ഒമാൻ ഉൾക്കടലിൽ കപ്പലിന് തീപിടിച്ചു; രക്ഷകരായി ഇന്ത്യൻ നാവികസേന, 14 ഇന്ത്യക്കാരെ രക്ഷപ്പെടുത്തി

ന്യൂഡൽഹി: ഒമാൻ ഉൾക്കടലിൽ വെച്ച് എഞ്ചിൻ റൂമിൽ വൻ തീപിടിത്തമുണ്ടായ ചരക്ക് കപ്പലിലെ 14 ഇന്ത്യൻ ജീവനക്കാരെയും ഇന്ത്യൻ നാവികസേന രക്ഷപ്പെടുത്തി. കടലിൽ സുരക്ഷാ നിരീക്ഷണത്തിനായി നിയോഗിച്ചിരുന്ന ഐഎൻഎസ് തബാർ എന്ന ഇന്ത്യൻ നാവിക സേനാ കപ്പലാണ് അപകടത്തിൽപ്പെട്ട കപ്പലിന്റെ സഹായ അഭ്യർത്ഥനയോട് അതിവേഗം പ്രതികരിച്ച് രക്ഷാപ്രവർത്തനം നടത്തിയത്.

ഇന്ത്യയിലെ കാണ്ഡ്ലയിൽ നിന്ന് ഒമാനിലെ ഷിനാസിലേക്ക് പോവുകയായിരുന്ന ‘എംടി യി ചെങ് 6’ എന്ന കപ്പലിലാണ് ഇന്നലെ, ജൂൺ 29-ന് അപകടമുണ്ടായത്. എഞ്ചിൻ റൂമിലുണ്ടായ തീപിടിത്തത്തെ തുടർന്ന് കപ്പലിലെ വൈദ്യുതി ബന്ധം പൂർണ്ണമായും നിലയ്ക്കുകയായിരുന്നു. തുടർന്ന് കപ്പൽ ജീവനക്കാർ അപായ സന്ദേശം അയക്കുകയായിരുന്നു.

നാവികസേനാ വക്താവ് എക്‌സിലൂടെ അറിയിച്ചതനുസരിച്ച്, അപായ സന്ദേശം ലഭിച്ചയുടൻ ഐഎൻഎസ് തബാർ സംഭവസ്ഥലത്തേക്ക് കുതിച്ചെത്തി. നാവികസേനയുടെ അഗ്നിശമന സേനാംഗങ്ങളും ആവശ്യമായ ഉപകരണങ്ങളും ഹെലികോപ്റ്റർ മാർഗ്ഗവും ബോട്ടുകളിലുമായി അപകടത്തിൽപ്പെട്ട കപ്പലിലേക്ക് എത്തിച്ചു.

ഐഎൻഎസ് തബാറിലെ 13 ഇന്ത്യൻ നാവികരും കപ്പലിലുണ്ടായിരുന്ന 5 ജീവനക്കാരും ചേർന്നാണ് തീ അണയ്ക്കാനുള്ള ശ്രമങ്ങൾ നടത്തിയത്. ഇവരുടെ സമയോചിതമായ ഇടപെടൽ മൂലം തീയുടെ തീവ്രത ഗണ്യമായി കുറയ്ക്കാൻ സാധിച്ചുവെന്നും നാവികസേന അറിയിച്ചു.

അറബിക്കടലിലും ഒമാൻ ഉൾക്കടലിലും അപകടത്തിൽപ്പെടുന്ന കപ്പലുകൾക്ക് സഹായമെത്തിക്കുന്നതിൽ ഇന്ത്യൻ നാവികസേന എപ്പോഴും മുൻപന്തിയിലുണ്ട്. ഈ സംഭവം നാവികസേനയുടെ നിതാന്ത ജാഗ്രതയും കാര്യക്ഷമതയും വീണ്ടും തെളിയിക്കുന്ന ഒന്നായി മാറി.