തായ്‌ലൻഡ് പ്രധാനമന്ത്രിയെ ഭരണഘടനാ കോടതി സസ്പെൻഡ് ചെയ്തു; നടപടി ഫോൺ കോൾ വിവാദത്തിൽ
ബാങ്കോക്ക്: തായ്‌ലൻഡിൽ നാടകീയമായ രാഷ്ട്രീയ നീക്കങ്ങൾ. പ്രധാനമന്ത്രി പേടോങ്‌ടാൻ ഷിനവത്രയെ ഭരണഘടനാ കോടതി പദവിയിൽ നിന്ന് താൽക്കാലികമായി സസ്പെൻഡ് ചെയ്തു. മുൻ കംബോഡിയൻ നേതാവുമായി നടത്തിയ ഫോൺ സംഭാഷണം ചോർന്നതിനെ തുടർന്നുണ്ടായ നൈതിക ലംഘന പരാതിയിൽ അന്വേഷണം പൂർത്തിയാകുന്നത് വരെയാണ് നടപടി.
ചൊവ്വാഴ്ച (ജൂലൈ 1, 2025) ചേർന്ന കോടതി, പ്രധാനമന്ത്രിക്കെതിരായ ഹർജി ഏകകണ്ഠമായി സ്വീകരിക്കുകയും, ഏഴിനെതിരെ രണ്ട് വോട്ടുകൾക്ക് അവരെ പദവിയിൽ നിന്ന് സസ്പെൻഡ് ചെയ്യാൻ ഉത്തരവിടുകയുമായിരുന്നു.
വിവാദമായ ഫോൺ കോളും പ്രതിഷേധവും
കംബോഡിയയുമായുള്ള അതിർത്തി തർക്കത്തിൽ പേടോങ്‌ടാന്റെ നിലപാടുകളിൽ രാജ്യത്ത് കടുത്ത അതൃപ്തി നിലനിന്നിരുന്നു. മെയ് 28-ന് നടന്ന സായുധ ഏറ്റുമുട്ടലിൽ ഒരു കംബോഡിയൻ സൈനികൻ കൊല്ലപ്പെട്ടിരുന്നു. ഈ തർക്കം പരിഹരിക്കാനുള്ള നയതന്ത്ര ചർച്ചകൾക്കിടെയാണ് പ്രധാനമന്ത്രിയുടെ ഫോൺ കോൾ ചോർന്നത്. കംബോഡിയൻ സെനറ്റ് പ്രസിഡന്റ് ഹുൻ സെന്നിനെ അനുനയിപ്പിക്കാൻ ശ്രമിച്ചുവെന്നും, ഒരു പ്രാദേശിക സൈനിക മേധാവിക്കെതിരെ പരാമർശം നടത്തിയെന്നുമായിരുന്നു പ്രധാന ആരോപണങ്ങൾ. ഇതിന് പിന്നാലെ, പ്രധാനമന്ത്രിയുടെ രാജി ആവശ്യപ്പെട്ട് ആയിരക്കണക്കിന് ആളുകൾ ശനിയാഴ്ച ബാങ്കോക്കിൽ പ്രതിഷേധ പ്രകടനം നടത്തിയിരുന്നു.
മന്ത്രിസഭാ പുനഃസംഘടന
ഈ രാഷ്ട്രീയ പ്രതിസന്ധിക്കിടെ, തായ്‌ലൻഡ് രാജാവ് മഹാ വജിറലോങ്കോൺ പുതിയ മന്ത്രിസഭാ പുനഃസംഘടനയ്ക്ക് ഇന്ന് അംഗീകാരം നൽകി. ഫോൺ കോൾ വിവാദത്തെ തുടർന്ന് ഭരണസഖ്യത്തിലെ പ്രധാന കക്ഷിയായ ഭുംജൈതായ് പാർട്ടി മുന്നണി വിട്ടതോടെയാണ് പുനഃസംഘടന അനിവാര്യമായത്. കോടതി നടപടിയെ മാനിക്കുമെന്നും എന്നാൽ തന്റെ പ്രവർത്തനം തടസ്സപ്പെടുന്നതിൽ ആശങ്കയുണ്ടെന്നും പേടോങ്‌ടാൻ തിങ്കളാഴ്ച മാധ്യമങ്ങളോട് പറഞ്ഞിരുന്നു.
തായ്‌ലൻഡിലെ ഭരണഘടനാ കോടതികൾ പലപ്പോഴും റോയലിസ്റ്റ് പക്ഷത്തിന്റെ താൽപര്യങ്ങൾ സംരക്ഷിക്കാനായി രാഷ്ട്രീയ എതിരാളികളെ അയോഗ്യരാക്കാൻ ഉപയോഗിക്കപ്പെടുന്നു എന്ന ആക്ഷേപം നിലവിലുണ്ട്. പേടോങ്‌ടാന്റെ മുൻഗാമിയെയും ഇതേ കോടതിയാണ് നൈതിക ലംഘനത്തിന്റെ പേരിൽ പുറത്താക്കിയത്.
