ശമ്പള പരിഷ്കരണ കമ്മീഷൻ ഏപ്രിലിൽ; കുടിശിക എന്ന് കിട്ടുമെന്ന് അറിയാതെ ജീവനക്കാർ

ശമ്പള പരിഷ്കരണ കമ്മീഷനെ ഏപ്രിലിൽ പ്രഖ്യാപിക്കും. ഇടഞ്ഞ് നിൽക്കുന്ന സർക്കാർ ജീവനക്കാരേയും പെൻഷൻകാരേയും അടുപ്പിക്കുന്നതിൻ്റെ ഭാഗമായാണ് ശമ്പള പരിഷ്കരണ കമ്മീഷനെ പ്രഖ്യാപിക്കാൻ തീരുമാനിച്ചത്.

1.7.24 മുതൽ പ്രാബല്യത്തിൽ ജീവനക്കാർക്കും പെൻഷൻകാർക്കും ശമ്പള പെൻഷൻ പരിഷ്കരണം ലഭിക്കേണ്ടതാണ്. ബജറ്റിൽ ശമ്പള പരിഷ്കരണ കമ്മീഷനെ പ്രഖ്യാപിക്കുമെന്നായിരുന്നു ജീവനക്കാരുടെയും പെൻഷൻകാരായും പ്രതീക്ഷ. എന്നാൽ അത് ഉണ്ടായില്ല. പതിനൊന്നാം ശമ്പള പരിഷ്കരണ കുടിശിക ജീവനക്കാർക്ക് ഇതുവരെ ലഭിച്ചിട്ടില്ല.

2021 ഫെബ്രുവരിയിൽ പുറത്തിറങ്ങിയ പതിനൊന്നാം ശമ്പള പരിഷ്കരണ ഉത്തരവിൽ കുടിശിക 4 ഗഡുക്കളായി നൽകും എന്നായിരുന്നു പ്രഖ്യാപിച്ചത്.2023 ഏപ്രിൽ, ഒക്ടോബർ, 2024 ഏപ്രിൽ, ഒക്ടോബർ എന്നീ മാസങ്ങളിൽ 4 തുല്യ ഗഡുക്കളായി കുടിശിക പി.എഫിൽ ലയിപ്പിക്കുമെന്നായിരുന്നു ഉത്തരവ്. എന്നാൽ സർക്കാർ അത് നീട്ടി വയ്ക്കുക ആണ് ഉണ്ടായത്. ഫെബ്രുവരി 7 ന് അവതരിപ്പിച്ച 2025 – 26 ലെ ബജറ്റിൽ ആദ്യ രണ്ട് കുടിശിക ഗഡുക്കൾ പി.എഫിൽ ലയിപ്പിക്കുമെന്ന് ബാലഗോപാൽ പ്രഖ്യാപിച്ചു. ബാക്കി രണ്ട് ഗഡുക്കൾ അടുത്ത സർക്കാരിൻ്റെ തലയിൽ വച്ച് ബാലഗോപാൽ കസേര ഒഴിയും.

പെൻഷൻ പരിഷ്കരണത്തിൻ്റെ അവസാന ഗഡു പെൻഷൻകാർക്ക് 27 മുതൽ വിതരണം ചെയ്യും. ഫെബ്രുവരി 7 ലെ ബജറ്റ് പ്രഖ്യാപനത്തെ തുടർന്ന് 12 ന് ഉത്തരവ് ഇറങ്ങിയെങ്കിലും പണം വിതരണം ചെയ്യാൻ സാധിച്ചിരുന്നില്ല. പെൻഷൻ പരിഷ്കരണത്തിൻ്റെ ഭാഗമായി വരുന്ന 2 ഗഡു ക്ഷാമ ആശ്വാസ പരിഷ്കരണത്തെ കുറിച്ച് ബാലഗോപാൽ ബജറ്റിൽ മൗനം പാലിച്ചു. അതും അടുത്ത സർക്കാരിൻ്റെ തലയിൽ വച്ച് ബാലഗോപാൽ കസേര ഒഴിയും.

പന്ത്രണ്ടാം ശമ്പള പരിഷ്കരണ കമ്മീഷനെ ഏപ്രിലിൽ പ്രഖ്യാപിക്കുമെങ്കിലും കമ്മീഷൻ്റെ പ്രവർത്തനം തുടങ്ങാൻ ഒരു മാസം കൂടി എടുക്കും. ആറ് മാസത്തിനുള്ളിൽ റിപ്പോർട്ട് നൽകാൻ നിർദ്ദേശിക്കും എന്നാണ് സൂചന. കഴിഞ്ഞ തവണത്തെപ്പോലെ ഫെബ്രുവരി മാസം ശമ്പള പരിഷ്കരണ ഉത്തരവ് ഇറങ്ങും.

ഭൂരിഭാഗം ക്ഷാമബത്തയും അടിസ്ഥാന ശമ്പളത്തിൽ ലയിപ്പിക്കുന്ന രീതിയിൽ ശമ്പള പരിഷ്കരണം നടക്കുന്നതോടെ ക്ഷാമബത്ത നൽകി എന്ന പ്രതീതിയും ഉണ്ടാക്കാൻ സാധിക്കും. ഇത് വഴി ജീവനക്കാരുടെയും പെൻഷൻകാരുടേയും അപ്രീതി ഒഴിവാക്കാം എന്നാണ് കണക്ക്കൂട്ടൽ.