കിഫ്ബിയിലെ പിൻവാതിൽ നിയമനങ്ങളെ ന്യായീകരിച്ച് മുഖ്യമന്ത്രി. കിഫ്ബിയിൽ ലക്ഷങ്ങൾ ശമ്പളം വാങ്ങുന്ന ജീവനക്കാർ ഉണ്ടെന്നും ആരാണ് ഇവരുടെ ശമ്പളം നിശ്ചയിക്കുന്നതെന്നും പ്രതിപക്ഷ നേതാവ് വി.ഡി. സതീശൻ കിഫ്ബി അടിയന്തിര പ്രമേയത്തിൻ്റെ വാക്കൗട്ട് പ്രസംഗത്തിൽ ഉന്നയിച്ചിരുന്നു .
അടിയന്തിര പ്രമേയം അവതരിപ്പിച്ച റോജി എം ജോൺ എം.എൽ.എയും കിഫ്ബിയിലെ സി.ഇ.ഒ കെ.എം എബ്രഹാമിൻ്റെ അടിക്കടിയുള്ള ശമ്പള വർധനവിനെ വിമർശിച്ചിരുന്നു.
അടിയന്തിര പ്രമേയത്തിന് മറുപടി പറഞ്ഞ ധനമന്ത്രി കെ.എൻ. ബാലഗോപാൽ ഇതിന് മറുപടി പറഞ്ഞില്ല. ഇന്ന് ബജറ്റ് ചർച്ചയിൽ മുഖ്യമന്ത്രി കിഫ്ബിയെ ന്യായീകരിച്ച് എഴുതി കൊണ്ടുവന്ന മറുപടി വായിക്കുക ആയിരുന്നു.
കിഫ്ബിയില്‍ സര്‍വീസില്‍ നിന്നും വിരമിച്ച 14 ജീവനക്കാര്‍ ജോലി ചെയുന്നുണ്ടെന്ന് മുഖ്യമന്ത്രി വ്യക്തമാക്കി. കിഫ്ബിയില്‍ ആകെ 180 ജീവനക്കാരാണ് ജോലി ചെയുന്നത്. അതായത് 7 ശതമാനം വിരമിച്ച ജീവനക്കാര്‍ മാത്രമാണ് കിഫ്ബിയില്‍ ജോലി ചെയ്യുന്നതെന്നായിരുന്നു മുഖ്യമന്ത്രിയുടെ ന്യായീകരണം. എന്നാൽ ഇവരുടെ അടിക്കടിയുള്ള ശമ്പള വർധനവിനെ കുറിച്ച് മുഖ്യമന്ത്രി മൗനം പാലിച്ചു.
കേരളത്തിൽ എല്ലാ വർഷവും ശമ്പള വർധന ലഭിക്കുന്ന വ്യക്തിയാണ് കിഫ്ബി സി.ഇ.ഒ കെ.എം. എബ്രഹാം. ചീഫ് സെക്രട്ടറിയായി വിരമിച്ച കെ.എം എബ്രഹാം 2018 ൽ ആണ് കിഫ്ബി സി.ഇ.ഒ ആകുന്നത്. 2.75 ലക്ഷമായിരുന്നു തുടക്കത്തിലെ ശമ്പളം. പിന്നിട് 2019 ജനുവരിയിൽ 27, 500 രൂപയും 2020 ൽ 27,500 രൂപയും 2022 ൽ 19,250 രൂപയും 2023 ൽ 19,250 രൂപയും 2024 ഏപ്രിൽ മാസത്തിൽ 19,250 രൂപയും എബ്രഹാമിന്റെ ശമ്പളത്തിൽ വർദ്ധിപ്പിച്ചു.
5 തവണയാണ് എബ്രഹാമിന്റെ ശമ്പളം വർദ്ധിപ്പിച്ചത്. നിലവിൽ കെ.എം. എബ്രഹാമിന്റെ ശമ്പളം 3,87,750 രൂപയാണ്. ഈ വർഷവും ശമ്പളത്തിൽ 19, 250 രൂപയുടെ വർധനയാണ് വരുത്തുന്നത്. ഇതോടെ എബ്രഹാമിന്റെ ശമ്പളം 4.07 ലക്ഷം ആകും.പുതിയ ശമ്പള വർധനക്ക് 2025 ഏപ്രിൽ മുതൽ പ്രാബല്യം ഉണ്ടായിരിക്കും.
2024 ഒക്ടോബർ 8 ന് കെ.എൻ. ബാലഗോപാൽ നിയമസഭയിൽ നൽകിയ മറുപടി പ്രകാരം ശമ്പളവും മറ്റ് ആനുകൂല്യങ്ങളും ആയി എബ്രഹാമിന് നൽകിയത് 2,73,23,704 രൂപയാണ്. ശമ്പള ഇനത്തിൽ 2,66,19,704 രൂപയും ലീവ് സറണ്ടർ ആയി 6,84,750 രൂപയും ഉൽസവ ബത്തയായി 19,250 രൂപയും എബ്രഹാം കൈപറ്റിയിട്ടുണ്ടെന്ന് ധനമന്ത്രി വ്യക്തമാക്കിയിരുന്നു.
കരാർ ഇനത്തിലാണ് എബ്രഹാം ശമ്പളം കൈപറ്റുന്നത്. അതു കൊണ്ടുള്ള പ്രധാന ഗുണം പെൻഷനും കൈ പറ്റാം. ചീഫ് സെക്രട്ടറി പെൻഷനും എബ്രഹാമിന് ശമ്പളത്തോടൊപ്പം ലഭിക്കും. 2.50 ലക്ഷമാണ് ചീഫ് സെക്രട്ടറി പെൻഷൻ. നിലവിൽ എബ്രഹാമിന് ലഭിക്കുന്ന കരാർ ശമ്പളം 3,87,750 രൂപ. പെൻഷനും ശമ്പളവും കൂടി എബ്രഹാമിന് മാസം ലഭിക്കുന്നത് 6.37 ലക്ഷം രൂപ. ശമ്പളം വീണ്ടും വർദ്ധിപ്പിക്കുന്നതോടെ ഈ തുക വീണ്ടും ഉയരും.
