കാളിദാസ് ജയറാം വിവാഹിതനായി; തരിണി ജീവിതസഖി | Kalidas Jayaram and Tarini Kalingarayar
സിനിമാ താരദമ്പതിമാരായ ജയറാമിന്റേയും പാർവതിയുടേയും മകൻ കാളിദാസ് ജയറാം വിവാഹിതനായി. ഗുരുവായൂർ ക്ഷേത്രത്തിൽ വച്ച് നടന്ന വിവാഹത്തിൽ, തരിണി കലിംഗരായർ കാളിദാസിന്റെ ജീവിതസഖിയായി. ദീർഘകാലമായി നീണ്ടുനിന്ന പ്രണയത്തിനൊടുവിലാണ് ഇവരുടെ വിവാഹം നടന്നത്. മോഡലും മിസ് തമിഴ്‌നാട്, മിസ് സൗത്ത് ഇന്ത്യയുമാണ് തരിണി.
രാവിലെ 7.15 മുതൽ 8 വരെയുള്ള മുഹൂർത്തത്തിലായിരുന്നു താലികെട്ട്. മന്ത്രി പി.എ.മുഹമ്മദ് റിയാസ്, പ്രമുഖ നടനും കേന്ദ്ര സഹമന്ത്രിയുമായ സുരേഷ് ഗോപി, മകൻ ഗോകുൽ സുരേഷ് തുടങ്ങിയ നിരവധി സെലിബ്രിറ്റികൾ വിവാഹത്തിൽ പങ്കെടുത്തു.
കാളിദാസ് ഒരു ചുവപ്പും സ്വർണവും കലർന്ന പരമ്പരാഗത വേഷത്തിലാണ് എത്തിയത്. തരിണി പീച്ച് നിറത്തിലുള്ള ഒരു സാരിയിൽ അതിമനോഹരിയായിരുന്നു. മുല്ലപ്പൂക്കൾ കൂടി ചേർത്ത് അവരുടെ സൗന്ദര്യം വർധിപ്പിച്ചു. വിവാഹത്തിന് മുമ്പ്, ചെന്നൈയിൽ വച്ച് ഇരുവരും ഒരു പ്രീ-വെഡ്ഡിങ് ആഘോഷം നടത്തിയിരുന്നു. അടുത്ത ബന്ധുക്കളും സുഹൃത്തുക്കളും മാത്രമായിരുന്നു ഈ ചടങ്ങിൽ പങ്കെടുത്തത്.
കഴിഞ്ഞ വർഷം നവംബറിൽ ചെന്നൈയിൽ വച്ച് നടന്ന വിവാഹ നിശ്ചയത്തോടെയാണ് കാളിദാസിന്റെയും തരിണിയുടെയും പ്രണയം പരസ്യമായത്. 2022-ൽ കാളിദാസിന്റെ വീട്ടിൽ നടന്ന ഓണാഘോഷത്തിൽ തരിണിയും പങ്കെടുത്തതോടെയാണ് ഇവരുടെ സൗഹൃദം പ്രണയമായി മാറിയത്. നീലഗിരി സ്വദേശിയായ തരിണി, മിസ് തമിഴ്‌നാട്, മിസ് സൗത്ത് ഇന്ത്യ തുടങ്ങിയ നിരവധി സൗന്ദര്യമത്സരങ്ങളിൽ പങ്കെടുത്ത് ശ്രദ്ധേയയായിട്ടുണ്ട്.
കാളിദാസിന്റെ സഹോദരി മാളവികയുടെ വിവാഹം ഗുരുവായൂരിൽ വച്ച് കഴിഞ്ഞ മേയിൽ നടന്നിരുന്നു. അതേപോലെ, കാളിദാസിന്റെ മാതാപിതാക്കളായ ജയറാമും പാർവതിയും തമ്മിലുള്ള വിവാഹവും 1992-ൽ ഗുരുവായൂർ ക്ഷേത്രത്തിൽ വച്ചായിരുന്നു.
