1600 കോടി പാസ്‌വേഡുകൾ ലീക്കായി; നിങ്ങളുടെ ഫേസ്ബുക്കും ഗൂഗിളും സുരക്ഷിതമാണോ? ഉടൻ ചെയ്യേണ്ട കാര്യങ്ങൾ
ന്യൂ ഡൽഹി: ലോകത്തെ ഏറ്റവും വലിയ ഡാറ്റാ ചോർച്ചകളിലൊന്നിൽ, ഫേസ്ബുക്ക്, ഇൻസ്റ്റാഗ്രാം, ജിമെയിൽ, ആപ്പിൾ ഐഡി എന്നിവയുൾപ്പെടെ 1600 കോടി (16 ബില്യൺ) ലോഗിൻ വിവരങ്ങൾ ചോർന്നതായി റിപ്പോർട്ട്. സൈബർ ന്യൂസ് ഗവേഷകർ കണ്ടെത്തിയ ഈ ‘ചരിത്രത്തിലെ ഏറ്റവും വലിയ’ പാസ്‌വേഡ് ചോർച്ച, ലോകമെമ്പാടുമുള്ള കോടിക്കണക്കിന് ഇന്റർനെറ്റ് ഉപഭോക്താക്കളെ അപകടത്തിലാക്കുന്നു. നിങ്ങളുടെ ഓൺലൈൻ അക്കൗണ്ടുകൾ സുരക്ഷിതമാക്കാൻ ഉടൻ തന്നെ നടപടികൾ സ്വീകരിക്കണമെന്ന് വിദഗ്ധർ മുന്നറിയിപ്പ് നൽകുന്നു.
എന്താണ് സംഭവിച്ചത്?
30 ഡാറ്റാബേസുകളിലായാണ് 1600 കോടി ലോഗിൻ വിവരങ്ങൾ കണ്ടെത്തിയത്. ഇതിൽ യൂസർ നെയിം, പാസ്‌വേഡ്, വെബ്സൈറ്റ് വിലാസം എന്നിവയുൾപ്പെടെയുണ്ട്. ഇൻഫോസ്റ്റീലർ മാൽവെയർ (infostealer malware) എന്നറിയപ്പെടുന്ന, കമ്പ്യൂട്ടറുകളിൽ നിന്നും മൊബൈലുകളിൽ നിന്നും വിവരങ്ങൾ മോഷ്ടിക്കുന്ന സോഫ്റ്റ്‌വെയറുകൾ വഴിയാണ് ഈ ഡാറ്റകൾ ശേഖരിച്ചതെന്ന് കരുതുന്നു.
ഈ ഡാറ്റകൾ കുറഞ്ഞ സമയത്തേക്ക് ആർക്കും ലഭ്യമാകുന്ന തരത്തിൽ സുരക്ഷിതമല്ലാത്ത അവസ്ഥയിലായിരുന്നു. ചോർന്ന ഡാറ്റകളിൽ ഭൂരിഭാഗവും മുൻപ് റിപ്പോർട്ട് ചെയ്യപ്പെടാത്ത ‘പുതിയ’ വിവരങ്ങളാണെന്നത് ഇതിന്റെ ഗൗരവം വർധിപ്പിക്കുന്നു.
എന്താണ് അപകടം?
ഈ ചോർന്ന പാസ്‌വേഡുകൾ ഉപയോഗിച്ച് സൈബർ കുറ്റവാളികൾക്ക് നിങ്ങളുടെ സോഷ്യൽ മീഡിയ, ഇമെയിൽ, ബാങ്കിംഗ് അക്കൗണ്ടുകൾ എന്നിവയിലേക്ക് എളുപ്പത്തിൽ പ്രവേശിക്കാൻ സാധിക്കും. ഇത് സാമ്പത്തിക തട്ടിപ്പുകൾക്കും, ഐഡന്റിറ്റി മോഷണത്തിനും, വ്യാജ സന്ദേശങ്ങളിലൂടെയുള്ള ഫിഷിംഗ് തട്ടിപ്പുകൾക്കും വഴിവെക്കും.
അടിയന്തരമായി ചെയ്യേണ്ട കാര്യങ്ങൾ
ഈ സാഹചര്യത്തിൽ, എല്ലാ ഇന്റർനെറ്റ് ഉപഭോക്താക്കളും താഴെ പറയുന്ന സുരക്ഷാ നടപടികൾ ഉടൻ സ്വീകരിക്കണമെന്ന് സൈബർ വിദഗ്ധർ നിർദ്ദേശിക്കുന്നു:
- പാസ്‌വേഡുകൾ മാറ്റുക: നിങ്ങളുടെ ഫേസ്ബുക്ക്, ഇൻസ്റ്റാഗ്രാം, ജിമെയിൽ, ബാങ്കിംഗ് എന്നിവയുൾപ്പെടെ എല്ലാ പ്രധാനപ്പെട്ട ഓൺലൈൻ അക്കൗണ്ടുകളുടെയും പാസ്‌വേഡുകൾ ഉടൻ മാറ്റുക.
- മൾട്ടി-ഫാക്ടർ ഓതന്റിക്കേഷൻ (MFA) എനേബിൾ ചെയ്യുക: പാസ്‌വേഡിന് പുറമെ, നിങ്ങളുടെ ഫോണിലേക്ക് വരുന്ന ഒടിപി (OTP) അല്ലെങ്കിൽ കോഡ് ഉപയോഗിച്ച് മാത്രം ലോഗിൻ ചെയ്യാൻ കഴിയുന്ന ഈ സംവിധാനം എല്ലാ അക്കൗണ്ടുകളിലും പ്രവർത്തിപ്പിക്കുക.
- ശക്തമായ പാസ്‌വേഡുകൾ ഉപയോഗിക്കുക: ഓരോ അക്കൗണ്ടിനും വ്യത്യസ്തവും ഊഹിക്കാൻ പ്രയാസമുള്ളതുമായ പാസ്‌വേഡുകൾ ഉപയോഗിക്കുക. ഇതിനായി പാസ്‌വേഡ് മാനേജർ ആപ്പുകളുടെ സഹായം തേടാം.
- അക്കൗണ്ടുകൾ നിരീക്ഷിക്കുക: നിങ്ങളുടെ അക്കൗണ്ടുകളിൽ അസ്വാഭാവികമായ എന്തെങ്കിലും പ്രവർത്തനങ്ങൾ നടക്കുന്നുണ്ടോ എന്ന് regulary പരിശോധിക്കുക.
- വിവരം ചോർന്നിട്ടുണ്ടോ എന്ന് പരിശോധിക്കാം: ‘Have I Been Pwned’ പോലുള്ള വെബ്സൈറ്റുകൾ വഴി നിങ്ങളുടെ ഇമെയിൽ ഐഡി നൽകി, ഏതൊക്കെ ഡാറ്റാ ചോർച്ചകളിൽ നിങ്ങളുടെ വിവരങ്ങൾ ഉൾപ്പെട്ടിട്ടുണ്ടെന്ന് പരിശോധിക്കാവുന്നതാണ്.
