കൂർക്കംവലി മരുന്നില്ലാതെ എങ്ങനെ സുഖപ്പെടുത്താം..? എന്താണ് കാരണങ്ങളും ചികിത്സയും?

ഉറക്കത്തിൽ കൂർക്കംവലിക്കുന്ന നിരവധി ആളുകൾ നമുക്ക് ചുറ്റുമുണ്ട്. ഇത് കേൾക്കുന്നവർക്ക് ബുദ്ധിമുട്ടുണ്ടാക്കുന്നതിനോടൊപ്പം കൂർക്കം വലിക്കുന്ന വ്യക്തിയുടെ ആരോഗ്യത്തിനും ദോഷകരമാകാറുണ്ട്. എന്നാൽ മരുന്നില്ലാതെ തന്നെ കൂർക്കംവലിക്ക് ഒരു പരിധി വരെ പരിഹാരം കാണാൻ സാധിക്കുമെന്ന് ആരോഗ്യ വിദഗ്ധർ അഭിപ്രായപ്പെടുന്നു.

ശരിയായ ജീവിതശൈലി പിന്തുടരുന്നതിലൂടെയും ചില ലഘുവായ വ്യായാമങ്ങളിലൂടെയും കൂർക്കംവലിയെ നിയന്ത്രിക്കാനാകും. അമിതഭാരം കുറയ്ക്കുക എന്നതാണ് ഇതിൽ പ്രധാനപ്പെട്ട ഒരു കാര്യം. ശരീരഭാരം കൂടുമ്പോൾ കഴുത്തിലെ കോശങ്ങൾ ശ്വാസനാളത്തിൽ തടസ്സമുണ്ടാക്കുകയും ഇത് കൂർക്കംവലിക്ക് കാരണമാകുകയും ചെയ്യും. അതിനാൽ ശരീരഭാരം നിയന്ത്രിച്ച് ആരോഗ്യകരമായ ജീവിതശൈലി പിന്തുടരുക.

ഉറങ്ങുമ്പോൾ മലർന്നു കിടക്കുന്നതിന് പകരം ഒരു വശം ചരിഞ്ഞു കിടക്കുന്നത് കൂർക്കംവലി കുറയ്ക്കാൻ സഹായിക്കും. തല അല്പം ഉയർത്തി വച്ച് കിടക്കുന്നതും ശ്വാസനാളം തുറക്കാൻ ഉത്തമമാണ്. പുകവലിയും മദ്യപാനവും പൂർണ്ണമായും ഒഴിവാക്കുന്നതിലൂടെ കൂർക്കംവലിയുടെ കാഠിന്യം കുറയ്ക്കാൻ സാധിക്കും. ഉറങ്ങുന്നതിന് തൊട്ടുമുൻപ് മദ്യപിക്കുന്നത് തൊണ്ടയിലെ പേശികളെ കൂടുതൽ അയക്കുകയും കൂർക്കംവലിക്ക് കാരണമാകുകയും ചെയ്യും. അതുപോലെ, ദിവസവും 7-8 മണിക്കൂർ നിർബന്ധമായും ഉറങ്ങണം. ശരീരത്തിൽ ആവശ്യത്തിന് ജലാംശം നിലനിർത്തുന്നതും മൂക്കിലെ തടസ്സങ്ങൾ ഇല്ലാതാക്കാൻ സഹായിക്കും.

തൊണ്ടയിലെയും നാക്കിലെയും പേശികളെ ബലപ്പെടുത്തുന്ന ചില വ്യായാമങ്ങളും കൂർക്കംവലിക്ക് പരിഹാരമായി നിർദ്ദേശിക്കപ്പെടുന്നു. നാക്ക് പുറത്തേക്ക് നീട്ടി മുകളിലേക്കും താഴേക്കും ചലിപ്പിക്കുക, കവിളുകൾ ഉള്ളിലേക്ക് വലിക്കുക തുടങ്ങിയ ലഘു വ്യായാമങ്ങൾ ഇതിന് ഉദാഹരണമാണ്.

അലർജി, ജലദോഷം തുടങ്ങിയ മൂക്കിലെ തടസ്സങ്ങൾ കാരണം കൂർക്കംവലി ഉണ്ടാകുന്നവർ അതിനുള്ള ചികിത്സ തേടേണ്ടത് അത്യാവശ്യമാണ്. നാസൽ സ്‌പ്രേ, നാസൽ സ്ട്രിപ്പുകൾ എന്നിവ ഉപയോഗിക്കുന്നതും ഗുണം ചെയ്യും. വരണ്ട കാലാവസ്ഥയിൽ ഹ്യുമിഡിഫയർ ഉപയോഗിക്കുന്നത് അന്തരീക്ഷത്തിലെ ഈർപ്പം നിലനിർത്താനും ശ്വാസനാളത്തിലെ പ്രകോപനം കുറയ്ക്കാനും സഹായിക്കും.

ഈ ലളിതമായ വഴികൾ പരീക്ഷിച്ചിട്ടും കൂർക്കംവലിക്ക് മാറ്റമില്ലെങ്കിൽ ഒരു ഡോക്ടറെ കണ്ട് ഉപദേശം തേടുന്നത് സുരക്ഷിതമാണ്. ഇത് ചിലപ്പോൾ സ്ലീപ് അപ്നിയ പോലുള്ള ഗുരുതരമായ ആരോഗ്യപ്രശ്‌നങ്ങളുടെ ലക്ഷണമാകാൻ സാധ്യതയുണ്ടെന്നും ആരോഗ്യ വിദഗ്ധർ മുന്നറിയിപ്പ് നൽകുന്നു.