിക്കുമായിരുന്നു.
എന്നാൽ, സോഫ്റ്റ്‌വെയർ, ഫേംവെയർ, ക്ലാസിഫൈഡ് കംപോണന്റ് എന്നിവയുമായി ബന്ധപ്പെട്ട അതീവ സങ്കീർണ്ണമായ പ്രശ്നമായതുകൊണ്ടാണ് ലോക്ക്ഹീഡ് മാർട്ടിന്റെ സഹായം തേടുന്നത്.
ചുരുക്കത്തിൽ, ഇന്ത്യയുടെ പ്രതിരോധക്കോട്ട നിരീക്ഷിക്കാനെത്തിയ ബ്രിട്ടീഷ് വിമാനത്തെ, അതിന്റെ സാങ്കേതികവിദ്യയെ തന്നെ ഉപയോഗിച്ച് ഇന്ത്യ കുടുക്കുകയായിരുന്നു എന്ന വാദമാണ് ഇപ്പോൾ ശക്തമാകുന്നത്.
