ആർ ബിന്ദുവിന് നേരിട്ട് നൽകിയ അപേക്ഷ മാലിന്യകൂമ്പാരത്തിൽ; അന്വേഷിക്കുമെന്ന് മന്ത്രി

തൃശൂർ: മന്ത്രി ആർ.ബിന്ദുവിന് നേരിട്ട് നൽകിയ സ്ഥലംമാറ്റ നിവേദനം മാലിന്യ കൂമ്പാരത്തിൽ കണ്ടെത്തി. തൃശൂർ സാമൂഹികനീതി വകുപ്പ് നടത്തിയ നശാ മുക്ത് ഭാരത് അഭിയാൻ പരിപാടിയിലാണ് ശാരീരിക പരിമിതിയുള്ള ഉദ്യോഗസ്ഥന് സ്ഥലംമാറ്റം ലഭിക്കാൻ അദ്ദേഹത്തിന്‌റെ ഭാര്യ മന്ത്രിക്ക് നേരിട്ട് അപേക്ഷ നൽകിയത്.

എന്നാൽ മന്ത്രി പങ്കെടുത്ത പരിപാടിയുടെ മാലിന്യങ്ങൾ തൃശൂർ ചേർപ്പിൽ വഴിയോരത്ത് തള്ളിയ നിലയിലായിരുന്നു. ഇതിൽനിന്നാണ് സ്ഥലംമാറ്റ അപേക്ഷ കണ്ടെത്തിയത്.

അതേസമയം തനിക്ക് നൽകിയ അപേക്ഷ ചവറുകൂനയിൽ കാണപ്പെട്ടത് ഗൗരവമായി പരിശോധിക്കുമെന്ന് മന്ത്രി പ്രതികരിച്ചു. പേഴ്സണൽ സ്റ്റാഫിന് വീഴ്ചയുണ്ടായോയെന്ന് പരിശോധിക്കും. അപേക്ഷ പൊതുസ്ഥലംമാറ്റത്തിൽ പരിഗണിക്കാൻ നേരത്തേ തന്നെ നിർദേശം നൽകിയിരുന്നതായും മന്ത്രി കൂട്ടിച്ചേർത്തു.