തിരുവനന്തപുരത്ത് ‘അദൃശ്യ’ യുദ്ധവിമാനം; അറ്റകുറ്റപ്പണിക്ക് ബ്രിട്ടീഷ്-അമേരിക്കൻ സംഘം; ഇന്ത്യൻ സഹായം നിരസിച്ചു

തിരുവനന്തപുരം: സാങ്കേതിക തകരാറിനെ തുടർന്ന് തിരുവനന്തപുരം അന്താരാഷ്ട്ര വിമാനത്താവളത്തിൽ അടിയന്തരമായി ഇറക്കിയ ബ്രിട്ടീഷ് നാവികസേനയുടെ എഫ്-35 സ്റ്റെൽത്ത് യുദ്ധവിമാനത്തിന്റെ അറ്റകുറ്റപ്പണികൾക്കായി ഇംഗ്ലണ്ടിൽ നിന്ന് വിദഗ്ധ സംഘമെത്തി.

ബ്രിട്ടീഷ്, അമേരിക്കൻ സാങ്കേതിക വിദഗ്ധർ അടങ്ങുന്ന സംഘമാണ് വിമാനത്തിന്റെ സങ്കീർണ്ണമായ തകരാറുകൾ പരിഹരിക്കുക. അതേസമയം, വിമാനത്തിന്റെ അതീവ രഹസ്യ സ്വഭാവം കണക്കിലെടുത്ത്, അറ്റകുറ്റപ്പണികൾക്കുള്ള ഇന്ത്യൻ സഹായം ബ്രിട്ടൻ നിരസിച്ചു.

ജൂൺ 14-നാണ് ഇന്ത്യ-യുകെ സംയുക്ത നാവിക അഭ്യാസത്തിനിടെ, എച്ച്എംഎസ് പ്രിൻസ് ഓഫ് വെയിൽസ് വിമാനവാഹിനിക്കപ്പലിൽ നിന്ന് പറന്നുയർന്ന എഫ്-35ബി യുദ്ധവിമാനം ഇന്ധനം തീർന്നതിനെ തുടർന്ന് തിരുവനന്തപുരത്ത് അടിയന്തരമായി ഇറക്കിയത്.

തകരാർ ഗുരുതരം, സുരക്ഷ ശക്തം

കേരള തീരത്ത് നിന്ന് 100 നോട്ടിക്കൽ മൈൽ അകലെ വെച്ച് ഇന്ധനം തീരാറായ വിമാനം, മോശം കാലാവധി കാരണം വിമാനവാഹിനിക്കപ്പലിൽ ഇറങ്ങാൻ കഴിയാതെ വരികയായിരുന്നു. തുടർന്ന്, എമർജൻസി കോഡ് നൽകി ഇന്ത്യൻ വ്യോമസേനയുടെ സഹായത്തോടെ തിരുവനന്തപുരം വിമാനത്താവളത്തിൽ സുരക്ഷിതമായി ഇറക്കി.

അവസാന നിമിഷം ഇന്ധനമില്ലാതെ പ്രവർത്തിച്ചതിനാൽ, വിമാനത്തിന്റെ പ്രാറ്റ് ആൻഡ് വിറ്റ്നി എഫ്135 എഞ്ചിന്റെ ടർബൈൻ ബ്ലേഡുകൾ ഉൾപ്പെടെയുള്ള നിർണായക ഭാഗങ്ങൾക്ക് കേടുപാടുകൾ സംഭവിച്ചിരിക്കാമെന്നാണ് റിപ്പോർട്ടുകൾ. ഇതോടെ, വിമാനം പറക്കാൻ കഴിയാത്ത അവസ്ഥയിലായി. വിമാനത്താവളത്തിലെ നാലാം നമ്പർ ബേയിൽ, കേന്ദ്ര വ്യവസായ സുരക്ഷാ സേനയുടെ (CISF) കനത്ത സുരക്ഷയിലാണ് വിമാനം ഇപ്പോഴുള്ളത്.

ഇന്ത്യൻ സഹായം വേണ്ട

വിമാനം എയർ ഇന്ത്യയുടെ ഹാംഗറിലേക്ക് മാറ്റി അറ്റകുറ്റപ്പണികൾ നടത്താമെന്ന് ഇന്ത്യ വാഗ്ദാനം ചെയ്തിരുന്നു. എന്നാൽ, വിമാനത്തിന്റെ സ്റ്റെൽത്ത് കോട്ടിംഗ്, സെൻസർ സംവിധാനങ്ങൾ തുടങ്ങിയവയുടെ രഹസ്യ സ്വഭാവം കണക്കിലെടുത്ത് ബ്രിട്ടീഷ് നാവികസേന ഈ വാഗ്ദാനം നിരസിച്ചു. നിലവിൽ തുറന്ന സ്ഥലത്താണ് വിമാനത്തിന്റെ അറ്റകുറ്റപ്പണികൾ നടക്കുന്നത്. കനത്ത മഴയും കാറ്റും അറ്റകുറ്റപ്പണികൾക്ക് തടസ്സം സൃഷ്ടിക്കുന്നുണ്ട്.

വിമാനം പരിശോധിക്കാനായി മുൻപ് എത്തിയ സംഘം ബ്രിട്ടനിലേക്ക് മടങ്ങി. പുതുതായി എത്തിയ വിദഗ്ധ സംഘം വരും ദിവസങ്ങളിൽ വിശദമായ പരിശോധനകൾ നടത്തും.