സാമന്തയെ മറികടക്കാൻ ശ്രീലീല ; പുഷ്പ 2 വിലെ ഐറ്റം സോങ് റിലീസിന്
ഇന്ത്യൻ സിനിമ ആരാധകർ വളരെ ആവേശത്തോടെ കാത്തിരിക്കുന്ന ചിത്രമാണ് പുഷ്പ 2 ദി റൂൾ. ചിത്രത്തിന്റെ ആദ്യ ഭാഗത്തിൽ ‘ഊ ആണ്ടവാ’ എന്ന ഡാൻസ് നമ്പറിലൂടെ സാമന്ത ഉണ്ടാക്കിയ ഓളം ചെറുതൊന്നുമായിരുന്നില്ല. ഇപ്പോഴിതാ, സാമന്തയെ മറികടക്കാനെത്തുന്നത് ഡാന്‍സിങ് ക്വീന്‍ ശ്രീലീലയാണ്. ഇപ്പോഴിതാ, ആരാധകരെ ആവേശത്തിലാഴ്ത്തി ഗാനത്തിന്റെ റിലീസ് തീയതി പുറത്തുവിട്ടിരിക്കുകയാണ് അണിയറപ്രവർത്തകർ.
ഈ മാസം 24 ന് വൈകുന്നേരം 07:02 നാണ് ഗാനം റിലീസ് ചെയ്യുന്നത്. അല്ലു അർജുനും ശ്രീലീലയും ആടിത്തിമിർക്കുന്ന ഗാനം ഒരുക്കിയിരിക്കുന്നത് ദേവി ശ്രീ പ്രസാദാണ്. ‘ഊ ആണ്ടവാ’ പോലെ ഈ ഗാനവും ഹിറ്റ് ചാർട്ടുകളിൽ ഇടം നേടുമെന്നാണ് അണിയറപ്രവർത്തകരുടെയും അല്ലു അർജുൻ ആരാധകരുടെയും പ്രതീക്ഷ. ഈ ഒരൊറ്റ ഡാൻസിനായി മാത്രം രണ്ട് മുതല്‍ മൂന്ന് കോടി രൂപ വരെയാണ് ശ്രീലീലയ്ക്ക് പ്രതിഫലമായി ലഭിക്കുന്നത്.
അതേസമയം, റിലീസിന് മുന്നേ ചിത്രം കോടികൾ കൊയ്തതായാണ് വിവരം. ചിത്രം പ്രീ റിലീസ് ബിസിനസുകളിലൂടെ മാത്രം 1,085 കോടി രൂപ നേടി കഴിഞ്ഞു. ‘പുഷ്പ 2’ന്റെ ഒടിടി അവകാശം നെറ്റ്ഫ്ലിക്‌സ് വാങ്ങിയതായുള്ള റിപ്പോർട്ടുകൾ അടുത്തിടെ പുറത്തുവന്നിരുന്നു. 270 കോടി രൂപയ്‌ക്കാണ് പുഷ്പ 2വിന്റെ ഒടിടി അവകാശം വിറ്റുപോയത്. എന്നാൽ തിയറ്റർ അവകാശം 650 കോടി രൂപയ്‌ക്കാണ് വിറ്റുപോയിരിക്കുന്നത്.
തെലുങ്ക്, ഹിന്ദി, തമിഴ്, കന്നഡ, മലയാളം എന്നീ ഭാഷകളിലാണ് ചിത്രം തിയറ്ററിലെത്തുക. ചിത്രത്തിലെ പുറത്തിറങ്ങിയ ഗാനങ്ങൾക്കെല്ലാം മികച്ച പ്രതികരണമാണ് ലഭിച്ചത്. അല്ലു അർജുൻ കേന്ദ്ര കഥാപാത്രമായെത്തുന്ന ചിത്രത്തിൽ രശ്മികയാണ് നായിക. മലയാള നടൻ ഫഹദ് ഫാസിലാണ് മറ്റൊരു കേന്ദ്ര കഥാപാത്രത്തെ അവതരിപ്പിക്കുന്നത്.
