ശമ്പളത്തിൽ നിന്ന് എൻപിഎസ് കുറയ്ക്കില്ല: പാർട്ട് ടൈം ജീവനക്കാർക്കും ട്രെയിനികൾക്കും ആശ്വാസം; പുതിയ ഉത്തരവിറങ്ങി
തിരുവനന്തപുരം: സംസ്ഥാനത്തെ പാർട്ട് ടൈം, ട്രെയിനി തസ്തികകളിലെ സർക്കാർ ജീവനക്കാരുടെ ശമ്പളത്തിൽ നിന്ന് നാഷണൽ പെൻഷൻ സിസ്റ്റത്തിന്റെ (NPS) വിഹിതം തെറ്റായി ഈടാക്കുന്നത് തടയാൻ സർക്കാർ പുതിയ ഉത്തരവിറക്കി. ഇതിനായി ശമ്പളം നൽകുന്ന സ്പാർക്ക് (SPARK) സോഫ്റ്റ്‌വെയറിൽ ആവശ്യമായ മാറ്റങ്ങൾ വരുത്തിയതായി ധനകാര്യ വകുപ്പ് സർക്കുലറിലൂടെ അറിയിച്ചു.
പാർട്ട് ടൈം ജീവനക്കാർക്കും പ്രീ-സർവീസ് ട്രെയിനികൾക്കും എൻപിഎസ് ബാധകമല്ലാത്തതിനാൽ ഇവരുടെ ശമ്പളത്തിൽ നിന്ന് വിഹിതം പിടിക്കേണ്ടതില്ലെന്ന് 2014-ൽ തന്നെ സർക്കാർ ഉത്തരവിറക്കിയിരുന്നു.
എന്നാൽ ഈ ഉത്തരവ് നിലനിൽക്കെത്തന്നെ, പല ഓഫീസുകളിലും ഇവരുടെ ശമ്പളം, ശമ്പള കുടിശ്ശിക എന്നിവയിൽ നിന്ന് എൻപിഎസ് വിഹിതം കുറയ്ക്കുന്നതായി സർക്കാരിന്റെ ശ്രദ്ധയിൽപ്പെട്ടിരുന്നു. ഈ പ്രശ്നം സ്ഥിരമായി പരിഹരിക്കുന്നതിനാണ് ഇപ്പോൾ സ്പാർക്കിൽ തന്നെ പുതിയ സംവിധാനം ഏർപ്പെടുത്തിയത്.
പുതിയ മാറ്റം അനുസരിച്ച്, സ്പാർക്കിൽ ജീവനക്കാരുടെ സർവീസ് കാറ്റഗറി ‘പാർട്ട് ടൈം’ അല്ലെങ്കിൽ ‘ട്രെയിനി’ എന്ന് കൃത്യമായി രേഖപ്പെടുത്തിയാൽ ശമ്പളം പ്രോസസ്സ് ചെയ്യുമ്പോൾ എൻപിഎസ് വിഹിതം തനിയെ ഒഴിവാകും.
അതിനാൽ, ബന്ധപ്പെട്ട ഡ്രോയിംഗ് ആൻഡ് ഡിസ്ബേഴ്സിംഗ് ഓഫീസർമാർ (DDO) ഈ വിഭാഗം ജീവനക്കാരുടെ സർവീസ് കാറ്റഗറി സ്പാർക്കിൽ കൃത്യമായി രേഖപ്പെടുത്തിയെന്ന് ഉറപ്പാക്കിയ ശേഷം മാത്രമേ ശമ്പളം നൽകാവൂ എന്ന് ധനകാര്യ വകുപ്പ് ജോയിന്റ് സെക്രട്ടറി ശോഭ എൽ പുറത്തിറക്കിയ പരിപത്രത്തിൽ കർശന നിർദ്ദേശം നൽകുന്നു.
ഈ സർക്കുലർ സംസ്ഥാനത്തെ എല്ലാ സർക്കാർ വകുപ്പ് മേധാവികൾക്കും, ട്രഷറി ഡയറക്ടർക്കും, ജില്ലാ ട്രഷറി ഓഫീസർമാർക്കും ഉൾപ്പെടെ കൈമാറിയിട്ടുണ്ട്.
