അഹമ്മദാബാദ്: രാജ്യത്തെ കണ്ണീരിലാഴ്ത്തി അഹമ്മദാബാദിൽ തകർന്നു വീണ എയർ ഇന്ത്യ വിമാനത്തിലെ മുഴുവൻ യാത്രക്കാരും ജീവനക്കാരും മരിച്ചതായി സ്ഥിരീകരണം. വിമാനത്തിലുണ്ടായിരുന്ന 230 യാത്രക്കാരും 12 ജീവനക്കാരുമടക്കം 242 പേരുടെയും മരണം അഹമ്മദാബാദ് പോലീസ് സ്ഥിരീകരിച്ചു. മരിച്ചവരിൽ ഗുജറാത്ത് മുൻ മുഖ്യമന്ത്രി വിജയ് രൂപാണിയും പത്തനംതിട്ട തിരുവല്ല സ്വദേശിനിയായ നഴ്‌സ് രഞ്ജിത ഗോപകുമാറും ഉൾപ്പെടുന്നു.
സർദാർ വല്ലഭ്ഭായ് പട്ടേൽ രാജ്യാന്തര വിമാനത്താവളത്തിൽ നിന്ന് ലണ്ടനിലേക്ക് പറന്നുയർന്ന എഐ-171 ബോയിംഗ് 787 ഡ്രീംലൈനർ വിമാനമാണ് ടേക്ക് ഓഫിന് തൊട്ടുപിന്നാലെ വിമാനത്താവളത്തിന് സമീപമുള്ള ജനവാസ മേഖലയിൽ തകർന്നുവീണത്. ഉച്ചയ്ക്ക് 1:43-നായിരുന്നു രാജ്യത്തെ നടുക്കിയ ദുരന്തം.
നോവായി രഞ്ജിത
ലണ്ടനിൽ നഴ്‌സായി ജോലി ചെയ്തുവരികയായിരുന്നു തിരുവല്ല പുല്ലാട് സ്വദേശിനിയായ രഞ്ജിത. അടുത്തിടെ നാട്ടിൽ ലഭിച്ച സർക്കാർ ജോലിയിൽ പ്രവേശിക്കാൻ എത്തിയതായിരുന്നു. അവധിയെടുത്ത് ലണ്ടനിലെ ജോലിസ്ഥലത്തേക്ക് മടങ്ങുമ്പോഴാണ് ദുരന്തത്തിൽപ്പെട്ടത്. രഞ്ജിതയുടെ മരണവിവരം പത്തനംതിട്ട ജില്ലാ ഭരണകൂടം സ്ഥിരീകരിച്ചിട്ടുണ്ട്.
അപകട കാരണം
പറന്നുയർന്ന വിമാനത്തിന്റെ പിൻഭാഗം വിമാനത്താവളത്തിന് സമീപമുള്ള ഒരു മരത്തിൽ ഇടിച്ചതാണ് അപകടകാരണമെന്നാണ് പ്രാഥമിക നിഗമനം. ഇടിയുടെ ആഘാതത്തിൽ വിമാനത്തിന്റെ ഒരു ചിറക് തകരുകയും നിയന്ത്രണം നഷ്ടപ്പെട്ട് വിമാനം നിലംപതിക്കുകയുമായിരുന്നു. തകർന്നയുടൻ വിമാനത്തിന് തീപിടിക്കുകയും പൂർണ്ണമായി കത്തിയമരുകയും ചെയ്തു.
യാത്രക്കാരിൽ 53 യുകെ പൗരന്മാർ, ഒരു കനേഡിയൻ പൗരൻ, 7 പോർച്ചുഗീസുകാർ എന്നിവരുൾപ്പെടെ 61 വിദേശികളുണ്ടായിരുന്നു. ദേശീയ ദുരന്ത നിവാരണ സേനയുടെ നേതൃത്വത്തിൽ മൃതദേഹങ്ങൾ വീണ്ടെടുക്കാനുള്ള പ്രവർത്തനങ്ങൾ പുരോഗമിക്കുകയാണ്.
