ഖൊമേനിയെ ഇല്ലാതാക്കിയാൽ സംഘർഷം തീരും; അതാണ് ലക്ഷ്യമെന്ന് നെതന്യാഹു

ഇറാന്റെ പരമോന്നത നേതാവ് ആയത്തുള്ള ഖൊമേനിയെ ഇല്ലാതാക്കിയാൽ നിലവിലെ സംഘർഷം അവസാനിക്കുമെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. ഖൊമേനിയെ വധിക്കുന്നത് സംഘർഷം വഷളാക്കുമെന്ന വാദം തെറ്റാണെന്നും, അരനൂറ്റാണ്ടായി പശ്ചിമേഷ്യയിൽ ഭീകരവാദം വളർത്തുന്ന ഇറാൻ ഭരണകൂടത്തെ ഉന്മൂലനം ചെയ്യുകയാണ് ലക്ഷ്യമെന്നും എബിസി ന്യൂസിന് നൽകിയ അഭിമുഖത്തിൽ നെതന്യാഹു വ്യക്തമാക്കി.

തിന്മയുടെ ശക്തികളെ ഇല്ലാതാക്കണം

“ഇറാനാണ് സൗദിയിലെ അരാംകോ എണ്ണപ്പാടങ്ങളിൽ വരെ ബോംബിട്ടത്. ഇസ്രയേലിനെ ഒരു ആണവയുദ്ധത്തിന്റെ വക്കിലേക്ക് തള്ളിവിടാനാണ് അവർ ശ്രമിക്കുന്നത്. ഇത് തടയാൻ തിന്മയുടെ ശക്തികളെ ഇല്ലാതാക്കുകയല്ലാതെ മറ്റ് മാർഗ്ഗമില്ല,” നെതന്യാഹു പറഞ്ഞു. ഹിറ്റ്‌ലറുടെ ആണവ സംഘത്തിലുള്ളവരെപ്പോലെയാണ് ഇറാന്റെ ആണവ ശാസ്ത്രജ്ഞരെന്നും അദ്ദേഹം ആരോപിച്ചു.

“ഇന്ന് ടെൽ അവീവാണെങ്കിൽ നാളെ അത് ന്യൂയോർക്ക് ആകാം. അതുകൊണ്ട് ഇസ്രയേൽ ഇന്ന് ചെയ്യുന്നത് മാനവരാശിക്ക് വേണ്ടിയാണ്. ഇത് നന്മയും തിന്മയും തമ്മിലുള്ള പോരാട്ടമാണ്. അമേരിക്ക നന്മയ്ക്കൊപ്പം നിൽക്കുമെന്നാണ് പ്രതീക്ഷ,” നെതന്യാഹു കൂട്ടിച്ചേർത്തു. യുഎസ് പ്രസിഡന്റ് ട്രംപിന്റെ പിന്തുണ വളരെ വലുതാണെന്നും അദ്ദേഹം അഭിമുഖത്തിൽ സമ്മതിച്ചു.

അമേരിക്കയുടെ നിലപാടും ലോകത്തിന്റെ ആശങ്കയും

അതേസമയം, ഇസ്രയേൽ ആക്രമണം അവസാനിപ്പിക്കാൻ അമേരിക്കയ്ക്ക് ഇടപെടാനാകുമെന്ന് ഇറാൻ വിദേശകാര്യമന്ത്രി പ്രതികരിച്ചു. എന്നാൽ, യുദ്ധത്തിൽ ഇറാൻ വിജയിക്കില്ലെന്നും ഉടൻ ചർച്ചകൾക്ക് തയ്യാറാകണമെന്നുമാണ് യുഎസ് പ്രസിഡന്റ് ഡൊണാൾഡ് ട്രംപിന്റെ നിലപാട്. ടെഹ്‌റാനിലുള്ളവർ ഉടൻ ഒഴിഞ്ഞുപോകണമെന്നും ട്രംപ് മുന്നറിയിപ്പ് നൽകി.

സംഘർഷം അവസാനിപ്പിക്കണമെന്നാവശ്യപ്പെട്ടുള്ള ജി-7 പ്രസ്താവനയിൽ ഒപ്പുവെക്കാൻ ട്രംപ് തയ്യാറാകാതെ, ഉച്ചകോടി വെട്ടിച്ചുരുക്കി ഒരു ദിവസം മുൻപേ മടങ്ങിയത് ആശങ്ക വർദ്ധിപ്പിക്കുന്നു. നിലവിൽ, യുഎസ് സൈനിക ആസ്ഥാനമായ പെന്റഗൺ അതീവ ജാഗ്രതാ നിർദ്ദേശം പുറപ്പെടുവിച്ചിരിക്കുകയാണ്.