മലപ്പുറം: നിലമ്പൂർ ഉപതിരഞ്ഞെടുപ്പിൽ യു.ഡി.എഫ് സ്ഥാനാർത്ഥി ആര്യാടൻ ഷൗക്കത്തിന്റെ പ്രചാരണത്തിന് ആവേശം പകരാൻ വയനാട് എം.പി പ്രിയങ്കാ ഗാന്ധി എത്തും. വയനാട് ലോക്സഭാ മണ്ഡലത്തിലെ പര്യടനത്തിനായി ജൂൺ 9, 10, 11 തീയതികളിൽ പ്രിയങ്ക കേരളത്തിലെത്തുന്നുണ്ട്. ഈ ദിവസങ്ങളിലൊന്നിൽ അവർ നിലമ്പൂരിലെത്തി ആര്യാടൻ ഷൗക്കത്തിനുവേണ്ടി പ്രചാരണത്തിൽ സജീവമായി പങ്കെടുക്കുമെന്നാണ് യു.ഡി.എഫ് കേന്ദ്രങ്ങൾ നൽകുന്ന വിവരം.
ഒരു ദിവസം പൂർണമായും ആര്യാടൻ ഷൗക്കത്തിന്റെ തിരഞ്ഞെടുപ്പ് പ്രചാരണ പരിപാടികൾക്കായി പ്രിയങ്കാ ഗാന്ധി നിലമ്പൂരിൽ ചെലവഴിക്കുമെന്ന് മുതിർന്ന കോൺഗ്രസ് നേതാക്കൾ അറിയിച്ചു. നിലമ്പൂർ നിയമസഭാ മണ്ഡലം പ്രിയങ്കയുടെ ലോക്സഭാ മണ്ഡലമായ വയനാടിന്റെ ഭാഗമാണ് എന്നത് ശ്രദ്ധേയമാണ്. ഇത് പ്രചാരണത്തിന് കൂടുതൽ കരുത്തേകുമെന്നാണ് യു.ഡി.എഫ് നേതൃത്വത്തിന്റെ വിലയിരുത്തൽ.
ജൂൺ 19-നാണ് നിലമ്പൂർ ഉപതിരഞ്ഞെടുപ്പ് നടക്കുന്നത്. 23-ാം തീയതിയാണ് വോട്ടെണ്ണൽ. കഴിഞ്ഞ തവണ ഇടതുപക്ഷ സ്വതന്ത്രനായി മത്സരിച്ച് വിജയിച്ച പി.വി. അൻവറിന്റെ രാജിക്ക് പിന്നാലെയാണ് മണ്ഡലത്തിൽ ഉപതിരഞ്ഞെടുപ്പിന് കളമൊരുങ്ങിയത്.
പി.വി. അൻവർ ഇടതുമുന്നണിക്കെതിരെയും മുഖ്യമന്ത്രി പിണറായി വിജയനെതിരെയും രൂക്ഷമായ വിമർശനങ്ങൾ ഉന്നയിച്ച് മുന്നണി വിട്ട സാഹചര്യത്തിൽ, നിലമ്പൂരിൽ യു.ഡി.എഫിന് അനായാസ വിജയം നേടാനാകുമെന്നായിരുന്നു ആദ്യഘട്ടത്തിലെ വിലയിരുത്തൽ. എന്നാൽ, യു.ഡി.എഫിൽ തനിക്ക് അർഹമായ സ്ഥാനം ലഭിച്ചില്ലെന്നാരോപിച്ചും, സ്ഥാനാർത്ഥിയായ ആര്യാടൻ ഷൗക്കത്തിനോടുള്ള വ്യക്തിപരമായ വിയോജിപ്പുകൾ ചൂണ്ടിക്കാട്ടിയും പി.വി. അൻവർ സ്വതന്ത്രനായി മത്സരരംഗത്ത് എത്തിയതോടെ നിലമ്പൂരിലെ പോരാട്ടം കനത്തു. ഇതോടെ എല്ലാ മുന്നണികളും പ്രചാരണം ശക്തമാക്കിയിട്ടുണ്ട്. വരും ദിവസങ്ങളിൽ കൂടുതൽ ദേശീയ, സംസ്ഥാന നേതാക്കൾ നിലമ്പൂരിലേക്ക് എത്തുമെന്നാണ് പ്രതീക്ഷിക്കുന്നത്.
