എനിക്ക് ഏറ്റവും കൂടുതൽ ചീത്തപ്പേരുണ്ടാക്കിയ എഴുത്തുകാരൻ ശ്രീനിവാസൻ: സത്യൻ അന്തിക്കാട്

കൊച്ചി: തനിക്ക് മലയാള സിനിമയിൽ ഏറ്റവും കൂടുതൽ ചീത്തപ്പേരുണ്ടാക്കിയ എഴുത്തുകാരൻ ശ്രീനിവാസനാണെങ്കിലും അദ്ദേഹം ഒരു മഹാപ്രതിഭയാണെന്ന് സംവിധായകൻ സത്യൻ അന്തിക്കാട്. അടുത്തിടെ ഒരു അഭിമുഖത്തിൽ നടത്തിയ ഈ പരാമർശം ഇപ്പോൾ സാമൂഹിക മാധ്യമങ്ങളിൽ വൈറലാവുകയാണ്. മലയാള സിനിമയിലെ എക്കാലത്തെയും മികച്ച കൂട്ടുകെട്ടുകളിലൊന്നായി വാഴ്ത്തപ്പെടുന്ന സത്യൻ അന്തിക്കാട്-ശ്രീനിവാസൻ ടീമിന്റെ സിനിമകളെക്കുറിച്ചും അതിന്റെ പിന്നാമ്പുറങ്ങളെക്കുറിച്ചും അദ്ദേഹം മനസ്സുതുറന്നു.

“സന്ദേശം എന്ന സിനിമ കഴിഞ്ഞ സമയത്ത് എനിക്ക് കിട്ടിയ ഊമക്കത്തുകൾക്ക് കണക്കില്ല. സമൂഹത്തിൽ വളരെ ആഴത്തിൽ ചർച്ചയാകുന്ന വിമർശനങ്ങൾ ഒരു മടിയുമില്ലാതെ ശ്രീനിവാസൻ തന്റെ എഴുത്തിലൂടെ പ്രയോഗിക്കും. അതെന്റെ സിനിമയായതുകൊണ്ട് പലപ്പോഴും അതിന്റെ കൂരമ്പുകൾ എനിക്കും ഏൽക്കേണ്ടിവന്നിട്ടുണ്ട്,” സത്യൻ അന്തിക്കാട് പറഞ്ഞു. എന്നാൽ, ഈ “ചീത്തപ്പേരുകൾക്ക്” അപ്പുറം ശ്രീനിവാസന്റെ പ്രതിഭയെ അദ്ദേഹം വാനോളം പുകഴ്ത്തി. “എന്തൊക്കെ പറഞ്ഞാലും 30 കൊല്ലം മുമ്പ് ‘പോളണ്ടിനെക്കുറിച്ച് പറയരുതെന്ന്’ ശ്രീനി എഴുതിയത് ഇപ്പോഴും ആളുകൾ പറയുന്നു. ‘ഈ ബുദ്ധി നമുക്കെന്താ നേരത്തേ തോന്നാഞ്ഞേ ദാസാ’ എന്ന സംഭാഷണവും നമ്മൾ നിത്യജീവിതത്തിൽ ഉപയോഗിക്കുന്നു. നമ്മുടെ സ്ഥിരം പ്രയോഗങ്ങളായി മാറിയ അത്തരം നിരവധി സംഭാഷണങ്ങൾ ശ്രീനിവാസൻ എഴുതിയിട്ടുണ്ട്,” അദ്ദേഹം കൂട്ടിച്ചേർത്തു.

ഈ സംഭാഷണങ്ങളെല്ലാം തന്റെ സിനിമകളിലൂടെ മലയാളി പ്രേക്ഷകരിലേക്ക് എത്താൻ സാധിച്ചതിൽ സന്തോഷമുണ്ടെന്നും സത്യൻ അന്തിക്കാട് പറഞ്ഞു. “തിരക്കഥ മാത്രം വെച്ച് തുടങ്ങിയ സിനിമയാണ് സന്ദേശം. പല സംഭാഷണങ്ങളും ചിത്രീകരണത്തിനിടയിലാണ് ശ്രീനിവാസൻ എഴുതിച്ചേർത്തത്. 30 കൊല്ലം മുൻപ് ഒരു യൂണിറ്റ് വാനിന്റെ അടുത്തിരുന്ന് അദ്ദേഹം കുറിച്ചിട്ട ആ സംഭാഷണങ്ങളാണല്ലോ ഇപ്പോഴും നമ്മൾ ഓർത്തുപറയുന്നതെന്ന് ആലോചിക്കുമ്പോൾ അത്ഭുതം തോന്നാറുണ്ട്. എന്തൊക്കെ വിമർശനങ്ങൾ ഉണ്ടായാലും ശ്രീനിവാസൻ ഒരു മഹാപ്രതിഭയാണെന്ന കാര്യത്തിൽ എനിക്ക് സംശയമില്ല,” സത്യൻ അന്തിക്കാട് വാക്കുകൾ ഉപസംഹരിച്ചു.

കുറുക്കന്റെ കല്യാണം എന്ന ചിത്രത്തിലൂടെ സംവിധാന രംഗത്തെത്തിയ സത്യൻ അന്തിക്കാട്, ശ്രീനിവാസനുമായി ചേർന്ന് ഗാന്ധിനഗർ സെക്കന്റ് സ്ട്രീറ്റ്, നാടോടിക്കാറ്റ്, പട്ടണപ്രവേശം, തലയണമന്ത്രം, സന്ദേശം, ഞാൻ പ്രകാശൻ തുടങ്ങി നിരവധി ഹിറ്റ് സിനിമകളാണ് മലയാളത്തിന് സമ്മാനിച്ചത്.