മാനന്തവാടി: പഞ്ചാരക്കൊല്ലിയിൽ കടുവ കൊന്ന രാധയുടെ കുടുംബത്തെ സന്ദർശിച്ചു പ്രിയങ്ക ഗാന്ധി എംപി. ഉച്ചതിരിഞ്ഞു 1.20നാണു വീട്ടിലെത്തിയത്. അരമണിക്കൂറോളം കുടുംബത്തോടൊപ്പം ചെലവഴിച്ചു. വീടിന്റെ പണി പൂർത്തിയാക്കുന്നതിന് ആവശ്യമായ സഹായം എത്രയും പെട്ടന്ന് ചെയ്തുനൽകുമെന്ന് കുടുംബത്തെ അറിയിച്ചു. കുടുംബത്തിന്റെ സാമ്പത്തിക ബാധ്യതകളെക്കുറിച്ചും ജോലി സംബന്ധമായ കാര്യങ്ങളും ചോദിച്ചറിഞ്ഞു. വന്യമൃഗ ശല്യം മൂലം നേരിടുന്ന പ്രശ്നങ്ങളെക്കുറിച്ചും ചോദിച്ചറിഞ്ഞു. ബന്ധുക്കളും നാട്ടുകാരും ഉൾപ്പെടെ നിരവധിപ്പേർ പ്രിയങ്ക ഗാന്ധിയെ കാണാൻ എത്തിയിരുന്നു
സിപിഎം പ്രവർത്തകരുടെ പ്രതിഷേധം
വയനാട്ടിലെത്തിയ പ്രിയങ്ക ഗാന്ധി എംപിക്കെതിരെ സിപിഎം പ്രവർത്തകരുടെ പ്രതിഷേധം. കണ്ണൂർ വിമാനത്താവളത്തിൽ നിന്ന് വയനാട്ടിലേക്ക് പോകുന്നവഴി കണിയാരത്ത് വച്ച് പ്രവർത്തകർ കരിങ്കൊടിയുമായി പ്രതിഷേധിച്ചു. മുദ്രാവാക്യങ്ങളുമായി എംപിയുടെ വാഹനത്തിന് നേരെയെത്തിയാണ് പ്രവർത്തകർ കരിങ്കൊടി കാണിച്ചത്. പ്രശ്‌നങ്ങൾ ഉള്ളപ്പോൾ മാത്രമാണ് എംപി വയനാട്ടിലെത്തുന്നതെന്ന് ആരോപിച്ചാണ് പ്രതിഷേധം.
20 മിനിട്ടോളം കുടുംബാംഗങ്ങൾക്കൊപ്പം പ്രിയങ്ക ഉണ്ടായിരുന്നു. കുടുംബത്തിന് എന്ത് ആവശ്യമുണ്ടെങ്കിലും ഒപ്പം ഉണ്ടാകുമെന്നും പ്രിയങ്ക ഉറപ്പ് നൽകി. അന്തരിച്ച മുൻ ഡി.സി.സി ട്രഷറർ എൻ.എം. വിജയന്റെ വീടും സന്ദർശിച്ചു.
ശേഷം യുഡിഎഫ് നടത്തുന്ന മലയോര സംരക്ഷണ ജാഥയിൽ പ്രിയങ്ക ഭാഗമാകും. സുൽത്താൻ ബത്തേരിയിലെ ജാഥയിലെത്തി പ്രവർത്തകരെ അഭിസംബോധന ചെയ്യും. കൂടാതെ കളക്ടറോടൊപ്പമുള്ള യോഗത്തിലും പ്രിയങ്ക പങ്കെടുക്കും. കടുവയുടെ ആക്രമണത്തെത്തുടർന്ന് കടുത്ത പ്രതിഷേധം നടന്നതിനാൽ പ്രിയങ്കയ്ക്ക് ശക്തമായ സുരക്ഷയൊരുക്കിയിട്ടുണ്ട്.
