ന്യൂഡൽഹി: സിന്ധു നദീജല കരാർ താൽക്കാലികമായി റദ്ദാക്കിയതിന് പിന്നാലെ പാകിസ്താന് മേൽ സമ്മർദ്ദം ശക്തമാക്കി ഇന്ത്യ. പതിറ്റാണ്ടുകളായി മുടങ്ങിക്കിടന്ന ജമ്മു കശ്മീരിലെ തുൽബുൽ നാവിഗേഷൻ പദ്ധതി പുനരുജ്ജീവിപ്പിക്കാൻ ഇന്ത്യ ഒരുങ്ങുന്നതായാണ് റിപ്പോർട്ട്. പാകിസ്താൻ കേന്ദ്രീകരിച്ച് നടന്ന പഹൽഗാം ഭീകരാക്രമണത്തിന് മറുപടിയായി ജലവിഭവങ്ങൾ ഒരു നയതന്ത്ര ആയുധമായി ഉപയോഗിക്കുന്നതിന്റെ വ്യക്തമായ സൂചനയാണ് ഈ നീക്കം.
തുൽബുൽ പദ്ധതിയുടെ വിശദമായ പദ്ധതി റിപ്പോർട്ട് (DPR) തയ്യാറാക്കുന്ന നടപടികൾ ആരംഭിച്ചതായും ഇത് പൂർത്തിയാകാൻ ഒരു വർഷമെടുത്തേക്കുമെന്നും ബന്ധപ്പെട്ട വൃത്തങ്ങളെ ഉദ്ധരിച്ച് പിടിഐ റിപ്പോർട്ട് ചെയ്തു.
എന്താണ് തുൽബുൽ പദ്ധതി?
കശ്മീർ താഴ്‌വരയിലെ വൂളാർ തടാകത്തിന് സമീപം ഝലം നദിയിൽ നിർമ്മിക്കാൻ ഉദ്ദേശിക്കുന്ന ഒരു നാവിഗേഷൻ ലോക്ക് കം കൺട്രോൾ സംവിധാനമാണിത്. വേനൽക്കാലത്ത് ഝലം നദിയിലെ ജലനിരപ്പ് കുറയുമ്പോൾ പോലും ബാരാമുള്ള മുതൽ ശ്രീനഗർ വരെ ബോട്ടുകൾക്കും ബാർജുകൾക്കും സുഗമമായി സഞ്ചരിക്കാൻ വഴിയൊരുക്കുക എന്നതാണ് ഇതിന്റെ പ്രധാന ലക്ഷ്യം.
3,00,000 ഏക്കർ അടി വെള്ളം സംഭരിക്കാൻ ശേഷിയുള്ള ഈ പദ്ധതി, ജലഗതാഗതം മെച്ചപ്പെടുത്തുന്നതിനൊപ്പം ജലസേചനത്തിനും താഴ്‌വരയിലെ ജലവൈദ്യുത പദ്ധതികളുടെ സുസ്ഥിരമായ പ്രവർത്തനത്തിനും സഹായിക്കും.
1984-ൽ ഇന്ത്യ ഈ പദ്ധതിയുടെ നിർമ്മാണം ആരംഭിച്ചെങ്കിലും, പാകിസ്താന്റെ ശക്തമായ എതിർപ്പിനെ തുടർന്ന് 1987-ൽ നിർത്തിവെക്കുകയായിരുന്നു. ഇത് സിന്ധു നദീജല കരാറിന്റെ ലംഘനമാണെന്നാണ് പാകിസ്താന്റെ വാദം.
ഇന്ത്യയുടെ നേട്ടവും പാകിസ്താന്റെ ഭയവും
സിന്ധു നദീജല കരാർ പ്രകാരം ഝലം അടക്കമുള്ള പടിഞ്ഞാറൻ നദികളുടെ നിയന്ത്രണം പാകിസ്താനാണെങ്കിലും, ജലഗതാഗതം പോലുള്ള ആവശ്യങ്ങൾക്ക് ഈ നദികളിലെ ജലം ഉപയോഗിക്കാൻ ഇന്ത്യക്ക് അവകാശമുണ്ട്. ഈ അവകാശമുപയോഗിച്ചാണ് ഇന്ത്യ പദ്ധതി നടപ്പാക്കുന്നത്.
എന്നാൽ, നിർണായക സമയങ്ങളിൽ, പ്രത്യേകിച്ച് പാകിസ്താനിലെ പഞ്ചാബ് പ്രവിശ്യയിൽ വിതയുടെ സമയത്ത്, ഇന്ത്യ വെള്ളം തടഞ്ഞുവെച്ച് കൃത്രിമ ക്ഷാമം ഉണ്ടാക്കുമെന്നാണ് പാകിസ്താൻ ഭയപ്പെടുന്നത്. ജലം തടയുന്നത് യുദ്ധപ്രഖ്യാപനമായി കണക്കാക്കുമെന്ന് പാകിസ്താൻ മുൻപ് മുന്നറിയിപ്പ് നൽകിയിട്ടുണ്ട്.
കശ്മീരിലെ രാഷ്ട്രീയപ്പോര്
പദ്ധതി പുനരാരംഭിക്കുന്നതിനെ ചൊല്ലി കശ്മീരിലെ രാഷ്ട്രീയത്തിലും ഭിന്നത രൂക്ഷമാണ്. സിന്ധു നദീജല കരാർ റദ്ദാക്കിയ സാഹചര്യത്തിൽ തുൽബുൽ പദ്ധതി പുനരാരംഭിക്കണമെന്ന് മുൻ മുഖ്യമന്ത്രി ഒമർ അബ്ദുള്ള ആവശ്യപ്പെട്ടിരുന്നു. എന്നാൽ, ഇത് പ്രകോപനപരമായ നീക്കമാണെന്നും ജമ്മു കശ്മീരിന് സമാധാനമാണ് ആവശ്യമെന്നും മുൻ മുഖ്യമന്ത്രി മെഹബൂബ മുഫ്തി പ്രതികരിച്ചു.
ജമ്മു കശ്മീരിലെ ജനങ്ങളുടെ അവകാശങ്ങൾ പതിറ്റാണ്ടുകളായി ഹനിക്കുന്ന സിന്ധു നദീജല കരാറിനെ താൻ എപ്പോഴും എതിർത്തിട്ടുണ്ടെന്നും, അന്യായമായ ഒരു ഉടമ്പടിയെ എതിർക്കുന്നത് യുദ്ധക്കൊതിയായി കാണരുതെന്നും ഒമർ അബ്ദുള്ള തിരിച്ചടിച്ചു.
