എറണാകുളം നോർത്ത് പറവൂരില്‍ ഒരു വീട്ടില്‍ അനധികൃതമായി താമസിച്ചുവന്നിരുന്ന 27 ബംഗ്ലാദേശ് പൗരൻമാരെ പോലീസ് അറസ്റ്റ് ചെയ്തു. ഇവരെല്ലാവരും വ്യാജ ആധാർ കാർഡുകള്‍ ഉപയോഗിച്ചിരുന്നുവെന്നും പോലീസ് കണ്ടെത്തി.
50 പേരായിരുന്നു ഈ വീട്ടില്‍ താമസിച്ചിരുന്നത്. മറ്റുള്ളവരുടെ രേഖകള്‍ കൃത്യമാണെന്ന് കണ്ട് അവരെ വിട്ടയച്ചു. എറണാകുളം റൂറൽ പൊലീസും തീവ്രവാദ വിരുദ്ധസേനയും ഓപ്പറേഷൻ ക്ളീൻ എന്ന പേരിൽ സംയുക്തമായി നടത്തിയ റൈഡിലാണ് അനധികൃത താമസക്കാരെ പിടികൂടിയത്. സംഭവത്തിൽ വിശദമായ അന്വേഷണം നടത്തുമെന്ന് എറണാകുളം റൂറൽ പൊലീസ് പറഞ്ഞു.
ഇവർ ഇതര സംസ്ഥാന തൊഴിലാളികൾ എന്ന രീതിയിൽ താമസിച്ചു വരികയായിരുന്നു. അമ്പതോളം പേരെയായിരുന്നു കസ്റ്റഡിയിൽ എടുത്തത്. ഇതിൽ 23 പേർ ഇതര സംസ്ഥാനത്തിൽ നിന്നുള്ളവരാണെന്ന് തിരിച്ചറിഞ്ഞതോടെ വിട്ടയച്ചു. കഴിഞ്ഞദിവസം രാത്രി 12 മണിയോടെയായിരുന്നു പരിശോധന തുടങ്ങിയത്. പിടിയിലായവരിൽ ചിലർ ഒരു വർഷത്തിലേറെയായി കേരളത്തിൽ താമസിക്കുന്നുണ്ട്. കൂലിപ്പണിയാണ് മിക്കവരുടെയും തൊഴിൽ. വിശദമായി ചോദ്യം ചെയ്ത ശേഷം ഇവരെ കോടതിയിൽ ഹാജരാക്കും എന്ന് പോലീസ് അറിയിച്ചു.
