ശമ്പള പരിഷ്കരണം നടപ്പാക്കും, ആശങ്ക വേണ്ട: മുഖ്യമന്ത്രി
ആലപ്പുഴ: സംസ്ഥാന സർക്കാർ ജീവനക്കാരുടെ ശമ്പള പരിഷ്കരണം നടപ്പിലാക്കുമെന്നും ഇക്കാര്യത്തിൽ ജീവനക്കാർക്ക് യാതൊരു ആശങ്കയും വേണ്ടെന്നും മുഖ്യമന്ത്രി പിണറായി വിജയൻ. എൻ.ജി.ഒ യൂണിയന്റെ 62-ാം സംസ്ഥാന സമ്മേളനം ആലപ്പുഴയിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇടതുപക്ഷ ജനാധിപത്യ മുന്നണി എന്തെങ്കിലും വാഗ്ദാനം നൽകിയിട്ടുണ്ടെങ്കിൽ അത് നടപ്പിലാക്കിയിരിക്കുമെന്നും മുഖ്യമന്ത്രി ഉറപ്പുനൽകി.
സംസ്ഥാന സർക്കാർ നിരവധി സാമ്പത്തിക പ്രയാസങ്ങൾ നേരിട്ടിട്ടും ജീവനക്കാരുടെ ശമ്പളം ഒരു ഘട്ടത്തിലും മുടക്കിയിട്ടില്ലെന്ന് മുഖ്യമന്ത്രി ചൂണ്ടിക്കാട്ടി. “2018-ലെ മഹാപ്രളയത്തിന് ശേഷം സംസ്ഥാനം കടുത്ത സാമ്പത്തിക ഞെരുക്കം നേരിട്ടപ്പോൾ സർക്കാർ ജീവനക്കാരോട് ഒരു അഭ്യർത്ഥന നടത്തി. സാലറി ചലഞ്ച് വിജയിപ്പിക്കുന്നതിന് എല്ലാവരും താൽപ്പര്യപൂർവ്വം ഇടപെട്ടു. സർക്കാർ കാര്യങ്ങൾ നിർവഹിക്കുന്നതിൽ എല്ലാ ജീവനക്കാരും നിർണായക പങ്കുവഹിച്ചു,” മുഖ്യമന്ത്രി പറഞ്ഞു.
വിവിധ മേഖലകളിൽ കേന്ദ്രസർക്കാർ കേരളത്തെ സാമ്പത്തികമായി ശ്വാസം മുട്ടിക്കുകയാണെന്നും മുഖ്യമന്ത്രി ആരോപിച്ചു. “ഇത് കേന്ദ്രത്തിന്റെ ഔദാര്യമല്ല, സംസ്ഥാനത്തിന് അർഹതപ്പെട്ടതാണ്. എന്നാൽ, കിട്ടേണ്ട പലതും കേന്ദ്രം നൽകിയില്ല. കേന്ദ്ര-സംസ്ഥാന സംയുക്ത പദ്ധതികളിൽ പോലും കേന്ദ്ര വിഹിതം കൃത്യമായി ലഭിച്ചില്ല. വായ്പയെടുക്കാനുള്ള സംസ്ഥാനത്തിന്റെ അവകാശത്തെപ്പോലും കേന്ദ്രം തടസ്സപ്പെടുത്തി. ഇത്രയധികം സാമ്പത്തിക പ്രയാസങ്ങൾക്കിടയിലും ജീവനക്കാരുടെ ശമ്പളം മുടങ്ങിയിട്ടില്ല, കോവിഡ് കാലത്ത് പോലും അത് കൃത്യമായി നൽകി,” അദ്ദേഹം കൂട്ടിച്ചേർത്തു.
ഇടക്കാലത്ത് ക്ഷേമ പെൻഷൻ വിതരണം മുടങ്ങിയെന്നത് യാഥാർത്ഥ്യമാണെന്നും എന്നാൽ ആ പ്രശ്നം പരിഹരിച്ചതായും മുഖ്യമന്ത്രി പറഞ്ഞു. “ക്ഷേമ പെൻഷനുകൾ ഇനിമുതൽ മാസംതോറും കൃത്യമായി നൽകും. നിലവിലുള്ള കുടിശ്ശിക മുഴുവൻ ഉടൻതന്നെ കൊടുത്തുതീർക്കാനുള്ള നടപടികൾ സ്വീകരിച്ചിട്ടുണ്ട്,” മുഖ്യമന്ത്രി വ്യക്തമാക്കി.
