‘ഞാൻ നല്ല മകനല്ല, നല്ല ഭർത്താവല്ല, നല്ല അച്ഛനുമല്ല’; അച്ഛന്റെ മരണശേഷം കണ്ണുനിറഞ്ഞ് ഷൈൻ ടോം ചാക്കോയുടെ തുറന്നുപറച്ചിൽ

കൊച്ചി: അടുത്തിടെയുണ്ടായ വാഹനാപകടത്തിൽ അച്ഛനെ നഷ്ടപ്പെട്ടതിന്റെ ദുഃഖത്തിൽ നിന്ന് കരകയറുന്നതിനിടെ, തന്റെ ജീവിതത്തിലെ പ്രതിസന്ധികളെയും തിരിച്ചറിവുകളെയും കുറിച്ച് വൈകാരികമായി തുറന്നുപറഞ്ഞ് നടൻ ഷൈൻ ടോം ചാക്കോ.

താൻ നല്ലൊരു മകനോ ഭർത്താവോ അച്ഛനോ ആയിരുന്നില്ലെന്നും, വളരെ സ്വാർത്ഥനായ ഒരു വ്യക്തിയായിരുന്നു താനെന്നും ഒരു അഭിമുഖത്തിൽ അദ്ദേഹം കണ്ണുനിറഞ്ഞുകൊണ്ട് പറഞ്ഞു. ലഹരിയോടുള്ള തന്റെ പോരാട്ടത്തെക്കുറിച്ചും അദ്ദേഹം വിശദമായി സംസാരിച്ചു.

അച്ഛന്റെ മരണം, അമ്മയുടെ ചോദ്യങ്ങൾ

വാഹനാപകടത്തിൽ അച്ഛൻ മരിച്ചത് ഷൈനിനെ മാനസികമായി തളർത്തിയിട്ടുണ്ട്. അപകടത്തിൽ പരിക്കേറ്റ് ചികിത്സയിൽ കഴിയുന്ന അമ്മ, ഇപ്പോഴും ഭർത്താവിനെക്കുറിച്ച് ചോദിക്കുമ്പോൾ മറുപടി പറയാനാവാതെ വിഷമിക്കുകയാണെന്ന് ഷൈൻ പറയുന്നു. “ഡാഡി എവിടെ എന്ന അമ്മയുടെ ചോദ്യത്തിന്, നമ്മുടെ കൂടെത്തന്നെയുണ്ടെന്ന് കള്ളം പറയും, എന്നിട്ട് ഞാൻ പോയി കരയും,” ഷൈൻ പറയുന്നു.

അപകടം നടക്കുമ്പോൾ താൻ പിൻസീറ്റിൽ ഉറക്കത്തിലായിരുന്നുവെന്നും, കണ്ണ് തുറക്കുമ്പോൾ വണ്ടി ഇടിച്ചുകിടക്കുകയായിരുന്നുവെന്നും അദ്ദേഹം ഓർത്തു. “റോഡിൽ നിന്ന് ആരെങ്കിലും വന്ന് സഹായിക്കണേ എന്ന് ഞാൻ കരഞ്ഞുപോയി. മുൻപ് മറ്റുള്ളവരുടെ മരണവാർത്ത കേവലം ഒരു വാർത്ത മാത്രമായിരുന്നെങ്കിൽ, അതിന്റെ വേദന എന്താണെന്ന് ഞാനിപ്പോൾ അറിയുന്നു,” ഷൈൻ പറഞ്ഞു.

ലഹരിയും അതിജീവനവും

ലഹരിയിൽ നിന്ന് മോചനം നേടാനുള്ള റീഹാബിലിറ്റേഷൻ ചികിത്സയിലായിരുന്നു താനെന്നും, അതിന്റെ വിത്ഡ്രോവൽ സിംപ്റ്റംസ് അനുഭവിക്കുന്നതിനിടെയാണ് അപകടമുണ്ടായതെന്നും ഷൈൻ വെളിപ്പെടുത്തി. “മുൻപ് പല സമ്മർദ്ദങ്ങൾ കൊണ്ടും ലഹരി നിർത്തിയിട്ടുണ്ട്. പക്ഷെ ഇത്തവണ ഞാൻ നിർത്തുന്നത് എനിക്ക് വേണ്ടിയല്ല, എന്നെ സ്നേഹിക്കുന്ന എന്റെ അച്ഛനും അമ്മയ്ക്കും അനിയനും വേണ്ടിയാണ്,” അദ്ദേഹം പറഞ്ഞു.

“ഇന്നും ഞാൻ ഒന്നും ഉപയോഗിക്കാതെ ഒരു ദിവസം അതിജീവിച്ചു എന്ന് പറയുന്നത് ഒരു പുതിയ ലഹരിയാണ്. എന്റെ മുഖത്തും ശബ്ദത്തിലും മാറ്റങ്ങൾ വരുന്നത് ഞാൻ അറിയുന്നുണ്ട്,” ഷൈൻ കൂട്ടിച്ചേർത്തു.

‘ഞാനാണ് പ്രശ്നം’

തന്റെ ജീവിതത്തിലെ പ്രശ്നങ്ങളുടെയെല്ലാം അടിസ്ഥാന കാരണം താൻ തന്നെയാണെന്ന തിരിച്ചറിവിലാണ് ഷൈൻ. “ഞാൻ നല്ലൊരു സഹോദരനല്ല, നല്ല മകനല്ല, നല്ല ഭർത്താവല്ല, നല്ല അച്ഛനല്ല. ഞാൻ വളരെ സ്വാർത്ഥനായ ഒരു വ്യക്തിയാണ്. നമ്മളാണ് പ്രശ്നമെന്ന് നമ്മൾ തന്നെ അംഗീകരിച്ചാൽ മാത്രമേ നമുക്ക് പുറത്തുകടക്കാൻ സാധിക്കൂ,” അദ്ദേഹം പറഞ്ഞു.

സിനിമയാണ് തന്റെ അടിസ്ഥാന ലഹരിയെന്നും, അതിനുവേണ്ടി മറ്റെല്ലാ ശീലങ്ങളെയും അതിജീവിക്കാൻ തനിക്ക് കഴിയുമെന്നും ഷൈൻ ടോം ചാക്കോ പ്രത്യാശ പ്രകടിപ്പിച്ചു.