കോഴിക്കോട്: വരാനിരിക്കുന്ന തദ്ദേശ സ്വയംഭരണ തിരഞ്ഞെടുപ്പിൽ, ജമാഅത്തെ ഇസ്‌ലാമിയുടെ രാഷ്ട്രീയ രൂപമായ വെൽഫെയർ പാർട്ടിയുമായി പരസ്യമായ സഖ്യത്തിനില്ലെന്ന് മുസ്ലിം ലീഗ്. എന്നാൽ, നിലമ്പൂർ ഉപതിരഞ്ഞെടുപ്പിലെപ്പോലെ അവർ പിന്തുണ നൽകിയാൽ അത് നിരസിക്കുകയുമില്ല. പ്രമുഖ സുന്നി, മുജാഹിദ് സംഘടനകളുടെ കടുത്ത എതിർപ്പാണ് ലീഗിനെ ഈ പുതിയ തന്ത്രപരമായ നിലപാടിലേക്ക് എത്തിച്ചത്.
കഴിഞ്ഞ തദ്ദേശ തിരഞ്ഞെടുപ്പിൽ ചിലയിടങ്ങളിൽ വെൽഫെയർ പാർട്ടിയുമായി ലീഗ് ധാരണയുണ്ടാക്കിയിരുന്നു. എന്നാൽ, ഇത്തവണ അത്തരം ധാരണകൾ വേണ്ടെന്നാണ് ലീഗ് നേതൃത്വത്തിലെ പ്രബല വിഭാഗത്തിന്റെ തീരുമാനം.
ജമാഅത്തെ ഇസ്‌ലാമിയുടെ ‘മതരാഷ്ട്രവാദം’ പോലുള്ള ആശയങ്ങളോടുള്ള ശക്തമായ വിയോജിപ്പാണ് പ്രമുഖ മുസ്ലിം സംഘടനകളായ സമസ്തയെയും രണ്ട് പ്രധാന മുജാഹിദ് വിഭാഗങ്ങളെയും ലീഗ്-വെൽഫെയർ സഹകരണത്തിൽ നിന്ന് അകറ്റുന്നത്. “ജമാഅത്തെ ഇസ്‌ലാമിയുടെ മതരാഷ്ട്രവാദത്തിനെതിരെ നിരന്തരം പോരാടുന്നവരാണ് ഞങ്ങൾ,” എന്ന് കെഎൻഎം സംസ്ഥാന പ്രസിഡന്റ് ടി.പി. അബ്ദുള്ളക്കോയ മദനി കഴിഞ്ഞദിവസം പറഞ്ഞിരുന്നു.
അംഗസംഖ്യയിൽ കുറവുള്ള ജമാഅത്തെ ഇസ്‌ലാമിക്കു വേണ്ടി, തങ്ങളുടെ പ്രധാന വോട്ട് ബാങ്കായ സുന്നി, മുജാഹിദ് വിഭാഗങ്ങളെ പിണക്കുന്നത് വലിയ തിരിച്ചടിയാകുമെന്ന് ലീഗ് ഭയക്കുന്നു. പ്രത്യേകിച്ച് സമസ്തയ്ക്കുള്ളിൽ ലീഗ് വിരുദ്ധ വിഭാഗം ശക്തമായ സാഹചര്യത്തിൽ, ഈ വിഷയം അവർക്ക് പുതിയൊരു ആയുധം നൽകാൻ ലീഗ് ആഗ്രഹിക്കുന്നില്ല.
ലീഗിലെ പ്രമുഖ നേതാക്കളായ എം.കെ. മുനീറും പി.കെ. കുഞ്ഞാലിക്കുട്ടിയും അടുത്തിടെ ജമാഅത്തെ ഇസ്‌ലാമിയുമായുള്ള ആശയപരമായ ഭിന്നത പരസ്യമാക്കിയിരുന്നു. പ്രായോഗിക രാഷ്ട്രീയത്തിന്റെ വക്താവായ കുഞ്ഞാലിക്കുട്ടി ഇത്തരമൊരു പ്രസ്താവന നടത്തുന്നത് ഇതാദ്യമായാണെന്നതും ശ്രദ്ധേയമാണ്.
അതേസമയം, സിപിഎം ഈ വിഷയത്തിൽ ഉന്നയിക്കുന്ന വിമർശനങ്ങളെ ലീഗ് ഗൗരവമായി കാണുന്നില്ല. പിഡിപിയുടെ പിന്തുണ സ്വീകരിച്ച സിപിഎമ്മിന് ഇക്കാര്യത്തിൽ തങ്ങളെ വിമർശിക്കാൻ ധാർമ്മിക അവകാശമില്ലെന്നാണ് ലീഗിന്റെ നിലപാട്. ലീഗിന്റെ പ്രധാന ആശങ്ക സ്വന്തം വോട്ട് ബാങ്കിൽ വിള്ളലുണ്ടാവുമോ എന്നത് മാത്രമാണ്.
