ജോ ബൈഡന് കാൻസർ സ്ഥിരീകരിച്ചു
ന്യൂയോർക്ക്: അമേരിക്കൻ മുൻ പ്രസിഡൻറ് ജോ ബൈഡന് കാൻസർ. ഞായറാഴ്ച ജോ ബൈഡൻറെ ഓഫീസ് നൽകിയ പ്രസ്താവനയിൽ ആണ് ഇക്കാര്യം സ്ഥിരീകരിച്ചത്. രോഗ ലക്ഷണങ്ങൾ കണ്ടതിനെ തുടർന്ന് കഴിഞ്ഞ ആഴ്ചയാണ് ബൈഡൻ ഡോക്ടറെ കണ്ടത്. തുടർന്ന് വെള്ളിയാഴ്ചയാണ് പ്രോസ്റ്റെറ്റ് കാൻസർ രോഗം സ്ഥിരീകരിച്ചത്. കാൻസർ എല്ലുകളിലേക്ക് പടർന്നതായി കണ്ടെത്തിയിട്ടുണ്ട്. വളരെ വേഗത്തിൽ പടരുന്ന വിഭാഗത്തിലുള്ള പ്രോസ്റ്റെറ്റ് കാൻസറാണ് ബൈഡന് സ്ഥിരീകരിച്ചിട്ടുള്ളത്. രോഗാവസ്ഥ വിശദമാക്കുന്നതിനായുള്ള ഗ്ലീസൺ സ്‌കോറിൽ 10 ൽ ഒമ്പതാണ് ബൈഡൻറെ രോഗാവസ്ഥ.
മൂത്രാശയ സംബന്ധമായ ലക്ഷണങ്ങളെ തുടർന്ന് കഴിഞ്ഞ ആഴ്ച ബൈഡൻ ഡോക്ടർമാരെ കണ്ടിരുന്നു. ഒരു സാധാരണ ശാരീരിക പരിശോധനയിൽ അദ്ദേഹത്തിന്റെ പ്രോസ്റ്റേറ്റിൽ ഒരു ചെറിയ മുഴ കണ്ടെത്തുകയും ഇത് കൂടുതൽ പരിശോധനകൾക്ക് വിധേയമാക്കാൻ പ്രേരിപ്പിക്കുകയുമായിരുന്നു. വെള്ളിയാഴ്ചയോടെ നടത്തിയ പരിശോധനകളിൽ പ്രോസ്റ്റേറ്റ് കാൻസർ സ്ഥിരീകരിക്കുകയായിരുന്നു. കാൻസർ കോശങ്ങൾ എല്ലുകളിലേക്ക് വ്യാപിച്ചതായും കണ്ടെത്തിയിട്ടുണ്ട്.
‘ഇത് രോഗത്തിന്റെ കൂടുതൽ ഗുരുതരമായ രൂപമാണെങ്കിലും, കാൻസർ ഹോർമോൺ സെൻസിറ്റീവ് ആയതിനാൽ ഫലപ്രദമായി കൈകാര്യം ചെയ്യാൻ സാധിക്കും,’ ബൈഡന്റെ ഓഫീസ് പ്രസ്താവനയിൽ പറഞ്ഞു. ‘പ്രസിഡന്റും കുടുംബവും അദ്ദേഹത്തിന്റെ ഡോക്ടർമാരുമായി ചികിത്സാ രീതികൾ ആലോചിച്ചുവരികയാണ്.’
’82-കാരനായ മുൻ യുഎസ് പ്രസിഡന്റ് ജോ ബൈഡന്റെ ആരോഗ്യസ്ഥിതി പലപ്പോഴും പൊതുശ്രദ്ധ നേടിയിട്ടുണ്ട്. ജനുവരിയിൽ സ്ഥാനമൊഴിഞ്ഞതിനുശേഷം, ബൈഡൻ പൊതുരംഗത്ത് നിന്ന് വിട്ടുനിൽക്കുകയായിരുന്നെങ്കിലും യുഎസ് പ്രസിഡന്റ് ട്രംപിന്റെ ആദ്യ 100 ദിവസങ്ങൾക്ക് ശേഷമുള്ള അഭിമുഖങ്ങൾ ഉൾപ്പെടെ ഏതാനും തവണ മാധ്യമങ്ങളിൽ പ്രത്യക്ഷപ്പെട്ടിട്ടുണ്ട്.
