സംയുക്ത ട്രേഡ് യൂണിയൻ പണിമുടക്ക് മാറ്റി
ന്യൂഡൽഹി: കേന്ദ്രസർക്കാർ തൊഴിലാളി വിരുദ്ധ നയങ്ങൾ നടത്തുകയാണെന്നാരോപിച്ച് സംയുക്ത ട്രേഡ് യൂണിയന്റെ നേതൃത്വത്തിൽ മെയ് 20ന് നടത്താൻ നിശ്ചയിച്ച പണിമുടക്ക് ജൂലൈ ഒമ്പതിലേക്ക് മാറ്റി. രാജ്യത്തെ നിലവിലെ സാഹചര്യം കണക്കിലെടുത്താണ് വ്യാഴാഴ്ച്ച ചേർന്ന യൂണിയനുകളുടെ യോഗം പണിമുടക്ക് മാറ്റിയത്.
14 ദേശീയ ട്രേഡ് യൂണിയനുകളും കേന്ദ്ര – സംസ്ഥാന സർക്കാർ ജീവനക്കാരുടെ സംഘടനകളും പൊതുമേഖലാ സ്ഥാപനങ്ങളിലെ ജീവനക്കാരുടെ സംഘടനകളും ചേർന്നാണ് ദേശീയ പണിമുടക്കിന് ആഹ്വാനം ചെയ്തത്.
“രാജ്യത്തുടനീളമുള്ള നിലവിലെ സാഹചര്യം വേണ്ടത്ര പരിഗണിച്ച ശേഷം, ഉത്തരവാദിത്തബോധമുള്ള ദേശസ്നേഹികളായ പൗരന്മാരുടെ അവിഭാജ്യ ഘടകമെന്ന നിലയിൽ, ദേശീയ പണിമുടക്ക് 2025 മെയ് 20 ന് പകരം ജൂലൈ 9 ന് പുനഃക്രമീകരിക്കാൻ സംയുക്ത പ്ലാറ്റ്ഫോം തീരുമാനിച്ചു,” പ്രസ്താവനയിൽ പറയുന്നു.
തൊഴിലാളി നിയമങ്ങളുടെ നടപ്പാക്കലിനെ എതിർക്കുകയും തൊഴിലാളികൾ, കർഷകർ, പൊതുജനങ്ങൾ എന്നിവരുടെ മറ്റ് ന്യായമായ ആവശ്യങ്ങൾക്കായി സമ്മർദ്ദം ചെലുത്തുകയുമാണ് പണിമുടക്കിന്റെ ലക്ഷ്യം.
യഥാർത്ഥ പദ്ധതിയിൽ മെയ് 20 ന് സംസ്ഥാന തലസ്ഥാനങ്ങളിലും ജില്ലാ കേന്ദ്രങ്ങളിലും തൊഴിലിടങ്ങളിലും പ്രതിഷേധങ്ങൾ സംഘടിപ്പിക്കാൻ തീരുമാനിച്ചിരുന്നു. തീയതി മാറിയെങ്കിലും, നിലവിലുള്ള തൊഴിൽ പ്രശ്നങ്ങളിലുള്ള തങ്ങളുടെ ആശങ്ക യൂണിയനുകൾ ആവർത്തിച്ചു.
