സാവോ പോളോ: സൂപ്പർ താരം വിനീഷ്യസ് ജൂനിയർ നേടിയ ഏക ഗോളിൽ പരാഗ്വയെ കീഴടക്കി ബ്രസീൽ 2026 ഫിഫ ലോകകപ്പിന് യോഗ്യത ഉറപ്പിച്ചു. ഇറ്റാലിയൻ ഇതിഹാസം കാർലോ ആഞ്ചലോട്ടി പരിശീലകനായി ചുമതലയേറ്റ ശേഷമുള്ള ബ്രസീലിന്റെ ആദ്യ ഔദ്യോഗിക ജയം കൂടിയാണിത്. ഇതോടെ, ലോകകപ്പ് യോഗ്യതയെന്ന കടമ്പ കടന്ന കാനറികൾക്ക് ആഞ്ചലോട്ടിക്ക് കീഴിൽ വിശ്വകിരീടത്തിനായുള്ള ഒരുക്കങ്ങൾ ആരംഭിക്കാം.
സാവോ പോളോയിലെ കൊറിന്ത്യൻസ് അരീനയിൽ നടന്ന മത്സരത്തിൽ ബ്രസീൽ സമ്പൂർണ്ണ ആധിപത്യമാണ് പുലർത്തിയത്. 73 ശതമാനം സമയവും പന്ത് കൈവശം വെച്ച ബ്രസീൽ നിരവധി ഗോളവസരങ്ങൾ സൃഷ്ടിച്ചു. മത്സരത്തിന്റെ 44-ാം മിനിറ്റിലായിരുന്നു നിർണായക ഗോൾ പിറന്നത്. വലതുവിങ്ങിലൂടെ മുന്നേറിയ മതേവൂസ് കുന്യ നൽകിയ ക്രോസ്, കൃത്യമായി വലയിലെത്തിച്ച് വിനീഷ്യസ് ജൂനിയർ ബ്രസീലിന് അനിവാര്യമായ ലീഡ് സമ്മാനിച്ചു.
മത്സരത്തിലുടനീളം 11 ഷോട്ടുകളാണ് ബ്രസീൽ പരാഗ്വെയുടെ ഗോൾമുഖത്തേക്ക് പായിച്ചത്. ഇതിൽ നാലെണ്ണം ലക്ഷ്യം കണ്ടെങ്കിലും ഗോൾകീപ്പറുടെ മികവ് കൂടുതൽ ഗോളുകൾ നേടുന്നതിൽ നിന്ന് ബ്രസീലിനെ തടഞ്ഞു.
അർജന്റീനക്ക് സമനില; പത്തുപേരുമായി പൊരുതിക്കയറി
അതേസമയം, ബ്യൂണസ് ഐറിസിൽ നടന്ന മറ്റൊരു മത്സരത്തിൽ ലോകചാമ്പ്യന്മാരായ അർജന്റീനയെ കൊളംബിയ സമനിലയിൽ തളച്ചു. ഇരു ടീമുകളും ഓരോ ഗോൾ വീതം നേടി. 24-ാം മിനിറ്റിൽ ലൂയിസ് ഡിയാസിന്റെ ഗോളിലൂടെ കൊളംബിയയാണ് ആദ്യം മുന്നിലെത്തിയത്. 70-ാം മിനിറ്റിൽ എൻസോ ഫെർണാണ്ടസ് ചുവപ്പുകാർഡ് കണ്ട് പുറത്തായതോടെ അർജന്റീന പത്തുപേരായി ചുരുങ്ങി. എന്നാൽ, പതറാതെ പൊരുതിയ അർജന്റീന 81-ാം മിനിറ്റിൽ തിയാഗോ അൽമാഡയുടെ ഗോളിലൂടെ സമനില പിടിച്ചെടുക്കുകയായിരുന്നു. ലോകകപ്പിന് നേരത്തെ തന്നെ യോഗ്യത നേടിയതിനാൽ ഈ സമനില അർജന്റീനയെ ബാധിക്കില്ല.
