ഇറാനെ ആക്രമിച്ച് മടങ്ങിയ അമേരിക്കൻ ബോംബർ എവിടെ? ‘ഓപ്പറേഷൻ മിഡ്‌നൈറ്റ് ഹാമർ’ ദൗത്യത്തെ ചുറ്റിപ്പറ്റി ദുരൂഹത
വാഷിംഗ്ടൺ: ഇറാനിലെ തന്ത്രപ്രധാനമായ ആണവ കേന്ദ്രങ്ങൾ ആക്രമിച്ച് മടങ്ങിയ അമേരിക്കൻ വ്യോമസേനയുടെ ബി-2 സ്പിരിറ്റ് സ്റ്റെൽത്ത് ബോംബറുകളിലൊന്നിനെ ചുറ്റി ദുരൂഹത. ‘ഓപ്പറേഷൻ മിഡ്‌നൈറ്റ് ഹാമർ’ എന്ന് പേരിട്ട അതീവ രഹസ്യ ദൗത്യത്തിന് ശേഷം ഒരു വിമാനം ഇപ്പോഴും തിരികെയെത്തിയിട്ടില്ലെന്നാണ് ഓൺലൈനിൽ പ്രചരിക്കുന്ന റിപ്പോർട്ടുകൾ. ഈ സംഭവം അമേരിക്കൻ സൈനിക വൃത്തങ്ങളിൽ ആശങ്ക പടർത്തിയിട്ടുണ്ട്.
യൂറോ ഏഷ്യൻ ടൈംസ് ഉൾപ്പെടെയുള്ള മാധ്യമങ്ങളിൽ പ്രചരിക്കുന്ന റിപ്പോർട്ടുകൾ പ്രകാരം, ജൂൺ 21-ന് മിസോറിയിലെ വൈറ്റ്‌മാൻ വ്യോമസേനാ താവളത്തിൽ നിന്ന് രണ്ട് ഗ്രൂപ്പുകളായി ബി-2 ബോംബറുകൾ പറന്നുയർന്നു.
ഒരു ഗ്രൂപ്പ് പസഫിക് സമുദ്രത്തിന് മുകളിലൂടെ പറന്നപ്പോൾ, രണ്ടാമത്തെ ഗ്രൂപ്പിലെ ഏഴ് വിമാനങ്ങൾ കിഴക്കോട്ട് തിരിഞ്ഞ് ഇറാനിലെ ഫോർഡോ, നതാൻസ് ആണവ കേന്ദ്രങ്ങളിൽ 14 ജിബിയു-57 ‘ബങ്കർ ബസ്റ്റർ’ ബോംബുകൾ വർഷിച്ച് ആക്രമണം നടത്തി. 37 മണിക്കൂർ നീണ്ട ഈ ദൗത്യം പൂർത്തിയാക്കി ഈ സംഘം സുരക്ഷിതമായി താവളത്തിൽ തിരിച്ചെത്തി.
എന്നാൽ, ആദ്യ സംഘത്തിന്റെ യാത്രയെക്കുറിച്ചുള്ള വിവരങ്ങളാണ് ഇപ്പോൾ ദുരൂഹത സൃഷ്ടിക്കുന്നത്. ഈ സംഘത്തിലെ ഒരു ബി-2 ബോംബർ ഹവായ് ദ്വീപിലെ ഹിക്കാം വ്യോമസേനാ താവളത്തിൽ അടിയന്തരമായി ഇറക്കിയെന്നാണ് സൂചന. ‘MYTEE 14’ എന്ന കോൾസൈൻ ഉപയോഗിച്ച ഈ വിമാനം, അജ്ഞാതമായ സാങ്കേതിക തകരാറിനെ തുടർന്നാണ് ഹവായിൽ ഇറങ്ങിയതെന്നും അതിനുശേഷം അവിടെത്തന്നെ തുടരുകയാണെന്നും റിപ്പോർട്ടുകൾ പറയുന്നു.
മുൻ പൈലറ്റായ ഡേവിഡ് മാർട്ടിൻ പോസ്റ്റ് ചെയ്ത, ഹവായിൽ നിർത്തിയിട്ടിരിക്കുന്ന ബോംബറിന്റെ വീഡിയോ ഓൺലൈനിൽ പ്രചരിച്ചതോടെ അഭ്യൂഹങ്ങൾ ശക്തമായി.
B2 Stealth bomber sitting alone and guarded in Honolulu International. Just captured this on the taxi out. No reports online of a B2 here. This is the closest I’ve been to one. @grok says: There are no reports of a B-2 stealth bomber currently stationed or “sitting” at Daniel… pic.twitter.com/jlPl3MwiNd
— David Martin (@Sir_DavidMartin) June 24, 2025
2 ബില്യൺ ഡോളറിലധികം വിലമതിക്കുന്ന ബി-2 സ്പിരിറ്റ് ബോംബർ അമേരിക്കൻ വ്യോമസേനയുടെ അഭിമാനമാണ്. റഡാറുകളുടെ കണ്ണുവെട്ടിച്ച് ശത്രുരാജ്യങ്ങളുടെ ഉള്ളിലേക്ക് കടന്നുചെന്ന് ആക്രമണം നടത്താൻ കഴിവുള്ള ഇവയുടെ 19 യൂണിറ്റുകൾ മാത്രമാണ് ഇപ്പോൾ സേവനത്തിലുള്ളത്.
‘ഓപ്പറേഷൻ മിഡ്‌നൈറ്റ് ഹാമർ’ എന്നത് ബി-2 ബോംബറുകളുടെ ചരിത്രത്തിലെ ഏറ്റവും ദൈർഘ്യമേറിയ ദൗത്യങ്ങളിലൊന്നായിരുന്നു. വിമാനം കാണാതായതിനെക്കുറിച്ച് അമേരിക്കൻ അധികൃതർ മൗനം പാലിക്കുന്നത് സംഭവത്തിന്റെ ദുരൂഹത വർധിപ്പിക്കുന്നു.
