അടിപതറിയില്ല; വയറുവേദനയെയും തോൽപ്പിച്ച് ദ്യോക്കോവിച്ച് രണ്ടാം റൗണ്ടിൽ
ലണ്ടൻ: ഈ വർഷത്തെ വിംബിൾഡണിൽ മുൻനിര താരങ്ങൾ ഒന്നാം റൗണ്ടിൽ തന്നെ പുറത്താകുന്ന ‘സീഡുകളുടെ കൂട്ടക്കുരുതിക്ക്’ വിരാമമിട്ട് നൊവാക് ദ്യോക്കോവിച്ച്. കടുത്ത വയറുവേദനയെയും ഫ്രഞ്ച് താരം അലക്സാണ്ടർ മുള്ളറുടെ കനത്ത വെല്ലുവിളിയെയും അതിജീവിച്ചാണ് ദ്യോക്കോവിച്ച് രണ്ടാം റൗണ്ടിലേക്ക് മുന്നേറിയത്. മൂന്ന് മണിക്കൂറിലധികം നീണ്ട പോരാട്ടത്തിനൊടുവിൽ 6-1, 6-7 (7), 6-2, 6-3 എന്ന സ്കോറിനാണ് സെർബിയൻ താരത്തിന്റെ വിജയം.
അതിജീവനം നാടകീയ മത്സരത്തിൽ
ഈ വർഷത്തെ വിംബിൾഡണിന്റെ ആദ്യ റൗണ്ടിൽ പുരുഷ-വനിതാ വിഭാഗങ്ങളിലായി ആദ്യ പത്തിലുള്ള എട്ട് താരങ്ങളാണ് ഇതിനോടകം പുറത്തായത്. ഇത് ഓപ്പൺ യുഗത്തിലെ ഒരു റെക്കോർഡാണ്. അലക്സാണ്ടർ സ്വെരേവ്, ഹൊൾഗർ റൂനെ, ഡാനിൽ മെദ്‌വദേവ് തുടങ്ങിയ വമ്പന്മാർ വീണപ്പോൾ, ദ്യോക്കോവിച്ചിനും അടിപതറുമോ എന്ന് ആരാധകർ ഒരു നിമിഷം സംശയിച്ചു.
മത്സരത്തിനിടെ കടുത്ത വയറുവേദന അനുഭവപ്പെട്ട ദ്യോക്കോവിച്ചിന് ഡോക്ടറുടെ സഹായം തേടേണ്ടി വന്നു. “തുടക്കത്തിൽ ഏറ്റവും മികച്ച രീതിയിൽ കളിച്ച ഞാൻ, പിന്നീട് 45 മിനിറ്റോളം ഏറ്റവും മോശം അവസ്ഥയിലേക്ക് പോയി. അതൊരു വയറുവേദനയായിരുന്നോ, എന്താണെന്ന് എനിക്കറിയില്ല. ഡോക്ടറുടെ അത്ഭുത ഗുളികകൾക്ക് ശേഷം ഊർജ്ജം തിരിച്ചുകിട്ടി, മത്സരം നന്നായി പൂർത്തിയാക്കാൻ സാധിച്ചു,” എന്ന് ദ്യോക്കോവിച്ച് മത്സരശേഷം പറഞ്ഞു.
ആദ്യ സെറ്റ് 6-1 ന് അനായാസം നേടിയെങ്കിലും, രണ്ടാം സെറ്റിൽ ദ്യോക്കോവിച്ച് പതറി. ആറ് സെറ്റ് പോയിന്റുകൾ തുലച്ചുകളഞ്ഞ അദ്ദേഹം ആ സെറ്റ് ടൈബ്രേക്കറിൽ കൈവിടുകയായിരുന്നു. എന്നാൽ പിന്നീട് മികച്ച ഫോമിലേക്ക് തിരിച്ചെത്തിയ ദ്യോക്കോവിച്ച്, അടുത്ത രണ്ട് സെറ്റുകളും നേടി മത്സരം സ്വന്തമാക്കി.
The man is back ✨
— Wimbledon (@Wimbledon) July 1, 2025
Novak Djokovic takes down Alexandre Muller 6-1, 6-7 (7), 6-2, 6-2 to reach R2 at #Wimbledon pic.twitter.com/m57QzQxhsc
സ്വെരേവിനും അട്ടിമറി
സീഡുകളുടെ പതനത്തിലെ ഏറ്റവും വലിയ അട്ടിമറികളിലൊന്ന് നടന്നതും ഇന്നായിരുന്നു. നാലാം സീഡായ ജർമ്മനിയുടെ അലക്സാണ്ടർ സ്വെരേവിനെ ഫ്രാൻസിന്റെ ആർതർ റിൻഡർനെക്ക് അഞ്ച് സെറ്റ് നീണ്ട പോരാട്ടത്തിൽ പരാജയപ്പെടുത്തി. ലോക 72-ാം റാങ്കുകാരനായ റിൻഡർനെക്കിന്റെ കരിയറിലെ ഏറ്റവും വലിയ വിജയമാണിത്.
രണ്ടാം റൗണ്ടിൽ ബ്രിട്ടന്റെ ഡാൻ ഇവാൻസാണ് ദ്യോക്കോവിച്ചിന്റെ എതിരാളി. കിരീടം നേടാനുള്ള എല്ലാ സാധ്യതയുമുണ്ടെന്നും അതിനുള്ള അവകാശം താൻ നേടിയെടുത്തിട്ടുണ്ടെന്നും വിശ്വസിക്കുന്നതായി ദ്യോക്കോവിച്ച് മത്സരശേഷം ആത്മവിശ്വാസം പ്രകടിപ്പിച്ചു
